YSRCP: జమిలి ఎన్నికలపై వైసీపీ ఆశలు..! కేడర్ కోసమేనా..!?

2027లో జమిలి ఎన్నికలు (duel elections) జరుగుతాయని, ఆ ఎన్నికల్లో తిరిగి అధికారం సాధిస్తామని వైఎస్సార్ కాంగ్రెస్ పార్టీ (YSRCP) ఆశాభావం వ్యక్తం చేస్తోంది. 2024 ఎన్నికల్లో కేవలం 11 సీట్లకు పరిమితమై, ప్రతిపక్ష హోదా కూడా కోల్పోయిన వైసీపీ, ఇప్పుడు తన కేడర్‌ను ఉత్సాహపరిచేందుకు, పార్టీ బలోపేతం కోసం వివిధ కార్యక్రమాలు చేపడుతోంది. ఈ నేపథ్యంలో, పార్టీ అధినేత వై.ఎస్.జగన్‌మోహన్ రెడ్డి (YS Jagan) జిల్లాల పర్యటనలు, పాదయాత్రల వంటి కార్యక్రమాలను ప్రకటించారు. అయితే, జమిలి ఎన్నికలు 2027లో జరిగే అవకాశం లేదని, రాజ్యాంగపరమైన అడ్డంకుల కారణంగా 2034 వరకు అవి ఆలస్యం కావచ్చని నిపుణులు అంచనా వేస్తున్నారు. ఈ పరిస్థితుల్లో వైసీపీ హడావుడి వెనుక ఉన్న ఉద్దేశాలు, వ్యూహాలు ఏంటనేదానిపై ఆసక్తికర చర్చ జరుగుతోంది.

2019 ఎన్నికల్లో 151 సీట్లతో అధికారంలోకి వచ్చిన వైసీపీ, 2024లో తెలుగుదేశం పార్టీ (TDP), జనసేన, భారతీయ జనతా పార్టీ (BJP) కూటమి చేతిలో ఘోర పరాజయం పొందింది. కేవలం 11 సీట్లు సాధించిన వైసీపీ.. ప్రతిపక్ష హోదా కోసం అవసరమైన 10% సీట్లను (18 సీట్లు) కూడా సాధించలేకపోయింది. ఈ ఫలితాలు పార్టీ కేడర్‌లో నిరాశను, ఆందోళనను కలిగించాయి. పార్టీ అధినేత జగన్‌ సహా పలువురు కీలక నాయకులపై కేసులు, విచారణలు కొనసాగుతుండటం కేడర్‌లో ఉత్సాహం నీరుగారిపోయింది. ఈ నేపథ్యంలో, కేడర్‌ను ఏకతాటిపై నడిపించడం, వారిలో ఆత్మవిశ్వాసం నింపడం వైసీపీ ముందున్న ప్రధాన సవాలుగా మారింది.

వైసీపీ నాయకులు బొత్స సత్యనారాయణ, పెద్దిరెడ్డి రామచంద్రారెడ్డి, వై.వి.సుబ్బారెడ్డి వంటి ప్రముఖులు 2027 ఫిబ్రవరిలో జమిలి ఎన్నికలు జరుగుతాయని, అందుకు కేడర్ సిద్ధంగా ఉండాలని పిలుపునిచ్చారు. ఈ వ్యాఖ్యలు సోషల్ మీడియాలో వైరల్‌గా మారాయి. అయితే.. జమిలి ఎన్నికలు ఆచరణ సాధ్యం కావాలంటే అనేక రాజ్యాంగ సవరణలు, రాష్ట్రాల మధ్య సమన్వయం, శాసనసభల కాలపరిమితి సమస్యల వంటి అనేక అడ్డంకులను అధిగమించాల్సి ఉంటుంది. నిపుణుల అంచనా ప్రకారం, ఈ ప్రక్రియ 2034 వరకు ఆలస్యం కావచ్చు. అయినా వైసీపీ మాత్రం 2027లోనే జమిలి ఎన్నికలు వచ్చేస్తాయని హడావుడి చేస్తోంది. దీని వెనుక ప్రధాన ఉద్దేశం కేడర్‌ను కోల్పోకుండా చూసుకోవడమేనని రాజకీయ విశ్లేషకులు అభిప్రాయపడుతున్నారు. 2024 ఎన్నికల తర్వాత పార్టీ నాయకులు, కార్యకర్తలు నిరాశలో ఉన్నారు. ఈ సమయంలో జమిలి ఎన్నికలపై ఆశలు రేకెత్తించడం ద్వారా కేడర్‌లో జోష్ వస్తుందనేది ఆ పార్టీ ఆలోచనగా ఉంది.

వైసీపీ అధినేత జగన్‌మోహన్ రెడ్డి జిల్లాల పర్యటనలు, పాదయాత్రల ద్వారా జనంతో నేరుగా సంబంధం ఏర్పరచుకునేందుకు సన్నాహాలు చేస్తున్నారు. 2019 ఎన్నికల ముందు జగన్ చేపట్టిన ‘ఓదార్పు యాత్ర’ విజయవంతం కావడంతో, మరోసారి పాదయాత్ర ద్వారా ప్రజల్లో చైతన్యం తీసుకొచ్చేందుకు ప్రణాళికలు రూపొందిస్తున్నారు. ఈ పాదయాత్ర ద్వారా ప్రజల సమస్యలను అర్థం చేసుకోవడం, ప్రభుత్వ వైఫల్యాలను ఎత్తిచూపడం, వైసీపీ గత పాలనలో అమలు చేసిన సంక్షేమ పథకాలను గుర్తు చేయాలనుకుంటున్నారు. వైసీపీ కార్యక్రమాలు, జమిలి ఎన్నికలపై ప్రకటనలు కేడర్‌ను ఉత్సాహపరిచేందుకు, పార్టీని సజీవంగా ఉంచేందుకు ఉద్దేశించినవేనని విశ్లేషకులు అభిప్రాయపడుతున్నారు. 2027లో జమిలి ఎన్నికలు జరిగే అవకాశం తక్కువగా ఉన్నప్పటికీ, ఈ ప్రచారం ద్వారా పార్టీ కార్యకర్తలను ఏకతాటిపై నడిపించడం, ప్రజల్లో చైతన్యం తీసుకొచ్చేందుకు దోహదపడతాయి.