Rummy : పేకాట రాయుళ్ల వింత కోరిక…! షాక్ ఇచ్చిన హైకోర్టు..!!

సాధారణంగా దొంగతనం చేసేవాడు పోలీసులకు దొరక్కుండా పారిపోతాడు. తప్పు చేసేవాడు సాక్ష్యాధారాలు లేకుండా జాగ్రత్తపడతాడు. కానీ, “మేము దర్జాగా తప్పు చేస్తాం.. మాకు పర్మిషన్ ఇవ్వండి” అని ఎవరైనా కోర్టు మెట్లు ఎక్కుతారా? ఆశ్చర్యంగా ఉన్నా ఆంధ్రప్రదేశ్‌లో అదే జరిగింది. ఇప్పటికే ఆన్‌లైన్ గేమింగ్, బెట్టింగ్ యాప్స్‌పై ప్రభుత్వాలు ఉక్కుపాదం మోపుతుంటే.. ఏకంగా హైకోర్టుకే వెళ్లి “మేము డబ్బులతో పేకాట ఆడుకుంటాం.. పోలీసులని డిస్టర్బ్ చేయొద్దని చెప్పండి” అంటూ పిటిషన్లు వేయడం ఇప్పుడు హాట్ టాపిక్‌గా మారింది.

భీమవరం కాస్మోపాలిటన్ క్లబ్, లార్డ్ హోర్డింగ్ హాల్ టౌన్ క్లబ్, నర్సాపురం యూత్ క్లబ్.. పేర్లు చూస్తేనే అర్థమవుతోంది కదా, ఇవి గోదావరి జిల్లాల్లోని ‘ప్రెస్టీజియస్’ క్లబ్బులని. ఈ మూడు క్లబ్బులు హైకోర్టులో పిటిషన్లు వేశాయి. సారాంశం ఒక్కటే.. “మేము 13 ముక్కల ఆట (Rummy) ఆడుకుంటాం. ఇది నైపుణ్యంతో కూడిన స్కిల్ గేమ్ ఆట. కాబట్టి మేము డబ్బులు పెట్టి ఆడినా సరే, పోలీసులు మమ్మల్ని అరెస్ట్ చేయకూడదు, కేసులు పెట్టకూడదు అని ఆర్డర్ ఇవ్వండి” అని కోరారు.

దీనిని విన్న సామాన్యుడికి, “అరె.. ఇదేం విడ్డూరం సామీ!” అనిపించక మానదు. ఒకపక్క రాష్ట్రంలో యువత బెట్టింగులకు బానిసలవుతున్నారని, ఆన్‌లైన్ రమ్మీలు జీవితాలను నాశనం చేస్తున్నాయని గగ్గోలు పెడుతుంటే.. వీరు మాత్రం దర్జాగా “మాకు లైసెన్స్ కావాలి” అని అడగడం నిజంగా సాహసమే.

పాపం.. సుప్రీంకోర్టు తీర్పులను ఉదాహరిస్తూ, రమ్మీ అనేది ఒక నైపుణ్య క్రీడ అని లాయర్ల చేత గట్టిగానే వాదించారు పిటిషనర్లు. కానీ, ఏపీ హైకోర్టు మాత్రం ఈ లాజిక్‌ను చాలా సింపుల్‌గా, స్ట్రాంగ్‌గా తిప్పికొట్టింది. “మీరు కాలక్షేపం కోసం ఆడుకుంటే ఓకే.. కానీ మధ్యలో డబ్బు ప్రస్తావన వస్తే మాత్రం అది కచ్చితంగా జూదమే అని తేల్చి చెప్పింది.

గాంబ్లింగ్ చట్టంలోని సెక్షన్ 3, 4 ప్రకారం.. డబ్బు పందెంగా కాసి ఆడే ఏ ఆట అయినా నేరమే అని స్పష్టం చేసింది. పోలీసులు కేసులు పెట్టొద్దని చెప్పడం కుదరదని, డబ్బులు పెట్టి ఆడితే చట్టపరంగా చర్యలు తీసుకోవాల్సిందేనని తేల్చిపారేసింది. గతంలో నూజివీడు మాంగో బే క్లబ్ విషయంలోనూ ఇదే తీర్పునిచ్చామని కోర్టు గుర్తు చేసింది. అంటే, ఆట సరదా కోసం ఉండాలి కానీ.. సంపాదన కోసం కాదు అని న్యాయస్థానం సున్నితంగానే మొట్టికాయ వేసిందన్నమాట.

ఈ పిటిషన్లు వేసిన టైమింగ్ చూస్తేనే నవ్వాలో, ఏడవాలో అర్థం కాని పరిస్థితి. ప్రస్తుతం దేశవ్యాప్తంగా, ముఖ్యంగా తెలుగు రాష్ట్రాల్లో ఆన్‌లైన్ బెట్టింగ్ యాప్స్, రమ్మీ సర్కిళ్లపై తీవ్ర వ్యతిరేకత ఉంది. అనేక కుటుంబాలు ఈ జూదం వల్ల రోడ్డున పడ్డాయి. ప్రభుత్వాలు కూడా వీటిని నియంత్రించడానికి కఠిన చట్టాలను తెస్తున్నాయి. ఇలాంటి సీరియస్ పరిస్థితుల్లో.. “మేము క్లబ్బుల్లో కూర్చుని లక్షలు పెట్టి ఆడుకుంటాం” అని కోర్టుకు వెళ్లడం అంటే.. “పులి బోనులోకి వెళ్లి తలకాయ పెట్టడమే”.

పేకాటను సమర్థించే వారు ఎప్పుడూ చెప్పే మాట.. “ఇది తెలివితేటలతో ఆడే ఆట”. నిజమే, రమ్మీ ఆడటానికి తెలివి కావాలి. కానీ, ఆ తెలివిని పక్కవాడి జేబులో డబ్బులు కొట్టేయడానికి వాడితే అది నైపుణ్యం ఎలా అవుతుంది? అది దోపిడీ అవుతుంది. కోర్టు సరిగ్గా ఇదే పాయింట్‌ను పట్టుకుంది. డబ్బు ప్రమేయం లేనంత వరకు అది క్రీడ.. డబ్బు చేరితే అది వ్యసనం, నేరం.

భీమవరం, నర్సాపురం వంటి ప్రాంతాల్లో సంక్రాంతి కోడిపందాలు, పేకాట శిబిరాలు ఒక “సంస్కృతి”గా చలామణి అవుతుంటాయి. స్థానిక నేతల అండదండలతో ఇన్నాళ్లు ‘మూడు ముక్కలు-ఆరు ఆటలు’గా సాగిన వ్యవహారానికి ఇప్పుడు చట్టపరమైన బ్రేకులు పడ్డాయి. హైకోర్టు తాజా తీర్పుతో ఒక విషయం స్పష్టమైంది. “వినోదం పేరుతో జూదాన్ని చట్టబద్ధం చేయలేం”. క్లబ్బులైనా, యాప్స్‌ అయినా.. డబ్బులు పెట్టి ఆడితే అది నేరమే. ఈ తీర్పుతోనైనా క్లబ్బుల నిర్వాహకులు, పేకాట రాయుళ్లు తమ ‘స్కిల్’ను మంచి పనులకు ఉపయోగిస్తారని ఆశిద్దాం. లేదంటే.. ఆట క్లబ్బులో మొదలై, చివరకు కటకటాల వెనుక ముగుస్తుంది!