AP Police: డ్రగ్స్‌కు నో.. యువత భవిష్యత్తుకు యెస్..ఉత్తరాంధ్రలో పోలీసుల వినూత్న సైకిల్ ఉద్యమం..

“డ్రగ్స్ వద్దు.. భవిష్యత్తు ముద్దు” అనే నినాదంతో ఉత్తరాంధ్ర (North Andhra) ప్రాంతంలో పోలీసులు నిర్వహించిన అభ్యుదయం సైకిల్ ర్యాలీ విజయవంతంగా ముగిసింది. డ్రగ్స్ రహిత ఆంధ్రప్రదేశ్ (Andhra Pradesh) లక్ష్యంగా చేపట్టిన ఈ యాత్ర, ప్రజల్లో ముఖ్యంగా యువత,విద్యార్థుల్లో అవగాహన పెంచడంలో కీలక పాత్ర పోషించిందని చెప్పాలి. గంజాయి సహా మత్తు పదార్థాల వల్ల కలిగే అనర్థాలను ప్రత్యక్షంగా ప్రజలకు వివరించడమే ఈ కార్యక్రమం ప్రధాన ఉద్దేశం.

నవంబర్ 13న అనకాపల్లి జిల్లా (Anakapalli District) నుంచి ప్రారంభమైన ఈ సైకిల్ యాత్ర సుమారు 1300 కిలోమీటర్లు సాగింది. విశాఖ రేంజ్ డీఐజీ గోపీనాథ్ జెట్టీ (Gopinath Jetti) ఆధ్వర్యంలో చేపట్టిన ఈ కార్యక్రమానికి పోలీస్ శాఖ నుంచి మంచి స్పందన లభించింది. అనకాపల్లి జిల్లాలో రాష్ట్ర హోంమంత్రి అనిత (Anitha) ఈ యాత్రను ప్రారంభించగా, ఉత్తరాంధ్ర చివరి అంచున ఉన్న శ్రీకాకుళం జిల్లా (Srikakulam District)లో ముగింపు వేడుకలు ఘనంగా నిర్వహించారు. ఇచ్చాపురం పట్టణం (Ichchapuram Town)లో జరిగిన ముగింపు కార్యక్రమం ప్రజలను విశేషంగా ఆకట్టుకుంది.

పాయకరావుపేట (Payakaraopeta) నుంచి ఇచ్చాపురం వరకు సాగిన ఈ సైకిల్ ర్యాలీలో 23 మంది పోలీసులు నిరంతరంగా పాల్గొన్నారు. ఎన్ని సమస్యలు ఎదురైనా లెక్కచేయకుండా ఐదు జిల్లాల్లోని ప్రతి ఊరి మీదుగా ప్రయాణిస్తూ డ్రగ్స్ వ్యతిరేక సందేశాన్ని చాటిచెప్పారు. ఇప్పటివరకు రాజకీయ లక్ష్యాలతోనే ఇలాంటి యాత్రలు చూశామని, కానీ పూర్తిగా సామాజిక బాధ్యతతో పోలీసులు ముందుకొచ్చి నిర్వహించిన ఈ ర్యాలీ ప్రత్యేకతను సంతరించుకుందని ప్రజలు అభిప్రాయపడుతున్నారు.

ఈ కార్యక్రమాన్ని కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు (Kinjarapu Rammohan Naidu) ప్రత్యేకంగా అభినందించారు. పోలీస్ స్టేషన్‌లో ఏర్పాటు చేసిన పైలాన్‌ను ఆయన ఆవిష్కరించారు. ముఖ్యమంత్రి చంద్రబాబు నాయుడు (Chandrababu Naidu) ఆంధ్రప్రదేశ్‌ను మత్తు పదార్థాల నుంచి విముక్తం చేయాలనే దృఢ సంకల్పంతో ఉన్నారని, అదే లక్ష్యాన్ని ప్రజల్లోకి తీసుకెళ్లేందుకు పోలీసులు ఈ వినూత్న ప్రయత్నం చేశారని ఆయన పేర్కొన్నారు.

ఇచ్చాపురంలో జరిగిన ముగింపు సభకు కేంద్ర మంత్రితో పాటు రాష్ట్ర హోంమంత్రి, ఉత్తరాంధ్రకు చెందిన పలువురు ఎమ్మెల్యేలు హాజరయ్యారు. పోలీస్ శాఖ స్వయంగా చేపట్టిన ఈ కార్యక్రమానికి ప్రభుత్వ పెద్దలు, ప్రజాప్రతినిధులు మద్దతు ఇవ్వడం వల్ల పాల్గొన్న పోలీసులకు మరింత ఉత్సాహం లభించిందని అంటున్నారు. డ్రగ్స్ నిర్మూలన విషయంలో ప్రభుత్వం, పోలీసులు ఒకే దిశగా పనిచేస్తున్నారనే సందేశం ప్రజల్లోకి బలంగా వెళ్లిందని విశ్లేషకులు చెబుతున్నారు. మొత్తంగా ఈ సైకిల్ ర్యాలీ ఉత్తరాంధ్రలో సామాజిక చైతన్యానికి కొత్త ఊపునిచ్చిందని చెప్పవచ్చు.