Renu Desai: నన్ను కాపాడేందుకు ఎవరూ లేరు.. ట్రోలింగ్పై రేణు దేశాయ్ సంచలన పోస్ట్!
- Published By: Vishal
- January 20, 2026 / 03:52 PM IST
సినీ నటి, సామాజిక కార్యకర్త రేణు దేశాయ్ గత కొన్ని రోజులుగా సోషల్ మీడియాలో జరుగుతున్న ట్రోలింగ్పై స్పందిస్తూ అత్యంత భావోద్వేగమైన పోస్ట్ పెట్టారు. వీధి కుక్కల హక్కుల కోసం ఆమె చేస్తున్న పోరాటం ఇప్పుడు పెద్ద ఎత్తున చర్చకు దారితీసింది.
ఆవేశానికి కారణం ఇదే
జనవరి 19న హైదరాబాద్లో వీధి కుక్కల నివారణపై సుప్రీంకోర్టు ఇచ్చిన తీర్పును నిరసిస్తూ నిర్వహించిన ప్రెస్మీట్లో రేణు దేశాయ్ ఆవేశంగా మాట్లాడారు. కుక్కల కంటే దారుణంగా చిన్నారులపై అత్యాచారాలు చేసే మగాళ్లను ఎందుకు చంపడం లేదని ఆమె ప్రశ్నించారు. ఈ క్రమంలో ఒక వ్యక్తి స్టేజ్ మీదకు వచ్చి తనను కొట్టబోయాడని, ఆ సమయంలో ఆమె మీడియాపై ఆగ్రహం వ్యక్తం చేయాల్సి వచ్చిందని వివరించారు.
వ్యక్తిగత జీవితంపై విమర్శలు
ఈ ప్రెస్మీట్ తర్వాత నెటిజన్లు ఆమెపై దారుణంగా ట్రోలింగ్ మొదలుపెట్టారు. “నీకు తిక్క ఉంది.. అందుకే పవన్ కళ్యాణ్ నిన్ను వదిలేశాడు” అంటూ ఆమె వ్యక్తిగత జీవితాన్ని కించపరిచేలా కామెంట్స్ చేయడంపై ఆమె తీవ్రంగా కలత చెందారు. తాను ఏ రాజకీయ పార్టీలోనూ చేరడం లేదని, కేవలం మూగజీవాల ప్రాణాల కోసమే పోరాడుతున్నానని స్పష్టం చేశారు.
నా బాధ వాళ్లకే తెలుసు
తన తాజా ఇన్స్టా స్టోరీలో రేణు దేశాయ్ తన ఒంటరితనాన్ని బయటపెట్టారు.
- తనను కాపాడటానికి తండ్రి, తల్లి, అన్నయ్య లేదా భర్త వంటి వారు ఎవరూ లేరని ఆవేదన వ్యక్తం చేశారు.
- తనపై జరుగుతున్న ఈ దుష్ప్రచారాన్ని మౌనంగా దేవి, మహాదేవుడికి విన్నవించుకుంటున్నానని తెలిపారు.
- తప్పు లేకుండా పడుతున్న బాధను, కారుస్తున్న కన్నీళ్లను ఆ దేవుడు మాత్రమే చూస్తున్నాడని ఆమె ఎమోషనల్ అయ్యారు.
- ఎన్ని విమర్శలు వచ్చినా, అమాయకపు కుక్కలను చంపడం తప్పు అని అందరికీ అర్థమయ్యే వరకు తాను పోరాడుతూనే ఉంటానని ఆమె తేల్చి చెప్పారు.
