Israel: గాజాలో పాక్ సైన్యానికి నో ఎంట్రీ – ఇజ్రాయెల్

గాజాలో శాంతి పరిరక్షణ దళాల్లోకి పాక్ సైన్యాన్ని చేర్చాలన్న అమెరికా ప్రతిపాదనను.. ఇజ్రాయెల్ తీవ్రంగా వ్యతిరేకించింది. పాకిస్తాన్ లో ఉగ్రవాదులు స్వేచ్ఛగా తిరుగుతున్నారని.. వారికి పాక్ సైనిక దళాలతో సంబంధాలున్నాయని స్పష్టం చేసింది. అంతే కాదు… పాక్ కేంద్రంగా పనిచేస్తున్న లష్కర్ ఏ తొయిబా,జైష్ ఏ మహమ్మద్ లాంటి ఉగ్రవాద సంస్థలకు.. హమాస్ కు సంబంధాలు బలపడుతున్నాయని ఇజ్రాయెల్ ఆందోళన వ్యక్తం చేసింది. తాము విశ్వసించని, సరైన దౌత్య సంబంధాలు లేని దేశాలతో కలిసి పనిచేయలేమని స్పష్టం చేసింది.

అమెరికా ప్రతిపాదించిన ఇంటర్నేషనల్ స్టెబిలైజేషన్ ఫోర్స్ (ISF)లో పాకిస్థాన్ సైన్యాన్ని కూడా భాగం చేయాలని వాషింగ్టన్ భావిస్తున్న నేపథ్యంలో ఇజ్రాయెల్ ఈ మేరకు తన అధికారిక వైఖరిని వెల్లడించింది.”మేము నమ్మకంగల దేశాలతోనే కలిసి పనిచేయగలం. పాకిస్థాన్‌తో మాకు అలాంటి సంబంధాలు లేవు” అని భారత్‌లో ఇజ్రాయెల్ రాయబారి రూవెన్ అజార్ తేల్చిచెప్పారుగత మూడేళ్లుగా హమాస్ సీనియర్ కమాండర్ నజీ జహీర్ తరచూ పాకిస్థాన్‌లో పర్యటించి ఆయా సంస్థల ప్రతినిధులతో సమావేశమవుతున్నట్లు తమ వద్ద ఇంటెలిజెన్స్ సమాచారం ఉందని అజార్ పేర్కొన్నారు.

గాజాలో ఎలాంటి రాజకీయ పరిష్కారం లేదా పునర్నిర్మాణం చేపట్టాలన్నా ముందుగా హమాస్‌ను పూర్తిగా నిర్మూలించడం తప్పనిసరి అని ఇజ్రాయెల్ గట్టిగా చెబుతోంది. హమాస్ ఉనికిలో ఉండగా శాంతి పరిరక్షణ దళాలను పంపడంలో అర్థం లేదని, హమాస్‌తో పోరాడటానికి చాలా దేశాలు సిద్ధంగా లేవని ఆయన గుర్తుచేశారు.