Satyam Scam: సత్యం స్కామ్ పార్ట్-2.. జన్వాడ భూముల వేటలో ఈడీ కోర్టు!

సత్యం కంప్యూటర్స్ కుంభకోణం.. భారత కార్పొరేట్ చరిత్రలోనే ఒక మాయని మచ్చ. దశాబ్ద కాలం క్రితం దేశవ్యాప్తంగా సంచలనం సృష్టించిన ఈ కేసు, ఇప్పుడు మళ్ళీ జన్వాడ భూముల రూపంలో కొత్త మలుపు తిరిగింది. కొన్ని వేల కోట్ల రూపాయల భూముల లావాదేవీల చుట్టూ ఇప్పుడు ఈడీ (Enforcement Directorate) ఉచ్చు బిగుస్తోంది. దాదాపు 15 ఏళ్ల క్రితం భారత ఐటీ రంగ పునాదులను కదిలించిన బైర్రాజు రామలింగరాజు పేరు మరోసారి వార్తల్లో మారుమోగుతోంది. సత్యం కుంభకోణంలో అక్రమంగా ఆర్జించిన సొమ్మును రియల్ ఎస్టేట్ రంగంలోకి మళ్లించారనే పాత ఆరోపణలు ఇప్పుడు బలమైన ఆధారాలతో తెరపైకి వచ్చాయి. రంగారెడ్డి జిల్లా, శంషాబాద్ సమీపంలోని జన్వాడ భూముల వ్యవహారంలో రామలింగరాజు సహా ఏకంగా 213 మందికి ఈడీ ప్రత్యేక కోర్టు నోటీసులు జారీ చేయడం రాజకీయ, కార్పొరేట్ వర్గాల్లో ప్రకంపనలు సృష్టిస్తోంది.

ఈ కేసు మళ్లీ వెలుగులోకి రావడానికి ప్రధాన కారణం అభినవ్ అల్లాడి అనే వ్యక్తి దాఖలు చేసిన పిటిషన్. ఈ కేసులో 12వ నిందితుడిగా ఉన్న అభినవ్, రామలింగరాజుకు సంబంధించిన శతభిష అనే కంపెనీలో డైరెక్టర్‌గా పనిచేశారు. సాధారణంగా నిందితులు తప్పించుకోవాలని చూస్తారు, కానీ అభినవ్ స్వయంగా కోర్టుకు వచ్చి.. ఈ కుంభకోణం వెనుక ఉన్న అసలు నిజాలు నాకు తెలుసని, తనను సాక్షిగా పరిగణించాలని కోరడం ఈ కేసులో కీలక మలుపు. సత్యం కంపెనీ నిధులను దారి మళ్లించి, హైదరాబాద్ శివార్లలోని వేల ఎకరాల భూములను బినామీల పేర్లతో ఎలా కొనుగోలు చేశారో ఆయన తన పిటిషన్‌లో వివరించారు. ముఖ్యంగా జన్వాడలోని సర్వే నంబర్లు 306 నుండి 316 మధ్య ఉన్న 90 ఎకరాల భూమి ఇప్పుడు వివాదానికి కేంద్రబిందువుగా మారింది.

అభినవ్ అల్లాడి ఆరోపణల ప్రకారం, ఈ 90 ఎకరాల భూమి విలువ ప్రస్తుతం మార్కెట్‌లో రూ.5,000 కోట్లకు పైగానే ఉంటుంది. సత్యం స్కామ్ నిధులతో కొనుగోలు చేసిన ఈ భూములను మనీ లాండరింగ్ నిరోధక చట్టం (PMLA) కింద ఈడీ జప్తు చేయాల్సి ఉంది. అయితే ఈ ప్రక్రియలో కొందరు అధికారులు, రాజకీయ నేతలు రామలింగరాజు కుటుంబానికి సహకరించారని, తద్వారా ఆస్తులను కాపాడటానికి ప్రయత్నించారని పిటిషనర్ సంచలన ఆరోపణలు చేశారు. రెవెన్యూ రికార్డులను తారుమారు చేసి, అసలైన యజమానులకు అన్యాయం చేస్తూ ఈ బినామీ లావాదేవీలు సాగాయని ఆయన పేర్కొన్నారు. తాను కూడా ఈ వ్యవహారంలో బాధితుడినేనని, వాస్తవాలను బయటపెట్టడం ద్వారా న్యాయం జరగాలని ఆయన కోర్టును అభ్యర్థించారు.

ఈ పిటిషన్‌ను తీవ్రంగా పరిగణించిన ఈడీ కోర్టు, ఈ కుంభకోణంతో సంబంధం ఉన్న వారందరికీ నోటీసులు జారీ చేసింది. ఇందులో రామలింగరాజు, ఆయన భార్య నందిని రాజు, కుమారుడు తేజ రాజుతో పాటు శతభిష కంపెనీ డైరెక్టర్లు, ఇతర బినామీదారులు కలిపి మొత్తం 213 మంది ఉన్నారు. ఈ నెల 27న జరగబోయే విచారణలో వీరంతా తమ వివరణ ఇవ్వాల్సి ఉంటుంది. ఈడీ కూడా దీనిపై కౌంటర్ దాఖలు చేయాలని కోర్టు ఆదేశించింది.

2009లో సత్యం కంప్యూటర్స్ ఖాతాల్లో దాదాపు రూ.7,000 కోట్ల మేర తారుమారు జరిగిందని రామలింగరాజు స్వయంగా ఒప్పుకున్నప్పుడు దేశం నివ్వెరపోయింది. అప్పట్లో ఆయనకు జైలు శిక్ష పడింది. కంపెనీ వేరే యాజమాన్యం చేతుల్లోకి వెళ్లింది. అయితే, అప్పట్లో దారి మళ్లించిన నిధులన్నీ ఎక్కడికి వెళ్లాయి? ఏ ఏ భూముల్లో పెట్టుబడులు పెట్టారు? అనే ప్రశ్నలకు ఇప్పుడు సమాధానాలు లభించే అవకాశం కనిపిస్తోంది.

సత్యం స్కామ్ అంటే కేవలం ఒక ఐటీ కంపెనీలో జరిగిన అకౌంటింగ్ మోసం మాత్రమే కాదు, అది వేల కోట్ల విలువైన భూముల అక్రమ సామ్రాజ్యానికి పునాది అని తాజా పరిణామాలు నిరూపిస్తున్నాయి. ఈ నెల 27న ఈడీ కోర్టులో జరగబోయే విచారణ ఈ కేసు గమనాన్ని మార్చబోతోంది. ఒకవేళ అభినవ్ అల్లాడి వాంగ్మూలం నిజమని తేలితే, రామలింగరాజు కుటుంబం మరోసారి తీవ్ర చట్టపరమైన చిక్కుల్లో పడటం ఖాయం. 5,000 కోట్ల విలువైన ఆ భూములు ప్రభుత్వ పరం అవుతాయా? లేక బినామీల వెనుక ఉన్న అసలు సూత్రధారులు బయటకు వస్తారా? అనేది ఇప్పుడు తెలంగాణ వ్యాప్తంగా ఉత్కంఠ రేపుతున్న అంశం.