Grandhi Srinivas: డీఎస్పీ జయసూర్య వివాదం పై గ్రంధి శ్రీనివాస్ సంచలన వ్యాఖ్యలు..

గోదావరి జిల్లాలు (Godavari Districts) మరోసారి రాజకీయ చర్చలకు కేంద్రంగా మారాయి. భీమవరం (Bhimavaram) ఘటనలతో కొత్త రాజకీయ సమీకరణాలు ఉత్పత్తి అవుతున్నాయి. ఇటీవల జనసేన అధినేత పవన్ కళ్యాణ్ (Pawan Kalyan) భీమవరం డీఎస్పీ (DSP) జయసూర్య (Jayasurya)పై ఫిర్యాదు చేయడంతో పరిస్థితి వేడెక్కింది. ఈ వ్యవహారం మీద కూటమి పార్టీలలోనే చర్చలు జోరుగా సాగుతున్నాయి. రఘురామకృష్ణరాజు (Raghu Rama Krishna Raju) చేసిన వ్యాఖ్యలు రాజకీయంగా మరింత హిట్ ఎక్కించాయి. ఇప్పుడు ఈ అంశంపై వైసీపీ (YCP) మాజీ ఎమ్మెల్యే గ్రంధి శ్రీనివాస్ (Grandhi Srinivas) చేసిన వ్యాఖ్యలు చర్చనీయాంశమయ్యాయి.

2019 ఎన్నికల్లో భీమవరం నుంచి పవన్ కళ్యాణ్‌ను ఓడించిన గ్రంధి శ్రీనివాస్ తాజాగా ఈ వివాదంపై స్పందించారు. పవన్ తీసుకున్న నిర్ణయం సరైనదేనని, ఆయన చేస్తున్న చర్యలను స్వాగతిస్తున్నానని అన్నారు. తాను పవన్‌ను త్వరలో కలుస్తానని, ఆ సందర్భంలో కొన్ని ముఖ్య విషయాలు బయటపెడతానని చెప్పారు. పవన్‌కు అప్పాయింట్‌మెంట్ లభిస్తే భీమవరం రాజకీయాల అసలు కథను చెప్పుతానని గ్రంధి వ్యాఖ్యానించారు.

డీఎస్పీ జయసూర్యపై వచ్చిన ఆరోపణలు తప్పుడు దిశలో సాగుతున్నాయని ఆయన అన్నారు. గత 14 నెలలుగా భీమవరం పరిధిలో కొన్ని క్లబ్‌లలో పేకాట జరుగుతోందని, ఆ కార్యకలాపాల వెనుక కొంతమంది రాజకీయ నాయకుల ప్రమేయం ఉందని వివరించారు. గత రెండు నెలలుగా పేకాట ఆగిపోవడంతో కొంతమంది ఆ అధికారిని లక్ష్యంగా చేసుకొని దాడి చేస్తున్నారని తెలిపారు. తాను అందరినీ బాగా తెలుసునని, ఈ వ్యవహారంలో పోలీస్ అధికారిని తప్పుగా చూపడం అన్యాయం అని గ్రంధి పేర్కొన్నారు.

అంతేకాక, కూటమి ప్రభుత్వం ఏర్పడిన తరువాత పేకాట వ్యాపారం మళ్లీ చురుకుగా సాగిందని, ప్రతి క్లబ్ నుండి పెద్ద మొత్తంలో డబ్బులు వసూలు చేస్తున్నారని ఆరోపించారు. కొందరు నేతలు ఒక్కో క్లబ్ నుంచి 10 లక్షల రూపాయలు వసూలు చేస్తున్నారని, ప్రజలు దీనిపై ఆందోళన వ్యక్తం చేస్తున్నారని తెలిపారు. అంతేకాదు, ఒక్కో బ్రాండీ షాప్ నుండి నెలకు సుమారు నాలుగు లక్షల రూపాయలు వసూలు అవుతున్నాయని కూడా ఆయన అన్నారు.

డీఎస్పీ జయసూర్య విషయములో రఘురామకృష్ణరాజు చేసిన వ్యాఖ్యలు వాస్తవమని గ్రంధి స్పష్టంగా తెలిపారు. ఆయన మాటల్లో నిజం ఉందని, రాజకీయ ప్రయోజనాల కోసం ఒక నిజాయితీ ఉన్న అధికారిని లక్ష్యంగా చేసుకోవడం తగదని అన్నారు. పవన్ కళ్యాణ్ నిజమైన విషయాలు తెలుసుకుంటే సరిగ్గా స్పందిస్తారని తన నమ్మకం అని గ్రంధి చెప్పారు. ఇక భీమవరం ఘటనతో గోదావరి రాజకీయాలు మళ్లీ వైరల్ గా మారాయి. కూటమి పార్టీల మధ్య సమతుల్యం కాపాడే ప్రయత్నం జరుగుతుండగా, ఇలాంటి సంఘటనలు ఆ సమీకరణాలపై ప్రభావం చూపే అవకాశం ఉందని విశ్లేషకులు అంటున్నారు. రాబోయే రోజుల్లో ఈ వ్యవహారం ఏ దిశగా మలుపు తిప్పుతుందో చూడాలి..