Jagan: ఏపీలో కాపుల మద్దతు కోసం వైసీపీ ప్రణాళికలు..గోదావరి రాజకీయలలో కొత్త మలుపు సాధ్యమా?

ఆంధ్రప్రదేశ్‌ (Andhra Pradesh) రాష్ట్రంలో రాజకీయ వాతావరణం ఎప్పటికప్పుడు మారుతూ ఉంటుంది. ప్రతి ఎన్నికకు ఓ వైవిధ్యం కనిపిస్తూ ఉంటుంది. భావోద్వేగాలు, జాతి సామాజిక వర్గాల ప్రభావం వల్ల ఫలితాలు ఆశించిన దిశకు భిన్నంగా మారిపోతాయి. అయితే వచ్చిన విజయాలను సరిగ్గా నిలబెట్టుకుని ముందుకు సాగితే పార్టీకి బలమైన భవిష్యత్తు ఉంటుంది. లేదంటే ప్రజల్లో తిరుగుబాటు వాతావరణం ఏర్పడుతుంది.

ఈ నేపథ్యంలో గోదావరి జిల్లాల (Godavari districts) ప్రాధాన్యత మరింత పెరుగుతోంది. రాష్ట్ర రాజకీయాల దిశను నిర్ణయించేది ఈ ప్రాంతమే అన్న అభిప్రాయం ఎన్నోసార్లు నిజం అయింది. 2024 ఎన్నికల్లో టీడీపీ (TDP), జనసేన (Jana Sena) కూటమికి వచ్చిన ఘన విజయం వెనుక కూడా ఈ జిల్లాల ప్రభావమే ఉన్నట్లు స్పష్టమైంది. పవన్ కళ్యాణ్ (Pawan Kalyan) చేపట్టిన వారాహి యాత్రల సమయంలో చేసిన ‘వైసీపీ (YSRCP)కి ఒక్క సీటూ రావద్దు’ అన్న వ్యాఖ్యలు ప్రజలపై బలమైన ప్రభావం చూపించాయి. ఫలితంగా ఆ ప్రాంతంలో అధికార పార్టీకి పట్టం దక్కలేదు.

ఇప్పటికీ వాతావరణం మాత్రం పూర్తిగా ఒకేలా ఉందా అంటే, కాస్త మార్పు కనిపిస్తోంది. ముఖ్యంగా జనసేనకు అగ్ర భాగస్వామ్యం ఉన్నప్పటికీ, పవన్ కళ్యాణ్‌కు ఉప ముఖ్యమంత్రి పదవే దక్కింది. ఇది చూసి ఆయనకు మద్దతుగా నిలిచిన కీలక సామాజిక వర్గం కొంత అయోమయంలో పడింది. గతంలో ఈ పదవిని అదే వర్గానికి చెందిన పలువురు నేతలు చేపట్టిన నేపథ్యంలో, ఇది అంత ప్రత్యేకత కలిగిన విషయమేమీ కాదని కొందరికి భావన కలుగుతోంది. పైగా పవన్ ప్రకటించిన “చంద్రబాబు (Chandrababu Naidu) మళ్లీ పదిహేను ఏళ్లు సీఎం” అన్న మాటలు కూడా ఆ వర్గాన్ని ఆలోచనల్లో నింపుతున్నాయి.

ఇక కూటమిలో మూడు పార్టీలు ఉండటంతో, కొంతమందికి మంత్రివర్గంలో చోటు దక్కడం కష్టంగా మారింది. ఈ పరిస్థితుల్లో, మిగిలిన అవకాశాలను పరిశీలిస్తున్నవారు కొందరు వైసీపీ వైపు చూస్తున్నప్పటికీ.. ఎందుకో వెనకాడుతున్నారు. జగన్ (Y. S. Jagan Mohan Reddy) కూడా దీనిని గమనించి, గోదావరి జిల్లాల్లో కాపు వర్గానికి ప్రాధాన్యత ఇచ్చేందుకు ప్రయత్నాలు ప్రారంభించారు. బొత్స సత్యనారాయణ (Botcha Satyanarayana)కు రీజనల్ కోఆర్డినేటర్ బాధ్యతలు అప్పగించడం ద్వారా ఆ ప్రాంతంపై దృష్టి పెట్టినట్లు తెలుస్తోంది. ఈ పరిణామాలన్నింటినీ గమనిస్తే, గోదావరి తీరంలో మళ్లీ వైసీపీ పునరుద్ధరణకు అవకాశం ఉందనే అభిప్రాయం వినిపిస్తోంది. అయితే ఈసారి జగన్ ఈ ఛాన్స్ ను కరెక్ట్ గా వాడుకుంటే పార్టీ విజయానికి దారి తీస్తుంది. చూడాలి మరి, రానున్న రోజుల్లో గోదావరి జిల్లాలు ఏ పార్టీకి గాలి కల్పిస్తాయో.