Chandrababu: పీపీపీపై జగన్ విమర్శలకు చంద్రబాబు కౌంటర్‌… మెడికల్ కాలేజీలపై స్పష్టత

వైసీపీ అధినేత వైఎస్ జగన్‌మోహన్ రెడ్డి (Y. S. Jagan Mohan Reddy)పై ముఖ్యమంత్రి నారా చంద్రబాబు నాయుడు (N. Chandrababu Naidu) మరోసారి ఘాటు వ్యాఖ్యలు చేశారు. ఏపీలో మెడికల్ కాలేజీల అభివృద్ధికి ప్రభుత్వం తీసుకున్న పబ్లిక్ ప్రైవేట్ పార్టనర్‌షిప్ ( PPP) విధానాన్ని వ్యతిరేకిస్తూ వైసీపీ చేస్తున్న రాజకీయాలపై ఆయన అసంతృప్తి వ్యక్తం చేశారు. ఈ అంశాన్ని రాజకీయం చేయడం ప్రజలకు తప్పుదోవ పట్టించడమేనని చంద్రబాబు స్పష్టం చేశారు.

మెడికల్ కాలేజీలను పీపీపీ విధానంలో అభివృద్ధి చేయాలన్న ప్రభుత్వ నిర్ణయంపై వైసీపీ తీవ్ర అభ్యంతరాలు వ్యక్తం చేస్తోంది. కోటి సంతకాల సేకరణ పేరుతో ఉద్యమం చేపట్టి, వాటిని గవర్నర్ (Governor)కు సమర్పించి ఈ విధానాన్ని అడ్డుకోవాలని ప్రయత్నిస్తున్న నేపథ్యంలో సీఎం స్పందించారు. పీపీపీ విధానం అంటే ప్రభుత్వ సంస్థలను ప్రైవేటుపరం చేయడమనే అర్థం కాదని ఆయన స్పష్టంగా చెప్పారు. పీపీపీ ద్వారా నిర్మించినా అవి ప్రభుత్వ మెడికల్ కాలేజీలుగానే కొనసాగుతాయని, వాటి పేర్లు, నిబంధనలు, విధానాలు అన్నీ రాష్ట్ర ప్రభుత్వ నియంత్రణలోనే ఉంటాయని వివరించారు.

కొంతమంది కావాలని వక్రీకరించి మాట్లాడుతున్నారని చంద్రబాబు విమర్శించారు. మెడికల్ కాలేజీలను అమ్మేస్తున్నారన్న ప్రచారం పూర్తిగా రాజకీయ ఉద్దేశంతో చేస్తున్నదేనని ఆయన అన్నారు. పీపీపీ విధానంతో నాణ్యమైన వైద్య సేవలు అందించే అవకాశం ఉంటుందని, మౌలిక సదుపాయాలు వేగంగా అభివృద్ధి చేయవచ్చని చెప్పారు. కేంద్ర ప్రభుత్వం కూడా అనేక రంగాల్లో ఇదే విధానాన్ని అమలు చేస్తోందని ఆయన గుర్తు చేశారు.

ఇదే సమయంలో జగన్ పాలనపై కూడా చంద్రబాబు తీవ్ర విమర్శలు గుప్పించారు. గత ప్రభుత్వ హయాంలో ప్రజాధనాన్ని నిర్లక్ష్యంగా ఖర్చు చేశారని ఆరోపించారు. ఆ నిధులను సక్రమంగా వినియోగించి ఉంటే, ఇప్పుడు పీపీపీ అవసరమే వచ్చేది కాదని వ్యాఖ్యానించారు. విశాఖపట్నంలోని రుషికొండ (Rushikonda, Visakhapatnam)పై సుమారు 550 కోట్ల రూపాయలు ఖర్చు చేసి నిర్మించిన భవనం దీనికి ఉదాహరణగా పేర్కొన్నారు. ఆ మొత్తంతో రెండు లేదా మూడు మెడికల్ కాలేజీలు నిర్మించవచ్చని, కానీ అది ఇప్పుడు ఉపయోగం లేకుండా తెల్ల ఏనుగులా మారిందని విమర్శించారు.

పీపీపీ విధానం వల్ల ప్రజలకు నష్టం కాదని, మేలు జరుగుతుందని చంద్రబాబు స్పష్టం చేశారు. ఆయా మెడికల్ కాలేజీల్లో చదివే విద్యార్థుల్లో 70 శాతం మందికి ఎన్టీఆర్ వైద్య సేవలు (NTR Vaidya Seva) వర్తిస్తాయని చెప్పారు. అలాగే సీట్ల సంఖ్య కూడా పెరిగి, పేద విద్యార్థులకు మెరుగైన అవకాశాలు లభిస్తాయని వివరించారు.

విమర్శలకు భయపడాల్సిన అవసరం లేదని, నిజాలు ప్రజల ముందుకు రావాలని చంద్రబాబు అన్నారు. ప్రజలకు పూర్తి సమాచారం అందించడం ప్రభుత్వ బాధ్యత అని పేర్కొన్నారు. ఈ విషయంలో అధికారులు కూడా చొరవ తీసుకుని, పీపీపీ విధానంపై స్పష్టత ఇవ్వాలని దిశానిర్దేశం చేశారు. మొత్తంగా మెడికల్ విద్య, వైద్య సేవల అభివృద్ధి లక్ష్యంగా ప్రభుత్వం ముందుకు సాగుతుందని చంద్రబాబు స్పష్టంగా చెప్పారు.