ఇజ్రాయెల్, అమెరికా కాచుకోండి… ఇరాన్ భారీ రివేంజ్ ప్లాన్…

ఇజ్రాయెల్ తో ఢీ అంటే ఢీ అంటున్న ఇరాన్.. ఆదేశంపై రివేంజ్ కు పెద్ద ప్లానే వేసింది. ఓవైపు తమ దేశం నుంచి ఇజ్రాయెల్ పైకి రాకెట్స్ పంపించడంతో పాటు ఇజ్రాయెల్ లోపల కూడా దాడులకు ప్రణాళికలు సిద్ధం చేసింది. బయటి నుంచి జరుగుతున్న దాడులను ఐరన్ డోమ్, ఇతరత్రా నిఘా నెట్ వర్క్ లతో ఇజ్రాయెల్ అడ్డుకునే అవకాశం ఉండడంతో.. ఇజ్రాయెల్ భూభాగంపై నుంచి దాడులకు సర్వం సిద్ధం చేసింది. ఇందుకు స్లీపర్ సెల్స్ ను యాక్టివ్ చేసినట్లు సమాచారం.

ఇజ్రాయెల్ తోపాటు ఆదేశానికి మద్దతుగా నిలుస్తున్న అమెరికా, బ్రిటన్, స్విట్జర్లాండ్, ఇటలీ, ఫ్రాన్స్, గ్రీస్, టర్కీ, బెల్జియం, డెన్మార్క్, సౌదీ అరేబియా, జర్మనీ, స్వీడన్‌లను ఇరాన్ టార్గెట్ చేస్తోంది. ఈవిషయాన్ని బ్రిటిష్ ఇంటెలిజెన్స్ ఏజెన్సీలు బయటపెట్టాయి. టెహ్రాన్‌లోని అండర్‌గ్రౌండ్ బంకర్ నుండి స్లీపర్ సెల్‌కి ఆర్డర్లు ఇస్తున్నట్లు తెలుస్తుంది. దీంతో ఇజ్రాయెల్, అమెరికా ఇప్పుడు భారీ ముప్పును ఎదుర్కొంటున్నాయి. ఇరాన్-ఇజ్రాయెల్ రెండు ఒక్కదానిపై ఒక్కటి ప్రతీకార దాడులు చేసుకుంటున్నాయి. అయితే ఈసారి ఇరాన్ ఇజ్రాయెల్ పైనే కాకుండా అమెరికాపై కూడా ప్రతీకారం తీర్చుకోవాలని చూస్తున్నట్లు తెలుస్తుంది. ఇరాన్ బాలిస్టిక్ క్షిపణులతో ఇజ్రాయెల్‌పై దాడి చేయబోతుందని బ్రిటీష్ ఇంటెలిజెన్స్ హెచ్చరించింది.

అలాగే అమెరికా, యూరప్‌లోని ఇజ్రాయెల్ రాయబార కార్యాలయాలకు ముప్పు పొంచి ఉందని, అరేబియాలోని అమెరికా సైనిక స్థావరంపై కూడా దాడి చేయవచ్చని బ్రిటిష్ ఇంటెలిజెన్స్ ఏజెన్సీలు వెల్లడించాయి. అరేబియాలోని అమెరికా సైనిక స్థావరాన్ని ధ్వంసం చేసేందుకు ఇరాన్ ప్రయత్నం చేస్తున్నట్లు వార్తలు వినిపిస్తున్నాయి. ఇరాన్‌ సుప్రీం లీడర్‌ అయతొల్లా అలీ ఖమేనీ అతడి సైన్యం ప్లాన్‌లను బ్రిటిష్ ఇంటెలిజెన్స్ ఏజెన్సీలు లీక్ చేశాయి.ఇరాన్ స్లీపర్ సెల్స్, సూసైడ్ బాంబర్లు అమెరికా, యూరప్‌లో దాడులు చేయబోతున్నాయి. ఇరాన్ అనేక దేశాల్లో ఉన్న తన స్లీపర్ సెల్స్‌ని యాక్టివేట్ చేసింది. ఆత్మాహుతి బాంబర్లను కూడా మోహరించింది.. ఇజ్రాయెల్‌లోని ఆత్మాహుతి బాంబర్‌లకు VVIP వ్యక్తులను చంపే పనిని అప్పగించారు. అయితే ఇజ్రాయెల్ వెలుపల ఉన్న స్లీపర్ సెల్‌లకు ఇజ్రాయెల్ రాయబార కార్యాలయాన్ని పేల్చే బాధ్యత ఇచ్చినట్లు తెలుస్తుంది.