Washington: అమెరికా చేతుల్లోకి టిక్ టాక్…

టిక్ టాక్ (Tik Tok) మొబైల్ యాప్ కు ట్రంప్ షరతులతో కూడిన శుభవార్త వినిపించారు. టిక్‌టాక్‌ కంపెనీలో సుమారు 50 శాతం వాటా యూఎస్ పెట్టుబడిదారుల చేతిలో ఉండేలా కండిషన్ తో ఎగ్జిక్యూటివ్‌ ఆర్డర్‌ ద్వారా ఆ సేవలను తిరిగి ప్రారంభిస్తామని ప్రకటించారు. తద్వారా అమెరికా భద్రతకు సంబంధించి మరో ఒప్పందం చేసుకోనున్నారు.. ఉమ్మడి వెంచర్‌లో 50 శాతం వాటా ఉండాలి.. దీనికి వారు ఒకే అంటే మేమే టిక్‌టాక్‌ను రక్షిస్తామని ఆయన వెల్లడించారు. అప్పుడు టిక్ టాక్ మరింత అద్భుతంగా నడిపించే వారి చేతుల్లోకి వెళుతుందన్నాడు. దాంతో టిక్ టాక్ సేవలకు అనుమతిస్తామని తన సోషల్‌ మీడియా ట్రూత్‌లో డొనాల్డ్ ట్రంప్ చెప్పుకొచ్చాడు.

ఇక, డొనాల్డ్ ట్రంప్‌ ప్రకటనపై టిక్‌టాక్‌ రియాక్ట్ అయింది. పునరుద్ధరణ సేవల ప్రక్రియ కొనసాగుతుందన్నారు. అమెరికాలో దీర్ఘకాలం కొనసాగేందుకు పరిష్కారం చూపేలా ట్రంప్‌తో కలిసి పని చేయబోతున్నట్లు సదరు టిక్ టాక్ వెల్లడించింది. సర్వీస్‌ ప్రొవైడర్లతో ఒప్పందం ప్రకారం.. ఈ సేవలను తిరిగి ప్రారంభించడానికి తాము సిద్ధంగా ఉన్నట్లు టిక్ టాక్ ప్రతినిధులు వెల్లడించారు. టిక్ టాక్ ను 17 కోట్ల మంది అమెరికన్లు వినియోగిస్తున్నారు. అలాగే, చిరు వ్యాపారాలు వృద్ధి చెందేందుకు వీలు కల్పిస్తున్నందుకు సర్వీస్‌ ప్రొవైడర్లపై ఎలాంటి ఫైన్స్ విధించకుండా ఉండేందుకు ట్రంప్‌ అవసరమైన హామీ ఇచ్చారని టిక్ టాక్ సంస్థ తెలిపింది.

ఇక, ఈనెల 19వ తేదీ నాటికి టిక్‌టాక్(tiktok)‌ను విక్రయించాలని అమెరికా ప్రతినిధుల సభ ఓ బిల్లుకు ఆమోదం తెలిపింది. గడువులోపు విక్రయంచకపోతే.. యాప్‌ను బ్యాన్ చేస్తామని అందులో పేర్కొంది.. యూఎస్ సుప్రీంకోర్టు సైతం టిక్‌టాక్‌ మాతృ సంస్థ బైట్‌డ్యాన్స్‌కు(Byte dance) గడువు ఇచ్చింది. కానీ, ఎలాంటి అమ్మకాలు జరగకపోవడంతో ఆదివారం నుంచి టిక్‌టాక్‌ సేవల్ని ఆపివేస్తున్నట్లు సంస్థ యూజర్లకు తెలియజేసింది. దీంతో గూగుల్‌, యాప్‌ సంస్థలు తమ ప్లేస్టోర్‌ నుంచి టిక్‌టాక్‌ను తొలగించాయి.