Telangana Jagruthi: రాజకీయ పార్టీగా మారనున్న తెలంగాణ జాగృతి!

తెలంగాణ రాజకీయాల్లో అనూహ్య పరిణామం చోటుచేసుకుంది. గులాబీ కోటలో ముసలం పుట్టిందన్న వార్తలకు బలం చేకూర్చుతూ, ఎమ్మెల్సీ కల్వకుంట్ల కవిత సంచలన నిర్ణయం తీసుకున్నారు. శాసన మండలి వేదికగా ఆమె చేసిన ప్రకటన రాష్ట్ర రాజకీయాల్లో పెను ప్రకంపనలు సృష్టిస్తోంది. ఉద్యమ పార్టీగా ఎదిగిన బీఆర్‌ఎస్‌పై తీవ్ర ఆరోపణలు చేస్తూ, తన తండ్రి స్థాపించిన పార్టీతో పూర్తిగా తెగదెంపులు చేసుకుంటున్నట్టు ప్రకటించారు. ఇన్నాళ్లు సాంస్కృతిక వేదికగా ఉన్న తెలంగాణ జాగృతిని ఇకపై పూర్తిస్థాయి రాజకీయ పార్టీగా మారుస్తున్నట్లు ప్రకటించారు.

శాసన మండలిలో కవిత భావోద్వేగానికి గురై కంటతడి పెట్టడం చర్చనీయాంశమైంది. ఆమె మాటల్లో తీవ్రమైన ఆవేదన, ఆగ్రహం స్పష్టంగా కనిపించాయి. ముఖ్యంగా “ఇది ఆస్తుల పంచాయితీ కాదు.. ఆత్మగౌరవ పంచాయితీ” అని ఆమె చేసిన వ్యాఖ్యలు బీఆర్‌ఎస్ అంతర్గత విభేదాల తీవ్రతను బయటపెట్టాయి. పుట్టింటి బంధాలను తెంచుకుని బయటకు వస్తున్నానని చెప్పడం ద్వారా, కేసీఆర్ కుటుంబంలోనూ, పార్టీలోనూ ఆమెకు దక్కిన ప్రాధాన్యతపై, లేదా ఆమె ఎదుర్కొన్న అవమానాలపై అనేక అనుమానాలు రేకెత్తిస్తున్నాయి. బీఆర్‌ఎస్ ఇప్పుడు ఉద్యమ ద్రోహులకు పునరావాస కేంద్రంగా మారిందని ఆమె విమర్శించడం గమనార్హం.

తెలంగాణ ఉద్యమ సమయంలో బతుకమ్మ పండుగ ద్వారా సాంస్కృతిక పునరుజ్జీవనానికి ప్రతీకగా నిలిచిన తెలంగాణ జాగృతి సంస్థ ఇప్పుడు రాజకీయ అవతారం ఎత్తనుంది. ఈ మేరకు కవిత కీలక ప్రకటన చేశారు. దీంతో జాగృతి ఇకపై కేవలం ఎన్జీవోగా కాకుండా, ఎన్నికల కమిషన్ గుర్తింపు పొందిన రాజకీయ పార్టీగా మారుతుంది. వచ్చే ఎన్నికలే లక్ష్యంగా ఈ కొత్త పార్టీ బరిలోకి దిగనుంది. విద్యార్థులు, నిరుద్యోగులు, మహిళలు, అన్ని వర్గాల ప్రజలే అజెండాగా ఈ పార్టీ పనిచేస్తుందని కవిత స్పష్టం చేశారు. దీనిని బట్టి చూస్తే, కవిత కేవలం ఉద్వేగంతో ఈ నిర్ణయం తీసుకోలేదని, దీని వెనుక ఒక పక్కా రాజకీయ వ్యూహం ఉన్నట్లు అర్థమవుతోంది. యువతను, అసంతృప్త వర్గాలను తన వైపు తిప్పుకునేందుకు ఆమె ప్రయత్నిస్తున్నారు.

కవిత నిర్ణయం బీఆర్‌ఎస్‌కు రాజకీయంగా దెబ్బేనని విశ్లేషకులు భావిస్తున్నారు. కవితకు మహిళల్లో, ముఖ్యంగా బతుకమ్మ ఆడే తెలంగాణ ఆడబిడ్డల్లో ఒక ప్రత్యేకమైన ఇమేజ్ ఉంది. ఆమె వేరు కుంపటి పెట్టడం వల్ల బీఆర్‌ఎస్‌కు పడాల్సిన సంప్రదాయ ఓట్లు, మహిళా ఓట్లు చీలిపోయే ప్రమాదం ఉంది. ఉద్యమ కాలం నుంచి పనిచేస్తున్న అనేక మంది కవిత వర్గీయులు బీఆర్‌ఎస్‌లో ఉన్నారు. ఇప్పుడు వారు కవిత వెంటే నడుస్తారా లేక కేసీఆర్ నాయకత్వంలోనే ఉంటారా అన్నది పార్టీలో గందరగోళం సృష్టిస్తుంది. సొంత కూతురే పార్టీ విధానాలను తప్పుబడుతూ, బయటకు రావడం ప్రత్యర్థి పార్టీలకు బలమైన ఆయుధంగా మారుతుంది.

కవిత కొత్త పార్టీ ఏర్పాటు కాంగ్రెస్, బీజేపీలకు పరోక్షంగా లాభం చేకూర్చే అవకాశం ఉంది. ప్రభుత్వ వ్యతిరేక ఓటు లేదా బీఆర్‌ఎస్ అనుకూల ఓటు చీలిపోవడం వల్ల ముక్కోణపు పోటీ ఏర్పడి, అది ప్రధాన పార్టీల సమీకరణాలను మారుస్తుంది. అయితే, కవిత జాగృతి ద్వారా సెంటిమెంట్‌ను ఎంత బలంగా రగిలిస్తారు, యువతను ఎంతగా ఆకర్షిస్తారు అనే అంశంపైనే ఆమె పార్టీ భవిష్యత్తు ఆధారపడి ఉంటుంది.

“వ్యక్తిగా వెళ్తున్నా.. రాజకీయ శక్తిగా తిరిగి వస్తా” అని కవిత చేసిన శపథం ఆమెలోని పట్టుదలను చూపిస్తోంది. అయితే, కుటుంబ పార్టీని, బలమైన నాయకత్వాన్ని ఎదిరించి, కొత్త పార్టీతో నెట్టుకురావడం అంత సులభం కాదు. కానీ, తెలంగాణ రాజకీయ యవనికపై జాగృతి రూపంలో కొత్త పోరాటం మొదలైందని మాత్రం కచ్చితంగా చెప్పవచ్చు. రాబోయే రోజుల్లో జరిగే పరిణామాలు రాష్ట్ర రాజకీయ ముఖచిత్రాన్ని మార్చే అవకాశం ఉంది.