TDP: ఏపీ నుంచి నాలుగు రాజ్యసభ సీట్లు ఖాళీ..వైసీపీ బలం తగ్గి కూటమి పట్టు బలపడేనా?

ఈ ఏడాది రాజకీయంగా ఆంధ్రప్రదేశ్‌ (Andhra Pradesh)కు అత్యంత కీలకమైన సంవత్సరంగా మారనుందని రాజకీయ వర్గాలు భావిస్తున్నాయి. కారణం రాజ్యసభ (Rajya Sabha) ఎన్నికలు , పదవీ విరమణలు. రెండేళ్లకోసారి జరిగే ఈ ప్రక్రియలో భాగంగా ఈసారి దేశవ్యాప్తంగా 73 మంది రాజ్యసభ సభ్యులు పదవీకాలం పూర్తి చేసి నిష్క్రమించనున్నారు. అయితే ఈ మొత్తం పరిణామాల్లో ఆంధ్రప్రదేశ్‌పై ప్రత్యేక దృష్టి పడుతోంది.

ఏపీ నుంచి ఈ ఏడాది మొత్తం నాలుగు రాజ్యసభ సీట్లు ఖాళీ కానున్నాయి. వైసీపీ (YSR Congress Party) నుంచి ముగ్గురు ఎంపీలు జూన్‌లో రిటైర్ అవుతున్నారు. వారు అయోధ్య రామిరెడ్డి (Ayodhya Rami Reddy), పరిమళ్ సత్వానీ (Parimal Nathwani), పిల్లి సుభాష్ చంద్రబోస్ (Pilli Subhash Chandra Bose). అదే సమయంలో టీడీపీ (Telugu Desam Party) తరఫున రాజ్యసభ సభ్యుడిగా ఉన్న సానా సతీశ్ (Sana Satish) కూడా పదవీకాలం పూర్తి చేసుకుంటున్నారు. దీనితో ఏపీ రాజకీయాల్లో రాజ్యసభ సమీకరణలు పూర్తిగా మారే పరిస్థితి కనిపిస్తోంది.

ఇప్పటికే వైసీపీకి రాజ్యసభలో గట్టి ఎదురుదెబ్బ తగిలిన సంగతి తెలిసిందే. గతంలో నలుగురు ఎంపీలు పార్టీకి రాజీనామా చేయడంతో వైసీపీ బలం భారీగా తగ్గింది. ఇప్పుడు ముగ్గురు సభ్యులు పదవీ విరమణ చేయడంతో వైసీపీ రాజ్యసభ బలం నాలుగుకు పడిపోయే పరిస్థితి ఏర్పడింది. ఒకప్పుడు ఏపీ నుంచి రాజ్యసభలో ఆధిపత్యం చూపిన వైసీపీకి ఇది గణనీయమైన మార్పుగా రాజకీయ విశ్లేషకులు చెబుతున్నారు.

ఇదే సమయంలో టీడీపీ(TDP) –జనసేన (Janasena) –బీజేపీ (BJP)కూటమి కు పరిస్థితులు అనుకూలంగా మారుతున్నాయి. ఖాళీ కానున్న నాలుగు రాజ్యసభ సీట్లు కూటమికే దక్కే అవకాశాలు దాదాపు ఖరారైనట్లు సమాచారం. అసెంబ్లీలో ఉన్న సంఖ్యాబలం కారణంగా ఈ సీట్లపై కూటమికి పూర్తి ఆధిక్యం ఉంది. దీంతో ఏపీ నుంచి రాజ్యసభలో కూటమి బలం ఏడు వరకు పెరిగే అవకాశం ఉందని అంచనా వేస్తున్నారు.

రాజ్యసభకు కూటమి తరఫున టికెట్లు ఎవరికి దక్కుతాయన్న అంశంపై ఇప్పటికే లోపల పోటీ మొదలైనట్లు తెలుస్తోంది. టీడీపీ , జనసేన , బీజేపీల నుంచి ఆశావహులు ఎక్కువగా ఉండటంతో అభ్యర్థుల ఎంపికపై ఉత్కంఠ నెలకొంది. అయితే ఎవరు పోటీ చేసినా ఎంపీలు మాత్రం కూటమి నుంచే వెళ్లడం ఖాయమని రాజకీయ వర్గాలు స్పష్టం చేస్తున్నాయి.

జాతీయ స్థాయిలో కూడా పలువురు సీనియర్ నేతలు ఈ ఏడాది రిటైర్ అవుతున్నప్పటికీ, ఏపీ రాజకీయాలపై వాటి ప్రభావం పరిమితంగానే ఉంటుందని అంటున్నారు. అయితే బీజేపీ ఎన్డీయే (NDA) అధికారంలో ఉన్న రాష్ట్రాలు ఎక్కువగా ఉండటంతో రాజ్యసభలో వారి బలం పెరిగే అవకాశం ఉంది. దాని ప్రభావం పరోక్షంగా ఆంధ్రప్రదేశ్ రాజకీయాలపైనా కనిపించే సూచనలు ఉన్నాయి.

మొత్తంగా చూస్తే, ఈ ఏడాది రాజ్యసభ ఎన్నికలు ఆంధ్రప్రదేశ్ రాజకీయ దిశను కొత్త మలుపు తిప్పే అవకాశాలు స్పష్టంగా కనిపిస్తున్నాయి. వైసీపీకి బలం తగ్గడం, కూటమికి ఆధిక్యం పెరగడం రాష్ట్ర రాజకీయాల్లో కొత్త సమీకరణలకు దారి తీస్తుందని రాజకీయ పరిశీలకులు అభిప్రాయపడుతున్నారు.