RRR: ఆ ఇద్దరికి ప్రభుత్వ గళం కంటే వ్యక్తిగత గ్రాఫే ప్రాధాన్యం..

గత ఎన్నికల్లో టీడీపీ (TDP) మరియు బీజేపీ (BJP) తరఫున క్షత్రియ సామాజిక వర్గానికి చెందిన పలువురు నాయకులు విజయం సాధించారు. కూటమి ప్రభావమో, వ్యక్తిగత బలమో ఏదైనా కావొచ్చు కానీ ప్రజల్లో విశ్వాసం పొంది అసెంబ్లీలో అడుగుపెట్టారు. ఇలాంటి సమయంలో పార్టీ తరఫున, ప్రభుత్వ విధానాలకు మద్దతుగా వారి గళం వినిపిస్తే ప్రజలకు కూడా ఉపయోగంగా ఉంటుంది. ఈ దిశగా పార్టీలు కూడా స్పష్టమైన సంకేతాలు ఇస్తున్నాయి. అయితే ఇద్దరు కీలక నాయకుల విషయంలో మాత్రం పరిస్థితి భిన్నంగా కనిపిస్తోంది.

ఉండి నియోజకవర్గం (Undi Assembly Constituency) నుంచి గెలిచిన రఘురామకృష్ణరాజు (Raghurama Krishnam Raju) మొదటి నుంచే వార్తల్లో నిలుస్తున్నారు. ప్రజాప్రతినిధిగా గెలిచిన తర్వాత నియోజకవర్గంపై పూర్తిస్థాయిలో దృష్టి పెట్టాల్సిన అవసరం ఉందన్న అభిప్రాయం ఉన్నప్పటికీ, ఆయన ప్రజలకు కేటాయించిన సమయం చాలా పరిమితంగా ఉందన్న విమర్శలు వినిపిస్తున్నాయి. ఏడాదిన్నర కాలంలో ఆయన ప్రజల మధ్య గడిపిన సమయం కేవలం కొన్ని గంటలకే పరిమితమైందన్న ఆరోపణలు ఉన్నాయి. దీనికి బదులు వ్యక్తిగత ఇమేజ్ పెంచుకునే ప్రయత్నాలపైనే ఆయన ఎక్కువగా దృష్టి పెట్టారని పార్టీ వర్గాలు అంటున్నాయి. తనపై వచ్చే విమర్శలకు సమాధానం చెప్పేందుకు వీడియోల ద్వారా స్పందించడం అలవాటుగా మారిందన్న చర్చ కూడా సాగుతోంది. ఈ వ్యవహార శైలి టీడీపీ లోపల అసంతృప్తిని కలిగిస్తున్నట్టు సమాచారం.

ఇక ఉత్తరాంధ్ర ప్రాంతంలో కీలకమైన విశాఖపట్నం ఉత్తర నియోజకవర్గం (Visakhapatnam North) నుంచి గెలిచిన విష్ణుకుమార్‌రాజు (Vishnu Kumar Raju) పరిస్థితి మరోలా ఉంది. సీనియర్ బీజేపీ నాయకుడిగా పేరున్న ఆయనకు మంత్రి పదవి దక్కుతుందన్న ఆశలు ఉన్నాయని మొదటి నుంచే ప్రచారం జరిగింది. కానీ ఆ అవకాశం రాకపోవడంతో పాటు, రాష్ట్ర స్థాయి పార్టీ బాధ్యతలు కూడా దక్కకపోవడం ఆయనలో అసంతృప్తిని పెంచిందని చెబుతున్నారు. దీంతో ప్రభుత్వ నిర్ణయాలపై ఆయన బహిరంగంగా విమర్శలు చేయడం మొదలుపెట్టారు. ఇది పార్టీ లైన్‌కు భిన్నంగా ఉండటంతో, ఆయన సొంత పార్టీలోనే ‘ఎగస్పార్టీ’గా వ్యవహరిస్తున్నారన్న వ్యాఖ్యలు వినిపిస్తున్నాయి.

ఈ ఇద్దరి వ్యవహార శైలిపై అటు టీడీపీ, ఇటు బీజేపీ నేతలు దృష్టి సారించారు. బహిరంగంగా ఎలాంటి చర్యలు తీసుకోకపోయినా, అంతర్గతంగా జరిగే నెలవారీ సమీక్ష సమావేశాల్లో మాత్రం ఈ అంశం చర్చకు వస్తోందని తెలుస్తోంది. ముఖ్యమంత్రి చంద్రబాబు నాయుడు (N. Chandrababu Naidu) కూడా పార్టీ, ప్రభుత్వం తరఫున సమన్వయంతో మాట్లాడితే అందరికీ మంచిదన్న సూచనలను నర్మగర్భంగా చేశారని సమాచారం. అయినా సరే, ఇప్పటివరకు ఇద్దరు నాయకుల్లో స్పష్టమైన మార్పు కనిపించడంలేదన్న అభిప్రాయం ఉంది. ఈ పరిస్థితి ఇలాగే కొనసాగితే, పార్టీలు కఠిన నిర్ణయాలు తీసుకునే అవకాశం ఉందన్న సంకేతాలు రాజకీయ వర్గాల్లో చర్చకు దారి తీస్తున్నాయి. రానున్న రోజుల్లో ఈ ఇద్దరు ‘రాజులు’ తమ రాజకీయ దిశను ఎలా మార్చుకుంటారన్నది ఆసక్తికరంగా మారింది.