Jagan: జగన్ బంగారుపాళ్యం పర్యటన: రైతులకు భరోసానా లేక బల ప్రదర్శనా?

వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి జగన్ మోహన్ రెడ్డి (Jagan Mohan Reddy) ఇటీవల చిత్తూరు జిల్లా బంగారు పాళ్యం (Bangaru Palem ప్రాంతానికి చేసిన పర్యటన రాజకీయంగా చర్చనీయాంశంగా మారింది. గత కొన్ని నెలలుగా మామిడి రైతులు ఎదుర్కొంటున్న ధరల సమస్యపై ఈ పర్యటనపై ప్రశ్నలు తలెత్తుతున్నాయి. రైతులకు నిజంగా మేలు జరిగిందా? లేక పార్టీ శక్తిని చూపించడానికే ఈ పర్యటన జరిగినదా అన్నదే ప్రస్తుతం అందరిలో చర్చకు దారి తీస్తోంది.

మామిడి రైతులకు సరైన ధరలు లభించకపోవడం ఇదే మొదటిసారి కాదు. గత నెల రోజుల క్రితమే పలు మీడియా వేదికలలో రైతుల కష్టాలు వెలుగులోకి వచ్చాయి. రైతులు కిలో మామిడి పండును రూ.1 నుంచి రూ.2కే అమ్ముకోవాల్సిన పరిస్థితి ఎదుర్కొన్నారు. ఈ నేపథ్యంలో రాష్ట్ర ప్రభుత్వం తక్షణమే స్పందించి, మద్దతు ధరగా రూ.4ని ప్రకటించింది. అంతేకాదు, కనీస ధరగా కిలోకు రూ.8కంటే తక్కువకు అమ్మకాలు జరగకూడదని ఆదేశాలిచ్చింది. కేంద్ర ప్రభుత్వానికి సహకారం కోసం సీఎం చంద్రబాబు నాయుడు (Chandrababu Naidu) గడచిన నెల 21న లేఖ రాశారు. ఆ తర్వాత రైతులు దాదాపు 90 శాతం దిగుబడి అమ్మేసుకున్నారు.

ఈ వ్యవహారంలో రాష్ట్ర మంత్రి అచ్చెన్నాయుడు (Atchannaidu) కూడా చొరవ చూపి, కేంద్రంతో చర్చలు జరిపారు. మిగిలిన మొత్తాన్ని డైరెక్ట్ బెనిఫిట్ ట్రాన్స్‌ఫర్ (DBT) రూపంలో అందిస్తామన్నారు. ప్రస్తుతం రైతుల దగ్గర మిగిలింది 10 శాతమే. అదే అంశాన్ని తీసుకుని జగన్ బంగారు పాళ్యానికి పర్యటనకు వచ్చారు. అయితే ఇది రైతుల కోసం కాదన్న భావన ఏర్పడింది. ఎందుకంటే అక్కడ రైతులు కన్నా పార్టీ కార్యకర్తలే ఎక్కువగా కనిపించారు. వివిధ ప్రాంతాల నుంచి పెద్ద సంఖ్యలో వైసీపీ నేతలు, కార్యకర్తలు తరలివచ్చారు.

ఈ రద్దీతో అక్కడి ప్రాంతం కిక్కిరిసిపోయింది. పోలీసులకు అదుపులోకి తేవడం కష్టంగా మారింది. కొన్ని చోట్ల పరిస్థితులు అదుపు తప్పి, పోలీసులు లాఠీచార్జ్ చేయాల్సిన స్థితి ఏర్పడింది. అక్కడి నేతలు, కార్యకర్తలపై కేసులు నమోదయ్యాయి. పోలీసులు వ్య‌వ‌హ‌రించిన తీరుపై అధికారులకు వ్యతిరేకంగా చర్యలు తీసుకుంటామ‌ని జిల్లా ఎస్పీ మ‌ణికంఠ (SP Manikantha) హెచ్చరించారు. ఇలాంటి పరిస్థితుల్లో జగన్ పర్యటన వల్ల రైతులకు లాభం కలిగిందా? లేక తమ కార్యకర్తలను సమస్యల్లో నెట్టినట్టయిందా? అనే చర్చే ఎక్కువగా వినిపిస్తోంది. రైతులకు మద్దతుగా నిలబడాల్సిన సమయంలో పార్టీ అధికారాన్ని చూపించడమే ఎక్కువగా కనిపించిందన్న విమర్శలు బలంగా వినిపిస్తున్నాయి.