Pawan Kalyan : ఏదైనా పవన్ కల్యాణ్ దిగనంతవరకే..!?

ఆంధ్రప్రదేశ్ రాజకీయాల్లో కూటమి పార్టీలైన తెలుగుదేశం పార్టీ (TDP), జనసేన పార్టీ (Janasena), భారతీయ జనతా పార్టీ (BJP) మధ్య చిచ్చు పెట్టి, వాటిని విడగొట్టేందుకు వైఎస్సార్ కాంగ్రెస్ పార్టీ (YSRCP) తీవ్రంగా ప్రయత్నిస్తోంది. అయితే జనసేన అధ్యక్షుడు, ఉపముఖ్యమంత్రి పవన్ కల్యాణ్.. మార్కాపురం (Markapuram) పర్యటనలో చేసిన కీలక వ్యాఖ్యలతో వైసీపీ ప్రయత్నాలకు చెక్ పెట్టినట్లయింది. టీడీపీ అధ్యక్షుడు, ముఖ్యమంత్రి చంద్రబాబుపై (CM Chandrababu) తనకు సంపూర్ణ విశ్వాసం ఉందని, ఆయన నాయకత్వం రాష్ట్ర భవిష్యత్తుకు కీలకమని పవన్ (Pawan Kalyan) స్పష్టం చేశారు. ఈ వ్యాఖ్యలు కూటమి ఐక్యతను బలోపేతం చేయడమే కాక, వైసీపీ రాజకీయ వ్యూహాలను తిప్పికొట్టేలా ఉన్నాయి.

మార్కాపురంలో రూ.1,290 కోట్లతో అతిపెద్ద తాగునీటి పథకానికి శంకుస్థాపన చేశారు డిప్యూటీ సీఎం పవన్ కల్యాణ్. ఈ సందర్భంగా జరిగిన బహిరంగ సభలో పవన్ కల్యాణ్ మాట్లాడారు. చంద్రబాబు నాయకత్వం లేకుంటే రాష్ట్రం గత ఐదేళ్లలో ఎలాంటి దుస్థితిని ఎదుర్కొందో చూశామన్నారు. “చంద్రబాబు లేకుంటే రాష్ట్ర భవిష్యత్తు ఏమైపోయేదో ఆలోచించండి. ఆయన నాయకత్వం మరో 15 ఏళ్లు రాష్ట్రానికి అవసరం” అని పవన్ పేర్కొన్నారు. ఈ వ్యాఖ్యలు టీడీపీ-జనసేన బంధాన్ని మరింత బలపరిచాయి. జనసేన కేడర్‌ కూడా ఈ విషయాన్ని అర్థం చేసుకోవాలని, కూటమి పార్టీలతో సఖ్యతగా ముందుకు సాగాలని ఆయన సూచించారు. ఒకవేళ ఏవైనా సమస్యలు ఉంటే, కూర్చుని మాట్లాడుకొని పరిష్కరించుకోవాలని పవన్ స్పష్టం చేశారు.

వైసీపీ రాజకీయ కుట్రలపై పవన్ కల్యాణ్ తీవ్రంగా స్పందించారు. “వైసీపీ ఎలా అధికారంలోకి వస్తుందో నేను చూస్తాను. ఆ పార్టీని మళ్లీ అధికారంలోకి రానివ్వను” అని ఆయన గట్టిగా చెప్పారు. 2024 ఎన్నికల్లో కూటమి ఘన విజయం సాధించడంలో పవన్ కల్యాణ్ కీలక పాత్ర పోషించారు. టీడీపీ, జనసేన, బీజేపీ కలిసి 175 అసెంబ్లీ స్థానాల్లో 164 సీట్లు గెలుచుకున్నాయి. వైసీపీ కేవలం 11 సీట్లకే పరిమితమైంది. ఈ విజయంలో పవన్ కల్యాణ్ వ్యూహాత్మక నాయకత్వం, జనసేన కేడర్‌ను ఉత్తేజపరిచిన తీరు, కూటమి ఐక్యతను కాపాడిన విధానం ముఖ్యమైనవి. ఎన్నికల్లో ఓటమి తర్వాత, కూటమి పార్టీల మధ్య అసమ్మతిని రెచ్చగొట్టేందుకు వైసీపీ వివిధ వ్యూహాలను అనుసరిస్తోంది. చంద్రబాబు, పవన్ కల్యాణ్, బీజేపీ నాయకత్వం మధ్య విభేదాలు సృష్టించేందుకు సామాజిక మాధ్యమాల్లో ప్రచారం, వివాదాస్పద వ్యాఖ్యలు, రాజకీయ ఆరోపణలు చేస్తోంది. అయితే, పవన్ కల్యాణ్ ఈ ప్రయత్నాలను గట్టిగా తిప్పికొట్టారు. “మీరు గెలవాలని అనుకుంటే.., ముందు గెలవండి. మీరు ఎలా గెలుస్తారో చూస్తాం” అని వైసీపీకి సవాల్ విసిరారు.

గత ఎన్నికల్లో వైసీపీ పాలనపై ప్రజల్లో ఉన్న అసంతృప్తి, అభివృద్ధి కొరవడిన ఆరోపణలు, ఆర్థిక వ్యవస్థ బలహీనతను కూటమి సమర్థవంతంగా ఉపయోగించుకుంది. చంద్రబాబు అభివృద్ధి ఎజెండా, పవన్ కల్యాణ్ సామాజిక న్యాయం, గ్రామీణ అభివృద్ధి వాగ్దానాలు ప్రజలను ఆకర్షించాయి. కాపు, కమ్మ, ఓబీసీ, ఎస్సీ సామాజిక వర్గాల ఓట్లను కూటమి సమర్థవంతంగా సంపాదించింది. పవన్ కల్యాణ్ నాయకత్వం కూటమి ఐక్యతను కాపాడడంలో కీలక పాత్ర పోషిస్తోంది. 2023లో చంద్రబాబు నాయుడు అరెస్టు సమయంలో పవన్ కల్యాణ్ టీడీపీ కేడర్‌కు అండగా నిలిచారు. రాజమండ్రి జైలు వద్ద మాట్లాడిన ఆయన టీడీపీతో కలిసి పోటీ చేయబోతున్నట్టు ప్రకటించారు. ఈ ఐక్యత 2024 ఎన్నికల్లో కూటమి విజయానికి దారితీసింది. పవన్ కల్యాణ్ మార్కాపురం వ్యాఖ్యలు, వైసీపీకి రాజకీయంగా గట్టి సవాల్ విసురుతూనే, కూటమి లోని అంతర్గత సమస్యలను సామరస్యంగా పరిష్కరించుకునేందుకు ఒక స్పష్టమైన దిశానిర్దేశం చేశాయి.