Pawan Kalyan: పవన్ సవాల్ కు లోకేష్ సై – కోటి మొక్కలతో ప్రభుత్వ లక్ష్యం

ఏపీలో కూటమి ప్రభుత్వం బాధ్యతలు చేపట్టిన తర్వాత కేంద్రంకు, రాష్ట్రంకు మధ్య మంచి సంబంధాలు నెలకొన్నాయి. ఒకవైపు కేంద్ర ప్రభుత్వం రాష్ట్రానికి అవసరమైన సహాయాన్ని అందిస్తుండగా, రాష్ట్రం నుంచి కూడా కేంద్రానికి పూర్తి మద్దతు లభిస్తోంది. రాజకీయ పార్టీల మధ్య అవగాహన, అనుబంధం కొనసాగుతోంది. ఇటువంటి సందర్భంలో ప్రధాని నరేంద్ర మోదీ (Narendra Modi) ఇచ్చిన పర్యావరణ టాస్క్‌కి జనసేన అధినేత పవన్ కల్యాణ్ (Pawan Kalyan) ఇచ్చిన సవాల్‌కు టీడీపీ యువనేత నారా లోకేష్ (Nara Lokesh) ధైర్యంగా స్పందించారు.

ఈ రోజు ఆంధ్రప్రదేశ్‌లోని ప్రభుత్వ, ప్రైవేట్ పాఠశాలల్లో “పేరెంట్స్ టీచర్స్ మీటింగ్ 2.0” జరిగిందన్న విషయం తెలిసిందే. ఈ సందర్భాన్ని పురస్కరించుకొని శ్రీసత్యసాయి జిల్లా కొత్తచెరువు (Kothacheruvu, Sri Sathya Sai District) వద్ద నిర్వహించిన సమావేశానికి ముఖ్యమంత్రి నారా చంద్రబాబు నాయుడు (N. Chandrababu Naidu)తో పాటు విద్యాశాఖ మంత్రి లోకేష్ కూడా హాజరయ్యారు. ఈ సందర్బంగా మాట్లాడుతూ లోకేష్ ఈ విషయం పై స్పందించారు.

విద్యా ప్రాధాన్యత గురించి మాట్లాడుతూ, ప్రతి ఒక్కరి విజయానికి బలమైన పునాది తరగతి గదిలో వేసిన గురువులదేనని తెలిపారు. గురువు చెప్పే జీవన బోధనలు మన జీవితాన్ని మారుస్తాయని అభిప్రాయపడ్డారు. అలాగే మన జీవితానికి తొలి ఉపాధ్యాయురాలు అయిన తల్లి నుండి మనం బాధ్యతలు, నడక నేర్చుకుంటామని పేర్కొన్నారు. తల్లికి గౌరవం తెలియజేయాలనే ఉద్దేశంతో “తల్లికి వందనం” కార్యక్రమం కొనసాగుతున్నదన్నారు. పదో తరగతి మరియు ఇంటర్మీడియట్ విద్యార్థుల ఫలితాలు ప్రభుత్వ పాఠశాలల అభివృద్ధిని చూపిస్తున్నాయని తెలిపారు.

అలాగే పాఠశాలల్లో రాజకీయాలకు తావు లేదని, రాష్ట్రవ్యాప్తంగా ఒకే రోజున పేరెంట్స్ టీచర్స్ మీటింగ్ జరగడం ద్వారా విద్యా రంగంలో సమగ్ర దృష్టిని ఏర్పరిచే ప్రయత్నం చేస్తున్నట్లు పేర్కొన్నారు. ప్రైవేట్ పాఠశాలలకు పోటీగా ప్రభుత్వ పాఠశాలలు అభివృద్ధి చెందుతున్నాయన్నారు. విద్యతో పాటు ఆటలు, పాటలు, యోగా వంటి ఇతర అంశాలపై కూడా శిక్షణ ఇస్తున్నామని వివరించారు.

ఇక మోదీ పిలుపు మేరకు “అమ్మ” పేరుతో మొక్కలు నాటే కార్యక్రమాన్ని పవన్ కల్యాణ్ సవాలుగా ప్రకటించారని, దానిని తానే స్వీకరిస్తున్నట్లు లోకేష్ ప్రకటించారు. రాష్ట్రంలో కోటి మొక్కలు నాటాలని విద్యాశాఖ ఆధ్వర్యంలో చర్యలు తీసుకుంటామని తెలిపారు. ఈ ప్రకటనతో కూటమి పార్టీల మధ్య సహకారం, ఆరోగ్యకరమైన పోటీ, ప్రజాస్వామ్య పద్ధతిలో పాలన సాగుతుందని విశ్లేషకులు అభిప్రాయపడుతున్నారు.