Chandrababu: తుఫాను నష్టంపై ప్రత్యక్ష పరిశీలన – బాధితులకు భరోసా ఇచ్చిన చంద్రబాబు

ఆంధ్రప్రదేశ్‌ (Andhra Pradesh) తీరాన్ని వణికించిన మొంథా తుఫాను తర్వాత రాష్ట్రం అంతా ఆందోళనలోకి వెళ్లిపోయింది. కానీ ఈ క్లిష్ట పరిస్థితుల్లో సీఎం నారా చంద్రబాబు నాయుడు (Nara Chandrababu Naidu) చూపిన అప్రమత్తత ప్రజల్లో నమ్మకాన్ని నింపింది. తుఫాను తీరం దాటిన వెంటనే ఆయ‌న ప్ర‌భావిత ప్రాంతాల వైపు పయనమయ్యారు. తుఫాను నష్టాన్ని అంచనా వేయడానికి, ప్రజలకు ధైర్యం చెప్పడానికి ఆయన ఫీల్డ్‌లోకి దిగడం ప్రత్యేకంగా మారింది.

మధ్యాహ్నం 12 గంటలకు ప్రారంభమైన పర్యటన సాయంత్రం 4 గంటల వరకు కొనసాగింది. ఈ సమయంలో ఆయన మూడు జిల్లాలను సందర్శించారు. ఇందుకోసం కేంద్ర ప్రభుత్వం రాష్ట్ర ప్రభుత్వ సహాయక చర్యల కోసం పంపించిన చేతక్ హెలికాప్టర్‌ (Chetak Helicopter) ను ఉపయోగించారు. ప్రతికూల వాతావరణం ఉన్నా కూడా ఈ హెలికాప్టర్‌ సురక్షితంగా ప్రయాణించగలదన్న నమ్మకంతోనే సీఎం తుఫాను ప్రభావిత ప్రాంతాలను పరిశీలించారు.

మొదటగా ఉండవల్లి (Undavalli) నుంచి బయలుదేరి బాపట్ల (Bapatla) జిల్లాకు చేరుకున్నారు. అక్కడ తుఫాను వల్ల దెబ్బతిన్న పంట పొలాలు, ఇళ్లు, గ్రామాలను ప్రత్యక్షంగా చూశారు. రైతులు, ప్రజలతో మాట్లాడి వారి సమస్యలు తెలుసుకున్నారు. తరువాత కలెక్టర్ కార్యాలయంలో జరిగిన సమీక్ష సమావేశంలో పాల్గొని అధికారులు చేపడుతున్న సహాయక చర్యలను సమీక్షించారు. బాధితులకు ప్రభుత్వం అండగా ఉంటుందని భరోసా ఇచ్చారు.

బాపట్ల నుంచి కృష్ణా (Krishna) జిల్లాకు బయలుదేరి, అక్కడ తుఫాను ప్రభావాన్ని ఏరియల్ సర్వే ద్వారా పరిశీలించారు. గాలి వేగం తగ్గిన వెంటనే ఆయన మళ్లీ తదుపరి జిల్లాకు పయనమయ్యారు. అనంతరం కోనసీమ (Konaseema) జిల్లాకు చేరుకుని అక్కడ పరిస్థితులను సమీక్షించారు. అయితే కోనసీమలో వాతావరణం కారణంగా కాన్వాయ్‌ ప్రయాణంలో కొంత ఇబ్బంది ఎదురైంది. అందువల్ల ఆయన ఓ పార్టీ కార్యకర్త ఇన్నోవా (Innova) కారులో ప్రయాణించి పునరావాస కేంద్రానికి చేరుకున్నారు.

ఆ పునరావాస కేంద్రంలో బాధితులతో నేరుగా మాట్లాడి వారి సమస్యలు విన్నారు. ముఖ్యంగా మత్స్యకారుల బాధలు ఆయనను కదిలించాయి. వారి కుటుంబాల కోసం ప్రభుత్వం అన్ని విధాలా అండగా ఉంటుందని హామీ ఇచ్చారు. ఆహారం, తాత్కాలిక నివాసం, అవసరమైన వస్తువుల పంపిణీ వంటి పనులు వేగంగా జరగాలని సూచించారు.

తుఫాను ప్రభావిత కుటుంబాలకు తక్షణ సహాయంగా రూ.1000 నుండి రూ.3000 వరకు ఆర్థిక సాయం ప్రకటించారు. ప్రతి కుటుంబానికి 25 కిలోల బియ్యం, 3 కిలోల గోధుమలతో పాటు ఇతర నిత్యావసరాలు అందించాలని ఆదేశించారు. దెబ్బతిన్న రహదారులను 48 గంటల్లో పునరుద్ధరించడానికి అధికారులు ప్రయత్నాలు ప్రారంభించారు. పంటల నష్టానికి అంచనా వేసి మూడు రోజుల్లో నివేదిక ఇవ్వాలని సూచించారు. అదే సమయంలో కేంద్ర ప్రభుత్వానికి లేఖ రాసి అత్యవసర సాయం కోరారు. ఈ విధంగా, తుఫాను ప్రభావం ఇంకా పూర్తిగా తగ్గకముందే సీఎం చంద్రబాబు ప్రదర్శించిన వేగం, చురుకుదనం రాష్ట్ర వ్యాప్తంగా ప్రశంసలు అందుకుంది. ప్రజల మధ్య నేరుగా వెళ్లి వారిని ధైర్యం చెప్పడం, అధికారులకు తక్షణ చర్యలు సూచించడం ద్వారా ఆయన నాయకత్వం మరొక్కసారి స్పష్టమైంది.