Jagan: గత అనుభవంతో వారసులకు నో అంటున్న జగన్..

వైఎస్ జగన్ మోహన్ రెడ్డి (Y. S. Jagan Mohan Reddy) నేతృత్వంలోని వైఎస్సార్ కాంగ్రెస్ పార్టీ (YSRCP)లో కీలక మార్పులు జరిగే అవకాశం కనిపిస్తోంది. 2024 అసెంబ్లీ ఎన్నికల్లో పార్టీకి ఎదురైన ఊహించని పరాజయం తర్వాత, జగన్ పరిస్థితిని గంభీరంగా విశ్లేషిస్తున్నట్లు సమాచారం. గతంలో ఎన్నో సంక్షేమ పథకాల అమలు, ప్రజల్లో ఉన్న మద్దతు ఆధారంగా జగన్ 175 సీట్లకు పోటీ చేసి, తాను నిర్ణయించిన అభ్యర్థులు పార్టీ గుర్తుతో గెలుస్తారని ఆశించారు. ఈ ధీమాతో కొన్ని చోట్ల అనుభవం లేని వారికీ, వారసులకూ టికెట్లు ఇచ్చారు. మచిలీపట్నం (Machilipatnam) నుంచి పేర్ని నాని కుమారుడు పేర్ని కిట్టు (Perini Kittu), తిరుపతి (Tirupati) నుంచి భూమా అభినయ రెడ్డి (Bhuma Abhinaya Reddy), చంద్రగిరి (Chandragiri) నుంచి చెవిరెడ్డి మోహిత్ రెడ్డి (Chevireddy Mohith Reddy) వంటి వారసులకూ అవకాశం ఇచ్చారు. అయితే ప్రజలు వారి వెనుక నిలవలేదు. ఫలితంగా పార్టీ 151 స్థానాల నుంచి కేవలం 11 సీట్లు మాత్రమే గెలవడం అందర్నీ షాక్‌కు గురిచేసింది.

ఈ ఘోర పరాజయం తర్వాత జగన్ తన నిర్ణయాలపై తిరిగి ఆలోచించాల్సి వచ్చింది. కూటమి ప్రభుత్వానికి ఏడాది పూర్తవుతున్న వేళ ఆయన పార్టీ మళ్ళీ నిలదొక్కుకునే ప్రయత్నాలు ముమ్మరం చేస్తున్నారు. జిల్లాల వారీగా టూర్లు పెంచడం, పార్టీ సమావేశాలు నిర్వహించడం, ప్రజా సమస్యలపై ఆందోళనలు చేయడం వంటి కార్యక్రమాలతో ఆయన బిజీగా ఉన్నారు. ఇక వచ్చే ఎన్నికలు వైసీపీకి జీవన్మరణ అంశంగా మారాయి. ఒక్క చెడు నిర్ణయం తీసుకుంటే పార్టీ భవిష్యత్తే సంక్షోభంలోకి వెళ్లే పరిస్థితి ఉంది. అందుకే జగన్ చాలా జాగ్రత్తగా అడుగులు వేస్తున్నారు.

ఇప్పటి నుంచే ఆయన అభ్యర్థుల ఎంపికలో మార్పులు చేపడుతున్నట్లు తెలుస్తోంది. ఈసారి అనుభవజ్ఞులు, ప్రజల్లో గుర్తింపు ఉన్నవారికే అవకాశం ఇవ్వాలని భావిస్తున్నారు. పార్టీని కష్టకాలంలో నిలబెట్టినవారికే టికెట్లు ఇవ్వాలని నిర్ణయించినట్టు ప్రచారం జరుగుతోంది. అదే సమయంలో ప్రయోగాలకు తావు లేదని స్పష్టం చేస్తున్నారు. 2024లో జరిగిన తడబాట్లను పునరావృతం చేయకూడదనే ఉద్దేశంతో వారసులకు టికెట్లు ఇవ్వడాన్ని పూర్తిగా మానేయాలనే దిశగా జగన్ ముందుకెళ్తున్నారు.

ఈసారి స్థానిక నేతలు తమ పిల్లలకు టికెట్లు కోరినా.. అది కుదిరేలా కనిపించడం లేదని, తామే బరిలోకి దిగేందుకు సిద్ధంగా ఉండాలని అధినాయకత్వం సూచిస్తోందని సమాచారం. ప్రజల్లో ఉండే, కేసులకు భయపడని, పార్టీకి అండగా నిలిచే వారికే ఈసారి అధిక ప్రాధాన్యం ఇచ్చే అవకాశం ఉంది. మొత్తం మీద వైసీపీ పూర్తిగా కొత్త ఆలోచనలతో, స్పష్టమైన వ్యూహంతో ముందుకు సాగుతుందని రాజకీయ పరిశీలకులు భావిస్తున్నారు.