B.Tech Ravi: వైఎస్సార్ కంచుకోటలో టీడీపీ వ్యూహం ..జగన్‌కు పెరుగుతున్న ప్రెషర్..

ఆంధ్రప్రదేశ్ (Andhra Pradesh) రాజకీయ చరిత్రలో పులివెందుల (Pulivendula) ఒక ప్రత్యేక స్థానం సంపాదించుకుంది. ఈ నియోజకవర్గం పేరు వినగానే పాలిటికల్ సెన్సేషన్స్ గుర్తుకు వస్తాయి. దాదాపు యాభై సంవత్సరాలుగా ఒకే కుటుంబం ఆధిపత్యం కొనసాగించడం పులివెందులను ప్రత్యేకంగా నిలిపింది. వైఎస్సార్ కుటుంబం కోసం ఈ ప్రాంతం ఒక గట్టి బలంగా నిలిచింది. ముఖ్యమంత్రులుగా డాక్టర్ వై.ఎస్. రాజశేఖర రెడ్డి (Y.S. Rajasekhara Reddy), జగన్ మోహన్ రెడ్డి (Jagan Mohan Reddy) ఎదిగారు. విజయమ్మ (Vijayamma) ఎమ్మెల్యేగా, వివేకానందరెడ్డి (Vivekananda Reddy) మంత్రిగా పనిచేశారు. జగన్ కూడా ఇక్కడి నుంచే రెండు సార్లు ఎంపీగా ఎన్నికయ్యారు.

ఇటీవలి కాలంలో అయితే పరిస్థితులు మారుతున్నాయి. పులివెందులలో కూటమి ప్రభావం పెరుగుతోందని రాజకీయ వర్గాల్లో మాటలు వినిపిస్తున్నాయి. ఇటీవల జరిగిన జెడ్పీటీసీ ఉప ఎన్నికల్లో వైసీపీ (YCP) ఓటమి పాలై డిపాజిట్లు కూడా కోల్పోవడం పెద్ద షాక్‌గా మారింది. వైఎస్సార్ కుటుంబ గడ్డలో ఇది జరగడం వైసీపీకి మచ్చగా మారింది.

ఈ మార్పుల వెనక బలమైన వ్యక్తి మారెడ్డి రవీంద్రనాథ్ రెడ్డి అలియాస్ బీటెక్ రవి (B.Tech Ravi) అని చెబుతున్నారు. ఆయన తెలుగుదేశం పార్టీ (TDP)లో 2011లో చేరారు. అప్పట్లో విజయమ్మకు వ్యతిరేకంగా పోటీ చేసి గెలవలేకపోయినా, తన కృషి, పట్టుదలతో హైకమాండ్‌ను ఆకట్టుకున్నారు. అనంతరం రెండు సార్లు ఎమ్మెల్యే టికెట్, ఎమ్మెల్సీ అవకాశం కూడా దక్కించుకున్నారు. గతంలో వివేకానందరెడ్డిని ఓడించడం ఆయన రాజకీయ ప్రయాణంలో ఒక కీలక మలుపు. తాజాగా ఆయన భార్య జెడ్పీటీసీ ఉప ఎన్నికల్లో సాధించిన విజయం కూటమి శ్రేణుల్లో ఉత్సాహాన్ని నింపింది.

టీడీపీ శ్రేణుల ప్రకారం రవికి భవిష్యత్‌లో మరింత పెద్ద అవకాశాలు ఎదురవుతున్నాయి. పార్టీ అధినాయకులు చంద్రబాబు (Chandrababu) , లోకేష్ (Lokesh) ఆయన పనితీరు పట్ల సంతృప్తిగా ఉన్నారని చెబుతున్నారు. అందుకే తొందరలో ఖాళీ కానున్న ఎమ్మెల్సీ సీటును రవికి ఇచ్చి, ఆ తర్వాత మంత్రి పదవి ఇవ్వాలని ఆలోచనలో ఉన్నారని సమాచారం.

ప్రస్తుతం కడప (Kadapa) జిల్లాకు చెందిన మంత్రి మండిపల్లి రాం ప్రసాద్ రెడ్డి (Mandipalli Ram Prasad Reddy) పనితీరుపై పార్టీ లోపల సంతృప్తి లేదనే అభిప్రాయం వినిపిస్తోంది. కడప నుంచి మంత్రి అంటే వైసీపీని గట్టిగా ఎదుర్కోవాలి కానీ ఆయన దూకుడు తగ్గిందని చెప్పుకుంటున్నారు. ఈ నేపథ్యంలో వైఎస్సార్ కుటుంబం బలమైన పులివెందులలోనే బీటెక్ రవిని మంత్రి చేయడం ద్వారా ప్రత్యక్షంగా జగన్‌పై ఒత్తిడి పెంచాలన్న వ్యూహం టీడీపీ ఆలోచనలో ఉందని అంటున్నారు.

ఇప్పటిదాకా పులివెందుల నుంచి మంత్రి పదవి పొందినవారు వైఎస్సార్ కుటుంబ సభ్యులే. కానీ బీటెక్ రవికి అవకాశం దొరికితే అది ఒక కొత్త చరిత్ర అవుతుంది. ఆయన అధికారంతో పసుపు జెండా పులివెందులలో మరింత బలపడుతుందని పార్టీ నేతలు నమ్ముతున్నారు. జగన్ స్వయంగా ఎమ్మెల్యేగా ఉన్న ఇలాకాలో రవి మంత్రి అయితే ఎదురుపోరు ఎలా ఉండబోతుందన్నది ఇప్పుడు రాజకీయ వర్గాల్లో ఆసక్తికరమైన చర్చగా మారింది.