Chandrababu: అభివృద్ధి వాదం వర్సెస్ అరాచక రాజకీయాలు..జగన్‌పై చంద్రబాబు తీవ్ర విమర్శలు..

వైసీపీ అధినేత వైఎస్ జగన్ మోహన్ రెడ్డి (Y. S. Jagan Mohan Reddy)పై ముఖ్యమంత్రి చంద్రబాబు నాయుడు (N. Chandrababu Naidu) తీవ్ర స్థాయిలో విమర్శలు గుప్పించారు. రాష్ట్ర అభివృద్ధి కోసం కూటమి ప్రభుత్వం ముందుకు సాగుతుంటే, దాన్ని అడ్డుకునే కుట్రలు జరుగుతున్నాయని ఆయన మండిపడ్డారు. ఏపీలో ఒకవైపు అభివృద్ధి వాదం ఉంటే, మరోవైపు అరాచక రాజకీయాలు కొనసాగుతున్నాయని ఆయన వ్యాఖ్యానించారు. వైసీపీ పాలనలో రాష్ట్రం ఐదేళ్ల పాటు రాజధాని లేకుండా అయోమయ పరిస్థితుల్లోకి నెట్టబడిందని, ఇప్పుడు అయితే రాజధాని అనే పదమే రాజ్యాంగంలో లేదంటూ కొత్త వాదనలు తెస్తున్నారని బాబు ఆగ్రహం వ్యక్తం చేశారు.

రాజధాని అనే భావనపై జగన్ చేస్తున్న వ్యాఖ్యలను ఎద్దేవా చేస్తూ, తాను ఎక్కడ కూర్చుంటే అదే రాజధాని అన్నట్టు మాట్లాడటం ఏ విధానమని ప్రశ్నించారు. బెంగుళూరు ప్యాలెస్ (Bangalore Palace)లో కూర్చున్నా, ఇడుపులపాయ (Idupulapaya)లో ఉన్నా అదే రాజధానా అని నిలదీశారు. అధికారంలో ఉన్నప్పుడు మూడు రాజధానుల పేరుతో రాష్ట్రాన్ని గందరగోళంలోకి నెట్టారని, ప్రజలు ఎన్నికల్లో గుణపాఠం చెప్పినా ఇంకా ఆ ఆలోచన మారలేదని విమర్శించారు. రాజ్యాంగంలో రాజధాని అనే పదం లేదంటూ మాట్లాడటం హద్దులు దాటిన వ్యవహారమని అన్నారు.

అమరావతి (Amaravati) రాజధానిపై జగన్ చేస్తున్న వ్యాఖ్యలను కూడా చంద్రబాబు తప్పుబట్టారు. నది పక్కన రాజధాని కడుతున్నారని విమర్శించడం అవగాహన లేని మాటలేనని అన్నారు. విజయవాడ (Vijayawada), రాజమండ్రి (Rajahmundry), విశాఖపట్నం (Visakhapatnam) మాత్రమే కాదు, లండన్ (London), చెన్నై (Chennai), ఢిల్లీ (Delhi), ముంబై (Mumbai) వంటి ప్రపంచ స్థాయి నగరాలన్నీ నదుల పక్కనే అభివృద్ధి చెందినవని గుర్తు చేశారు. కనీస అవగాహన లేకుండా రాజకీయాలు చేస్తున్నారని జగన్‌పై తీవ్ర వ్యాఖ్యలు చేశారు.

పీపీపీ విధానంపై కూడా ముఖ్యమంత్రి స్పష్టంగా మాట్లాడారు. ప్రభుత్వం మెడికల్ కాలేజీలను పీపీపీ (PPP) విధానంలో నిర్మిస్తామని చెబితే విమర్శిస్తున్నవారే, భోగాపురం ఎయిర్‌పోర్ట్ (Bhogapuram Airport) పీపీపీ మోడల్‌లో నిర్మితమైతే దానికి క్రెడిట్ తమదేనంటూ చెప్పుకుంటున్నారని ఎద్దేవా చేశారు. రహదారులు, విమానాశ్రయాలు వంటి మౌలిక సదుపాయాలన్నీ పీపీపీ ద్వారానే వస్తున్నాయని గుర్తు చేశారు. ప్రభుత్వం పూర్తి చేస్తే మాత్రం ఆ ఘనత తమ ఖాతాలో వేసుకోవాలన్న ధోరణి సరికాదని అన్నారు.

టీడీపీ కూటమి ప్రభుత్వానికి ప్రజల్లో మంచి పేరు వస్తుండటాన్ని తట్టుకోలేకనే ఇలాంటి ఆరోపణలు చేస్తున్నారని చంద్రబాబు విమర్శించారు. భోగాపురం పీపీపీ అయితే ముద్దుగా కనిపిస్తోందని, అదే విధానంలో మెడికల్ కాలేజీలు కడితే మాత్రం వ్యతిరేకించడం ఏ తత్వమని ప్రశ్నించారు. అభివృద్ధిని అడ్డుకునే రాజకీయాలు రాష్ట్రానికి నష్టం చేస్తాయని, ప్రజలు ఇవన్నీ గమనిస్తున్నారని ఆయన స్పష్టం చేశారు.