Amaravati: అమరావతిలో బిట్స్ పిలానీ – భవిష్యత్ విద్యకు బిర్లా గ్రూప్ శంకుస్థాపన

ఆంధ్రప్రదేశ్ రాష్ట్ర విద్యా రంగానికి ఒక కొత్త దిశలో నడిపించే పరిణామంగా బిర్లా గ్రూప్ (Birla Group) ఓ గొప్ప ప్రకటన చేసింది. ప్రపంచ ప్రఖ్యాతి గాంచిన బిట్స్ పిలానీ (BITS Pilani) ఇప్పుడు అమరావతిలో (Amaravati) కొత్త క్యాంపస్ ఏర్పాటు చేయబోతోంది. ఇది కేవలం ఓ విద్యా సంస్థ స్థాపన మాత్రమే కాకుండా, భవిష్యత్తు అవసరాలకు సరిపోయే విధంగా తీర్చిదిద్దబోతున్నారు.

ఈ ప్రతిష్టాత్మక ప్రాజెక్ట్ నిర్మాణానికి రూ.1000 కోట్లు పెట్టుబడిగా ఖర్చు చేయనున్నట్టు సంస్థ ఛాన్సలర్ కుమార మంగళం బిర్లా (Kumar Mangalam Birla) వెల్లడించారు. అమరావతిలో నిర్మించబోయే ఈ క్యాంపస్‌ను ప్రత్యేకమైన ఏఐ క్యాంపస్‌గా అభివృద్ధి చేయనున్నారు. అంటే ఇది కేవలం సాంప్రదాయ విద్యకు మాత్రమే కాకుండా, ఆధునిక సాంకేతికతలపై దృష్టి పెట్టిన విద్యాసంస్థగా నిలవనుంది. ఇందులో ఆర్టిఫిషియల్ ఇంటెలిజెన్స్ (Artificial Intelligence), డేటా సైన్స్ (Data Science), రోబోటిక్స్ (Robotics), సైబర్ ఫిజికల్ సిస్టమ్స్ (Cyber-Physical Systems) వంటి ఫీల్డ్స్‌కు ఎక్కువ ప్రాధాన్యం ఉంటుంది. విద్యార్థులు కేవలం పాఠశాల విద్య మాత్రమే కాకుండా పరిశోధన, ఆవిష్కరణలపై దృష్టి పెట్టేలా ఈ క్యాంపస్ ఏర్పాటవుతుంది. అంతేకాదు, పరిశ్రమలతో అనుసంధానంగా ఇంటర్న్‌షిప్‌లు, ప్రాజెక్ట్‌లు కూడా అందుబాటులోకి వస్తాయి.

అంతర్జాతీయ విశ్వవిద్యాలయాల సహకారంతో సంయుక్త పీహెచ్‌డీ (Joint PhD) ప్రోగ్రామ్‌లు కూడా ప్రారంభించబోతున్నట్లు తెలుస్తోంది. విద్యార్ధులు ఈ అవకాశాల ద్వారా అంతర్జాతీయ ప్రమాణాలతో కూడిన నైపుణ్యాలను అలవర్చుకోగలుగుతారు. ఈ క్యాంపస్‌ను దశలవారీగా అభివృద్ధి చేయనున్నారు. పూర్తిస్థాయిలో ఈ ప్రాజెక్ట్ రూపుదిద్దుకున్న తర్వాత, ఒకేసారి 7,000 మందికి పైగా విద్యార్థులు ఇందులో చదువుకునే అవకాశం కలుగుతుంది. అన్ని సౌకర్యాలతో కూడిన వసతులు, ప్రయోగశాలలు, శిక్షణా కేంద్రాలు ఇందులో ఉండబోతున్నాయి.

ఈ సందర్భంగా కుమార మంగళం బిర్లా మాట్లాడుతూ, “భవిష్యత్తుకు తగిన విద్యను అందించడమే మా దృష్టి. అమరావతిలోని ఈ క్యాంపస్ ద్వారా విద్యార్థులు శాస్త్రీయంగా, సాంకేతికంగా ఎదగగలుగుతారు. ఇది రాష్ట్రానికి గర్వకారణం అవుతుంది” అని చెప్పారు. ఈ ప్రకటనతో రాష్ట్ర విద్యా రంగంలో ఒక సరికొత్త అధ్యాయం ప్రారంభమైంది. త్వరలోనే నిర్మాణ పనులు మొదలవనున్నాయి.