T.G.Bharath: కర్నూలు రాజకీయాలలో హీట్ పెంచేస్తున్న టీజీ భరత్ హెచ్చరిక..

రాజకీయాల్లో మాటల ఎంపిక ఎంత కీలకమో గతంలో ఎన్నో ఉదాహరణలు ఉన్నాయి. ఒక్క చిన్న మాట కూడా రాజకీయ జీవితానికే ముప్పుగా మారిన సందర్భాలు మనకు తెలుసు. అందుకే ప్రజాజీవితంలో ఉన్న నాయకులు ప్రజలతో మాట్లాడేటప్పుడు అయినా, పార్టీ కార్యకర్తలతో సంభాషించేటప్పుడు అయినా ఎంతో ఆచితూచి వ్యవహరించాల్సి ఉంటుంది. భావోద్వేగంతో చేసిన వ్యాఖ్యలు, ఆవేశంలో వచ్చిన మాటలు చివరకు పెద్ద సమస్యలకే దారి తీస్తాయి. ఎంతటి అనుభవం ఉన్న నాయకుడైనా మాటల విషయంలో జాగ్రత్తగా లేకపోతే విమర్శలకు గురికాక తప్పదు.

ఇటీవల కర్నూలు జిల్లా (Kurnool District)కు చెందిన టీడీపీ (TDP ) నేత, మంత్రి టీజీ భరత్‌ (TG Bharath) చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి. ఆయన మాట్లాడుతూ, “నేను స్కెచ్ వేస్తే ఎవరూ తట్టుకోలేరు, నా స్ట్రాటజీ మీకు తెలియదు” అంటూ కర్నూలు జిల్లాలోని టీడీపీ ఎమ్మెల్యేలకు హెచ్చరిక చేసిన వీడియో సోషల్ మీడియాలో వైరల్ అయింది. అంతేకాదు, ఎమ్మెల్యేలు తనతో రాజకీయాలు చేసి విసిగించవద్దని కూడా ఆయన చెప్పినట్టు తెలుస్తోంది. ఇప్పటివరకు తాను ఏ ఎమ్మెల్యే నియోజకవర్గంలోనూ జోక్యం చేసుకోలేదని, తనపై అనవసర ఆరోపణలు చేయవద్దని ఆయన స్పష్టం చేశారు.

తనకు మంత్రి పదవి వచ్చిన తర్వాత పెద్దగా రాజకీయాల్లో జోక్యం చేసుకోలేదని, ఈ విషయాన్ని అందరూ గుర్తించాలన్న ఉద్దేశంతోనే ఆ వ్యాఖ్యలు చేసినట్టు భరత్ పేర్కొన్నారు. అయితే, “ఈ ఐదేళ్లే కాదు, టీడీపీ ఉన్నంతవరకు తానే మంత్రి” అని ఆయన చేసిన వ్యాఖ్యలు పార్టీలో కలకలం రేపాయి. ఈ మాటలు కొందరు సీనియర్ నేతలకు అసహనం కలిగించినట్టు సమాచారం. పార్టీ అనేది వ్యక్తులకంటే పెద్దదని, పదవులు శాశ్వతం కావని పలువురు నేతలు అంతర్గతంగా వ్యాఖ్యానిస్తున్నట్లు తెలుస్తోంది.

తనపై ఎవరెన్ని మాటలు చెప్పినా పార్టీ అధినేత చంద్రబాబు నాయుడు‌ (N. Chandrababu Naidu), నారా లోకేశ్‌ (Nara Lokesh) తన గురించి పూర్తిగా తెలుసని, వారి అభిప్రాయం మారదని భరత్ ధీమా వ్యక్తం చేశారు. అయితే, కొందరు ఎమ్మెల్యేలు భరత్‌పై అసంతృప్తితో అధిష్టానం వద్ద మాట్లాడుతున్నారన్న ప్రచారం కూడా వినిపిస్తోంది. ఈ నేపథ్యాన్ని దృష్టిలో పెట్టుకుని భరత్ ఈ తరహా హెచ్చరికలతో మాట్లాడినట్టు రాజకీయ విశ్లేషకులు భావిస్తున్నారు.

అయితే, హెచ్చరికల శైలి, తన పదవిపై చేసిన వ్యాఖ్యలు ఆయనను కొంత ఇబ్బందిలోకి నెట్టినట్టుగా కనిపిస్తోంది. రాజకీయాల్లో మాటల ప్రభావం ఎంత బలంగా ఉంటుందో మరోసారి ఈ పరిణామాలు చూపిస్తున్నాయి. పార్టీ ప్రయోజనం, ఐక్యతను దృష్టిలో పెట్టుకుని నేతలు సంయమనం పాటిస్తేనే ఇలాంటి వివాదాలు దూరంగా ఉంటాయన్న అభిప్రాయం రాజకీయ వర్గాల్లో వ్యక్తమవుతోంది. పైగా చంద్రబాబు ఇటువంటి మాటలకు పూర్తిగా విరుద్ధం అన్న విషయాన్ని భరత్ మర్చిపోయారని పార్టీ శ్రేణులు భావిస్తున్నాయి.