AP Government: ఏపీ అసెంబ్లీ శీతాకాల సమావేశాలపై సస్పెన్స్..కూటమి మౌనం..

ఆంధ్రప్రదేశ్‌ (Andhra Pradesh) అసెంబ్లీ (Assembly) శీతాకాల సమావేశాలపై స్పష్టత రావాల్సిన సమయం దాటిపోతోందన్న చర్చ రాజకీయ వర్గాల్లో బలంగా వినిపిస్తోంది. సాధారణంగా నవంబరు నుంచి జనవరి మధ్య కాలాన్ని శీతాకాల సమావేశాల కోసం కేటాయిస్తారు. నిబంధనల ప్రకారం జనవరి 25లోగా అసెంబ్లీ సమావేశాలు నిర్వహించాల్సి ఉంటుంది. ఈ నేపథ్యంలో డిసెంబరులోనే సభ జరగవచ్చని కొద్ది రోజుల క్రితం ప్రభుత్వ వర్గాల నుంచి సంకేతాలు వెలువడ్డాయి. ఈ విషయంపై స్పీకర్ అయ్యన్న పాత్రుడు (Ayyanna Patrudu) కూడా ప్రాథమికంగా కసరత్తు చేసినట్టు సమాచారం. అయితే ఆ తర్వాత అకస్మాత్తుగా ఈ అంశంపై నిశ్శబ్దం నెలకొంది.

ఇతర రాష్ట్రాల పరిస్థితిని పరిశీలిస్తే దేశవ్యాప్తంగా దాదాపు అన్ని రాష్ట్రాల్లో శీతాకాల సమావేశాలు ఇప్పటికే జరిగాయి లేదా ముగింపు దశకు చేరాయి. కానీ ఏపీ విషయంలో మాత్రం నేతలు, ప్రభుత్వం, స్పీకర్ స్థాయి నుంచి ఇప్పటివరకు స్పష్టమైన ప్రకటన లేకపోవడం ఆసక్తిని రేపుతోంది. దీంతో అసలు ఈ సమావేశాలు జరుగుతాయా లేదా అన్న అనుమానాలు తలెత్తుతున్నాయి. అసెంబ్లీ వర్గాల్లోనూ ఇదే అంశంపై చర్చ నడుస్తోంది.

అధికారులు మాత్రం శీతాకాల సమావేశాలు జరుగుతాయని చెబుతున్నారు. అయితే అవి పూర్తి స్థాయిలో కాకుండా మూడు నుంచి నాలుగు రోజుల పాటు మాత్రమే నిర్వహించే అవకాశం ఉందని పేర్కొంటున్నారు. అయినా ఇప్పటివరకు ఆ దిశగా అధికారిక అడుగులు పడకపోవడం గమనార్హం. సాధారణంగా శాసనసభ సమావేశాల కోసం ముందుగానే తేదీలు ఖరారు చేసి, సభ్యులకు సమాచారం అందిస్తారు. కానీ ఈసారి అలాంటి ప్రక్రియ కనిపించడం లేదన్న అభిప్రాయం వ్యక్తమవుతోంది.

వాస్తవానికి ఈ శీతాకాల సమావేశాల్లో ఆమోదించాల్సిన కీలక బిల్లులు అనేకం ఉన్నాయి. ముఖ్యంగా గ్రీన్ ఎనర్జీ (Green Energy)కు సంబంధించిన విధాన నిర్ణయాలు, అమరావతి (Amaravati) ప్రాంతంలో అదనంగా 44 వేల ఎకరాల భూ సమీకరణ అంశం ప్రధానంగా ఉన్నాయి. వీటితో పాటు కేంద్ర ప్రభుత్వం నుంచి రావాల్సిన నిధులు, ఏపీ రాజధానికి శాశ్వత హోదా కల్పించే అంశంపై కూడా చర్చ జరపాల్సిన అవసరం ఉందని ప్రభుత్వ వర్గాలు చెబుతున్నాయి. ఈ కారణాల వల్ల శీతాకాల సమావేశాలకు ప్రాధాన్యం ఏర్పడింది.

ఇప్పటివరకు అసెంబ్లీపై ఎలాంటి కదలికలు లేకపోవడం, మరోవైపు జనవరి 25 గడువు దగ్గర పడుతుండటంతో ఈ నెల రెండో వారంలో నిర్ణయం తీసుకునే అవకాశం ఉందని అంచనా వేస్తున్నారు. అయితే అదే సమయంలో సంక్రాంతి పండుగ సెలవులు (Sankranti Holidays) ఉండటంతో సమావేశాల వ్యవధి తగ్గే అవకాశముందని అధికారులు అంటున్నారు. ఒకవేళ సమావేశాలు నిర్వహించినా, అవి ఆరు నుంచి ఎనిమిది రోజుల్లో ముగిసే వీలుందని సమాచారం. మొత్తానికి ఏపీ శీతాకాల సమావేశాల నిర్వహణపై ఇప్పుడంతా ఉత్కంఠ నెలకొంది. ఒకవేళ ఈసారి సమావేశాలు జరగకపోతే, అది చరిత్రలో తొలిసారి అవుతుందని అధికార వర్గాలు పేర్కొంటున్నాయి. ఈ నేపథ్యంలో ప్రభుత్వం ఎలాంటి నిర్ణయం తీసుకుంటుందన్నది రాజకీయంగా కీలకంగా మారింది.