YCP: ఆలస్యపు నిర్ణయాలే వైసీపీ మనుగడకు ప్రమాదంగా మారుతున్నాయా?

“లేట్‌గా అయినా లేటెస్ట్‌గా” అనే డైలాగ్ సినిమాల్లో వినడానికి బాగుంటుంది. కానీ రాజకీయాల్లో మాత్రం ఆలస్యం అంటే భారీ మూల్యం చెల్లించాల్సిన పరిస్థితి వస్తుందని విశ్లేషకులు చెబుతున్నారు. ముఖ్యంగా వైసీపీ (YSR Congress Party) రాజకీయాల విషయంలో ఈ మాట మరింతగా వినిపిస్తోంది. ఇప్పటి రాజకీయాలు పూర్తిగా మారిపోయాయి. సోషల్ మీడియా యుగంలో (Social Media Era) ప్రతి క్షణం కీలకమైంది. ఏ అంశం వచ్చినా వెంటనే స్పందించాలి, స్పష్టత ఇవ్వాలి. కానీ వైసీపీ ఇంకా పాత తరహా రాజకీయాలకే పరిమితమైందన్న విమర్శలు పెరుగుతున్నాయి.

ప్రజలకు అన్నీ తెలుసు, కాలమే అన్నీ తేలుస్తుంది అన్న భావనతో ముందుకు వెళ్లడం ఇక పనిచేయదని చాలామంది అంటున్నారు. ఏ విషయం అయినా జనాలకు పదే పదే వివరించాల్సిన అవసరం ఉందని రాజకీయ పరిశీలకుల అభిప్రాయం. ఈ విషయంలో ముఖ్యమంత్రి నారా చంద్రబాబు నాయుడు (N. Chandrababu Naidu) అనుసరిస్తున్న విధానం సరైనదని ఆయన అనుచరులే కాదు, రాజకీయ ప్రత్యర్థులూ ఒప్పుకుంటారు. ఒకసారి చెప్పితే కొద్దిమందికే చేరుతుంది, అదే విషయాన్ని పదిసార్లు, వందసార్లు చెప్పితే అందరికీ చేరుతుందన్నది చంద్రబాబు మార్క్‌గా చెబుతారు. ఆయన మాట్లాడేది ఇప్పటికే విన్నవారి కోసం కాదు, వినని వారి కోసం అన్న మాట రాజకీయ వర్గాల్లో ప్రసిద్ధి చెందింది. అయితే ఈ తరహా కమ్యూనికేషన్ స్ట్రాటజీ వైసీపీకి ఇంకా పూర్తిగా అలవడలేదని అంటున్నారు.

నిర్ణయాలు తీసుకోవడంలోనూ వైసీపీ ఆలస్యం చేస్తోందన్న అసంతృప్తి పార్టీ లోపలే ఉంది. టీడీపీ (TDP)పై ఏదైనా విమర్శ వచ్చినా ఆ పార్టీ వెంటనే స్పందిస్తుందన్న అభిప్రాయం ఉంది. కానీ వైసీపీ మాత్రం చాలాసార్లు మౌనం పాటించి, చివరకు నష్టపోయిందని కొందరు నేతలే బహిరంగంగా చెబుతున్నారు. ఇలా సైలెంట్‌గా ఉండటం వల్ల ఆరోపణలే నిజాలుగా మారిపోయాయని, దాని వల్ల పార్టీకి ఇమేజ్ డ్యామేజ్ జరిగిందని ఇప్పుడు గ్రహిస్తున్నారట.

బోరుగడ్డ అనిల్ కుమార్ (Borugadda Anil Kumar) వ్యవహారం ఇందుకు ఉదాహరణగా చెబుతున్నారు. ఆయన తాను వైసీపీ వ్యక్తిననేలా ప్రవర్తిస్తూ సోషల్ మీడియాలో అనుచిత వ్యాఖ్యలు చేశారని ఆరోపణలు ఉన్నాయి. ప్రత్యర్థి నేతలను తీవ్రంగా టార్గెట్ చేసిన పోస్టులు ఉన్నప్పటికీ, అప్పట్లో పార్టీ స్పందించలేదన్న విమర్శలు వచ్చాయి. చాలా ఆలస్యంగా “అతనికి పార్టీతో సంబంధం లేదు” అని వైసీపీ ప్రకటన ఇవ్వడం వల్ల అప్పటికే నెగిటివిటీ పార్టీకి అంటుకుపోయిందని చర్చ సాగుతోంది.

ఇలాగే శ్రీకాకుళం జిల్లా (Srikakulam District)కి చెందిన ఎమ్మెల్సీ దువ్వాడ శ్రీనివాస్ (Duvvada Srinivas) విషయంలోనూ పార్టీ ఆలస్యంగానే చర్యలు తీసుకుందని అంటున్నారు. ఆయన వ్యక్తిగత వ్యవహారాలు వివాదంగా మారినా, చాలా కాలం పాటు స్పందించలేదన్న విమర్శ ఉంది. సస్పెండ్ చేసినప్పటికీ, ఇప్పటికీ ఆయన తాను పార్టీ నేతనే అన్నట్లుగా వ్యవహరించడం వల్ల ప్రత్యర్థులు వైసీపీనే టార్గెట్ చేస్తున్నారట. ఈ నేపథ్యంలో దువ్వాడ వ్యవహారంపై మరో స్పష్టమైన ప్రకటన ఇవ్వాలని పార్టీ ఆలోచనలో ఉందని సమాచారం. మొత్తంగా చూస్తే, “మాకు సంబంధం లేదు” అని చెప్పాల్సిన జాబితా వైసీపీకి చాలా పెద్దదిగా మారుతోందన్న సెటైర్లు వినిపిస్తున్నాయి. రాజకీయాల్లో ఆలస్యం ఎంత ప్రమాదకరమో ఇప్పుడు అయినా పార్టీ గ్రహిస్తుందా? అన్న ప్రశ్న మాత్రం మిగిలే ఉంది.