Bejing: చైనా విద్యార్థుల విషయంలో అమెరికా యూటర్న్.. స్వాగతించిన డ్రాగన్..

అక్రమ వలసలు, విదేశీ విద్యార్థుల వీసాల (Student visa) విషయంలో కఠినంగా వ్యవహరిస్తున్న అమెరికా అధ్యక్షుడు ట్రంప్‌ (Donald Trump).. చైనా విద్యార్థుల విషయంలో యూ టర్న్ తీసుకున్నారు. దాదాపు 6 లక్షల మంది చైనా విద్యార్థులను తమ యూనివర్సిటీల్లో చేర్చుకుంటామని ప్రకటించారు ట్రంప్. అధ్యక్షుడు ట్రంప్ తీసుకున్న నిర్ణయాన్ని చైనా స్వాగతించింది. అయితే, తమ విద్యార్థులపై వేధింపులు మాత్రం ఆపాలని విజ్ఞప్తి చేసింది.

‘‘అమెరికాలో చదువుకునేందుకు చైనా విద్యార్థులకు ఆహ్వానిస్తూ అధ్యక్షుడు ట్రంప్‌ తీసుకున్న నిర్ణయాన్ని స్వాగతిస్తున్నాం. చైనా విద్యార్థులను వేధించడం, ప్రశ్నించడం, నిరాధార ఆరోపణలతో స్వదేశానికి పంపించడం వంటి చర్యలను ఆపాలి. తద్వారా వారి చట్టబద్ధమైన హక్కులను రక్షించాలి’’ అని చైనా విదేశాంగశాఖ అధికార ప్రతినిధి గువో జియాకున్‌ పేర్కొన్నారు.

అమెరికా అధ్యక్షుడిగా రెండోసారి పగ్గాలు చేపట్టిన డొనాల్డ్‌ ట్రంప్‌.. వలసదారులు, విదేశీ విద్యార్థుల విషయంలో కఠిన నిబంధనలు అమలు చేస్తున్నారు. భారత్‌ సహా ఇతర దేశాల విద్యార్థుల వీసాల ప్రక్రియను కఠినతరం చేసిన ఆయన.. చైనాలో కమ్యూనిస్ట్‌ పార్టీకి చెందిన వారు, పరిశోధన రంగంలో ఉన్నవారికి వీసాలు (US visa) రద్దు చేస్తామని బహిరంగంగానే హెచ్చరికలు చేశారు. ఈ క్రమంలోనే తాజాగా చైనా విషయంలో ట్రంప్‌ యూటర్న్‌ తీసుకోవడం ప్రాధాన్యత సంతరించుకుంది.