Amaravathi: 225 మంది ఎమ్మెల్యేలు లక్ష్యంగా అమరావతిలో చంద్రబాబు అడ్వాన్స్ ప్లానింగ్..

ఆంధ్రప్రదేశ్ రాష్ట్రంలో ప్రస్తుతం శాసనసభ సభ్యుల సంఖ్య 175గా ఉన్నా, భవిష్యత్తులో ఇది 225కి చేరుకోనుందని రాజకీయ వర్గాల్లో చర్చ జరుగుతోంది. అందుకు అవసరమైన ప్రభుత్వ ప్రణాళికలు కూడా ముందుగానే సిద్ధం అవుతున్నాయి. కొన్ని వర్గాల అభిప్రాయం ప్రకారం, అగత్యమైతే రానున్న రెండేళ్లలోనే 225 మంది ఎమ్మెల్యేలు రాష్ట్రానికి కావాల్సిన అవసరం ఏర్పడవచ్చు. ఇదే దృష్టిలో పెట్టుకుని నూతన రాజధాని అమరావతి (Amaravati)లో శాసనసభ్యులకు, శాసన మండలి సభ్యులకు అవసరమైన నివాస సముదాయాలను అధికంగా నిర్మిస్తున్నారు.

ప్రస్తుతం సీఎం చంద్రబాబు నాయుడు (Chandrababu Naidu) తీసుకుంటున్న నిర్ణయాలు ఆయన దూరదృష్టికి నిదర్శనమని చెబుతున్నారు. ఆయన తరచూ భవిష్యత్తును దృష్టిలో పెట్టుకుని ప్రణాళికలు రూపొందిస్తారని ప్రజలు విశ్వసిస్తున్నారు. అమరావతిని కేవలం ఒక రాజధానిగా కాకుండా, దశాబ్దాల పాటు అన్ని అవసరాలను తీర్చగల ఆధునిక నగరంగా తీర్చిదిద్దే దిశగా ఆయన కార్యాచరణ సాగుతోంది. దీని కింద శాసనసభ భవనం అభివృద్ధితో పాటు, సభ్యుల వసతి క్వార్టర్లలో సౌకర్యాలనూ విస్తృతంగా కల్పిస్తున్నారు.

ఈ క్వార్టర్లు భవిష్యత్తులో అసెంబ్లీ నియోజకవర్గాల పునర్విభజన జరిగినా సరిపడే విధంగా నిర్మించబడుతున్నాయి. ఒక్కో MLA, MLC కోసం కేవలం నివాసమే కాదు, వారి కుటుంబాల అవసరాలను దృష్టిలో ఉంచుకుని క్లబ్ హౌస్, స్విమ్మింగ్ పూల్, చిన్న హాస్పిటల్ వంటి సదుపాయాలను ఏర్పాటు చేస్తున్నారు. అంతేకాకుండా పర్యావరణ హితంగా సోలార్ పవర్, రీచార్జ్ పిట్‌లు, వేస్ట్ వాటర్ ట్రీట్‌మెంట్ వంటి సాంకేతికతలు కూడా ఈ ప్రాజెక్టులో భాగమయ్యాయి.

ప్రస్తుతం మొత్తం 12 టవర్లలో 288 క్వార్టర్లు నిర్మాణంలో ఉన్నాయని సమాచారం. ఈ ఏడాది డిసెంబర్ నాటికి అవి పూర్తై ఎమ్మెల్యేలు, ఎమ్మెల్సీలకు అందుబాటులోకి వచ్చే అవకాశం ఉంది. వచ్చే బడ్జెట్ సెషన్‌కు అనుకూలంగా, వారు ఈ క్వార్టర్లలో నివసించే అవకాశముందని ప్రభుత్వ వర్గాలు భావిస్తున్నాయి. మొదటిగా అమరావతిలో స్థిరపడేది ప్రజా ప్రతినిధులే అవుతారని అంటున్నారు. మొత్తం మీద వచ్చే ఆరు నెలల్లో రాజధాని అమరావతి రూపురేఖలు పూర్తిగా మారే అవకాశముందని అధికార వర్గాలు చెబుతున్నాయి. ఇది సీఎం చంద్రబాబు తీసుకున్న మరో విజనరీ అడుగుగా కనిపిస్తోంది.