Chandrababu: ఆ ముగ్గురు నేతృత్వంలో అభివృద్ధి దిశగా దూసుకెళ్తున్న ఏపీ..

ఆంధ్రప్రదేశ్‌ (Andhra Pradesh) లో కూటమి ప్రభుత్వం ఏర్పడిన 17 నెలలు గడుస్తున్న తరుణంలో, అభివృద్ధి, సంక్షేమం రెండూ సమతుల్యంగా సాగుతున్నాయి. అమరావతి (Amaravati) రాజధాని పనులు వేగంగా కొనసాగుతుండగా, పోలవరం ప్రాజెక్ట్ కూడా నిరాటంకంగా నడుస్తోంది. రాష్ట్రంలోని ప్రతి శాఖ తన లక్ష్యాల వైపు దూసుకెళ్తోంది. ఇదే సమయంలో విశాఖపట్నం (Visakhapatnam) ఐటీ రంగంలో కొత్త ఊపుని సొంతం చేసుకుంటోంది. ముఖ్యంగా గూగుల్ (Google) డేటా సెంటర్ ఏర్పాటు నిర్ణయం రాష్ట్రానికి పెద్ద మైలురాయిగా మారింది. దీనితో వచ్చే నెలలో విశాఖలో జరగబోయే పెట్టుబడుల సదస్సుపై పెద్ద ఎత్తున ఆసక్తి నెలకొంది.

ప్రజల్లో కూడా ప్రభుత్వం చేస్తున్న కృషిపై సానుకూల అభిప్రాయం కనిపిస్తోంది. ముఖ్యమంత్రి చంద్రబాబు నాయుడు (Chandrababu Naidu), మంత్రి నారా లోకేష్ (Nara Lokesh) విదేశీ పర్యటనల ద్వారా పెట్టుబడులను ఆకర్షించేందుకు ప్రయత్నిస్తున్నారు. ఈ క్రమంలో అనేక పారిశ్రామికవేత్తలను నేరుగా కలుస్తూ, రాష్ట్రంలో పెట్టుబడులకు అనుకూల వాతావరణం ఉందని వారికి వివరిస్తున్నారు. రాయితీలు, భూముల కేటాయింపు వంటి అంశాలను పారదర్శకంగా ప్రదర్శిస్తూ నమ్మకాన్ని కలిగిస్తున్నారు.

గత ప్రభుత్వ కాలంలో సంక్షేమ పథకాలకే ప్రాధాన్యం ఇచ్చారు. పెట్టుబడుల దిశగా పెద్దగా ప్రయత్నాలు జరగలేదు. అయితే ప్రస్తుత ప్రభుత్వం దానికి భిన్నంగా వ్యూహాత్మకంగా ముందుకు సాగుతోంది. పల్లె పాలన, గ్రామీణ అభివృద్ధి వంటి అంశాలను పవన్ కళ్యాణ్ (Pawan Kalyan) పర్యవేక్షిస్తున్నట్లు తెలుస్తోంది. రాజధాని పనులు, పాలన సంబంధిత వ్యవహారాలను చంద్రబాబు స్వయంగా చూసుకుంటుండగా, విదేశీ పెట్టుబడులపై లోకేష్ దృష్టి సారించారు. ఈ ముగ్గురు నాయకులు తామతాముగా బాధ్యతలు తీసుకోవడంతో రాష్ట్ర అభివృద్ధి స్పష్టంగా కనిపిస్తోంది.

చంద్రబాబు లోకేష్ విదేశీ పర్యటనల్లో ఎంఓయూల ప్రకటనలకే పరిమితం కాకుండా, పారిశ్రామికవేత్తలతో ముఖాముఖిగా మాట్లాడడం విశేషం. ఈ విధానం వల్ల నమ్మకం పెరుగుతోంది. విదేశాల్లో పనిచేస్తున్న ఏపీకి చెందిన నిపుణులు కూడా తమ కంపెనీల యాజమాన్యాలను పెట్టుబడుల కోసం ప్రోత్సహిస్తున్నారు. దీనివల్ల ఏపీకి పెట్టుబడులు రాబోయే అవకాశాలు మరింతగా పెరిగాయి.

ఇప్పుడు అందరి దృష్టి విశాఖలో జరగబోయే పెట్టుబడుల సదస్సుపై ఉంది. నవంబర్ 14, 15 తేదీల్లో జరగనున్న ఈ సదస్సుకు అనేక దేశాల నుంచి ప్రముఖ పారిశ్రామికవేత్తలు రానున్నారు. గూగుల్ డేటా సెంటర్ ప్రకటనతో మొదలైన సానుకూల వాతావరణం ఇప్పుడు పెద్ద దిశగా మారుతోంది. గతంలో రాష్ట్రంపై ఉన్న ప్రతికూల భావనలు తగ్గి, పెట్టుబడుల పట్ల నమ్మకం పెరిగింది. చంద్రబాబు, లోకేష్ కృషితో ఏపీ తిరిగి పెట్టుబడుల గమ్యస్థానంగా మారుతోంది. ఈ 17 నెలల్లో తీసుకున్న నిర్ణయాలు, రూపొందించిన విధానాలు రాష్ట్ర అభివృద్ధికి దృఢమైన పునాది వేస్తున్నాయి. పెట్టుబడులు, మౌలిక వసతులు, పరిశ్రమలు కలగలసిన ఈ దశలో ఆంధ్రప్రదేశ్‌ ఒక కొత్త దిశలో పయనిస్తోంది.