Afghanistan: భారత్ తో కలసి నడుస్తాం.. పాకిస్తాన్ కు ఆఫ్గన్ స్ట్రాంగ్ కౌంటర్..!

ఆఫ్గనిస్తాన్ (Afghanistan) కు ఎంత చేసినా.. అది మాత్రం భారత్ తో సన్నిహిత సంబంధాలు కొనసాగిస్తోందని పాకిస్తాన్ ప్రభుత్వం ఆరోపిస్తోంది. లక్షలమంది అఫ్గాన్లకు తాము ఆశ్రయం కల్పించామని.. అలాంటి తమను వదిలి, ఆది నుంచి భారత్ తో రాసుకుపూసుకు తిరగడమేంటని పాక్ నేతలు ప్రశ్నిస్తున్నారు. అయితే తాము ఇప్పుడు ఓ దేశానికి పాలకులం అన్న విషయాన్ని పాక్ గుర్తించాలంటున్నారు తాలిబన్లు. తమ విదేశాంగ విధానంపై మీ పెత్తనమేంటని పాక్ ను ప్రశ్నిస్తున్నారు. తమ దేశ విశాల ప్రయోజనాల దృష్ట్యా తగిన నిర్ణయం తీసుకుంటామని తేల్చి చెబుతున్నారు.

తమ దేశానికి, పాకిస్థాన్‌కు మధ్య జరుగుతున్న సరిహద్దు ఘర్షణల వెనుక భారత్ హస్తం ఉందంటూ పాకిస్థాన్ చేస్తున్న ఆరోపణలను ఆఫ్ఘనిస్థాన్ తీవ్రంగా ఖండించింది. ఆ ఆరోపణలు పూర్తిగా నిరాధారమైనవని, అర్థరహితమని కొట్టిపారేసింది. ఈ క్లిష్ట సమయంలో భారత్‌తో తమ సంబంధాలను మరింత బలోపేతం చేసుకుంటామని స్పష్టం చేస్తూ పాకిస్థాన్‌కు గట్టి షాక్ ఇచ్చింది.

ఒక ఇంటర్వ్యూలో ఆఫ్ఘనిస్థాన్ రక్షణ మంత్రి మహ్మద్ యాకూబ్ కీలక వ్యాఖ్యలు చేశారు. “భారత్‌పై చేస్తున్న ఆరోపణలు నిరాధారమైనవి, అహేతుకమైనవి, ఏమాత్రం ఆమోదయోగ్యం కానివి. మా భూభాగాన్ని ఇతర దేశాలకు వ్యతిరేకంగా ఉపయోగించాలనే విధానం మాకు లేదు. ఒక స్వతంత్ర దేశంగా భారత్‌తో మాకు సంబంధాలు ఉన్నాయి. మా జాతీయ ప్రయోజనాల మేరకు ఆ బంధాన్ని మరింత పటిష్ఠం చేసుకుంటాం” అని తాలిబన్ వ్యవస్థాపకుడు ముల్లా ఒమర్ కుమారుడైన యాకూబ్ స్పష్టం చేశారు.

ఇటీవల అక్టోబర్ 11న ఆఫ్ఘనిస్థాన్-పాకిస్థాన్ సరిహద్దుల్లో ఘర్షణలు తీవ్రమయ్యాయి. తెహ్రీక్-ఇ-తాలిబన్ పాకిస్థాన్ (టీటీపీ) వంటి ఉగ్రవాద సంస్థలకు ఆఫ్ఘన్ ఆశ్రయం ఇస్తోందని పాకిస్థాన్ ఆరోపిస్తోంది. ఈ నేపథ్యంలోనే, ఆఫ్గనిస్థాన్‌తో తమ సంబంధాలు దెబ్బతినడానికి భారతే కారణమని, తాలిబన్ ప్రభుత్వం భారత్ ఒడిలో కూర్చొని తమపై ప్రాక్సీ యుద్ధం చేస్తోందని పాక్ రక్షణ మంత్రి ఖవాజా ఆసిఫ్ తీవ్ర ఆరోపణలు చేశారు.

పాకిస్థాన్ చేసిన ఈ ఆరోపణలను భారత్ కూడా దీటుగా తిప్పికొట్టింది. ఉగ్రవాద సంస్థలకు ఆశ్రయం కల్పిస్తూ, తమ అంతర్గత వైఫల్యాలను కప్పిపుచ్చుకోవడానికి పొరుగు దేశాలపై నిందలు వేయడం పాకిస్థాన్‌కు అలవాటేనని భారత విదేశాంగ శాఖ ప్రతినిధి రణధీర్ జైస్వాల్ బదులిచ్చారు.

ప్రస్తుతం తాలిబన్ ప్రభుత్వాన్ని భారత్ అధికారికంగా గుర్తించనప్పటికీ, ఇరు దేశాల మధ్య ఉన్నత స్థాయి అధికారుల మధ్య చర్చలు జరుగుతున్నాయి. ఈ తరుణంలో ఆఫ్ఘన్ రక్షణ మంత్రి చేసిన తాజా వ్యాఖ్యలు అంతర్జాతీయంగా ప్రాధాన్యత సంతరించుకున్నాయి.