Washington: భద్రత విషయంలో భారత్ కీలక భాగస్వామి.. అమెరికా ప్రతినిధుల సభ సెలెక్ట్ కమిటీ కామెంట్స్..

అమెరికా అధ్యక్షుడు ట్రంప్ (Trump) భారత్ తో ఆటలాడుతున్నారు. ఓవైపు భారత్, మోడీ తమకు మిత్రులంటూనే.. మరోవైపు ఆంక్షలు విధిస్తున్నారు. ఇదిలా ఉంటే.. ఆ దేశం చైనా (China) వ్యవహారాలపై వేసిన కమిటీ మాత్రం భారత్.. భద్రతా విషయంలో తమకు కీలకమైన భాగస్వామి అని కామెంట్ చేశారు. చైనా వ్యవహారాలపై ఏర్పాటైన అమెరికా ప్రతినిధుల సభ సెలెక్ట్ కమిటీ ఈ మేరకు కీలక వ్యాఖ్యలు చేసింది. చైనా దురాక్రమణను నేరుగా ఎదుర్కొన్న దేశంగా భారత్ పాత్ర ఎంతో ముఖ్యమని నొక్కి చెప్పింది.

అమెరికాలోని భారత రాయబారి వినయ్ క్వత్రాతో, చైనాపై ఏర్పాటైన కమిటీ అధిపతి జాన్ ములెనార్ ఇటీవల సమావేశమయ్యారు. ఈ భేటీ అనంతరం కమిటీ ఒక ప్రకటన విడుదల చేసింది. ఈ సందర్భంగా ఇరు దేశాల మధ్య రక్షణ, వాణిజ్యం, సాంకేతిక రంగాల్లో సహకారాన్ని మరింత బలోపేతం చేసుకోవడంపై చర్చించినట్లు తెలిపింది. అదే సమయంలో, కీలక తయారీ రంగాలను చైనా నుంచి ఇతర దేశాలకు తరలించడంపైనా ఇరు పక్షాలు చర్చించుకున్నాయి.

“చైనా దురాక్రమణను, దాని దౌర్జన్యాలను భారత్ నేరుగా ఎదుర్కొంది. అందుకే ప్రపంచ భద్రతలో ఆ దేశం అమెరికాకు ఎంతో ముఖ్యమైన భాగస్వామి” అని పేర్కొన్నట్లు కమిటీ వెల్లడించింది. “ప్రపంచంలోనే అతిపెద్ద ప్రజాస్వామ్య దేశమైన భారత్‌తో రక్షణ పరిశ్రమ సంబంధాలు బలపడటం అమెరికా ప్రజల భద్రతకు కూడా ఎంతో మేలు చేస్తుంది” అని ఆయన అన్నట్లు తెలిపింది.

ప్రమాదకరమైన చైనా టెక్నాలజీని, సోషల్ మీడియా యాప్‌లను కట్టడి చేయడంలో భారత్ ఒక గ్లోబల్ లీడర్‌గా నిలిచిందని ములెనార్ ప్రశంసించారు. గల్వాన్ ఘర్షణల తర్వాత భారత్ టిక్‌టాక్‌ సహా అనేక చైనా యాప్‌లను నిషేధించిన విషయాన్ని ఈ సందర్భంగా కమిటీ గుర్తుచేసింది. ఈ చర్చల్లో క్వాడ్ కూటమి బలోపేతం వంటి అంశాలు కూడా ప్రస్తావనకు వచ్చినట్లు కమిటీ వివరించింది. భవిష్యత్తులో ఇరు దేశాల ఉమ్మడి ప్రయోజనాల దృష్ట్యా ఈ భాగస్వామ్యం మరింత ఉన్నత స్థాయికి చేరుకుంటుందని భారత రాయబారి క్వత్రా కూడా పునరుద్ఘాటించినట్లు ప్రకటనలో పేర్కొన్నారు.