Pakistan: మరో కొత్త ఉగ్రకూటమికి ఊపిరి పోస్తున్న పాక్.. !

ఆపరేషన్ సిందూర్ తో గట్టి ఎదురుదెబ్బ తగిలినా పాక్ ఉగ్ర విధానంలో మార్పు రాలేదు. ఇప్పటికీ దాయాది భారత్ ను ఎలా ఇబ్బంది పెట్టాలా..? ఎలా సీమాంతర ఉగ్రవాదాన్ని ఎగదోయాలా అని ప్రయత్నిస్తోంది. దీనిలో భాగంగా ఇప్పుడు మరో అడుగు ముందుకేసి ఉగ్రమూకలను కూడగట్టి కొత్త కూటమి ఏర్పాటు చేసింది. ఈ ఉగ్ర కూటమితో పాక్ వ్యతిరేక శక్తులపై దాడులు చేయడానికి ప్రణాళికలు చేస్తున్నట్లు తెలుస్తోంది. అందులో భాగంగా కాశ్మీర్‌లో కూడా అలజడులు సృష్టించడానికి సిద్ధమవుతున్నట్లు సమాచారం. ఈ తతంగాన్నంతా పాక్ ఇంటెలిజెన్స్ ఏజెన్సీ దగ్గరుండి పర్యవేక్షిస్తూ.. నిధులు సమకూరుస్తోందని తెలుస్తోంది.

పాక్ టెర్రర్ ఇన్‌ఫ్రాస్ట్రక్చర్‌ను మరింతగా విస్తరిస్తోంది. ఉగ్ర సంస్థలు లష్కరే తోయిబా (LeT), ఇస్లామిక్ స్టేట్ ఖొరాసన్ ప్రావిన్స్ (ISKP).. ఒక కూటమిగా ఏర్పడుతున్నాయి. ఈ ఆలోచన ఆచరణలోకి తీసుకొచ్చి.. నిధులు సమకూర్చుతోంది పాకిస్థాన్ ఇంటెలిజెన్స్ ఏజెన్సీ ఐఎస్ఐ. ఉగ్రవాదాన్నే దేశ విధానంగా, తమ ఆయుధంగా వాడుకుంటూ.. బలూచిస్తాన్‌తో పాటు అఫ్గానిస్థాన్, భారత్‌పై దృష్టి సారిస్తోంది.

తమకు సొంత దేశం కావాలని బలూచిస్తాన్ ఏళ్లుగా పోరాటం చేస్తోంది. ఈ మధ్య కాలంలో పాకిస్థాన్‌ సైన్యానికి కునుకు లేకుండా చేస్తున్నారు బలూచ్ రెబల్స్. బలూచిస్థాన్ జాతీయవాదులను అణిచివేయడానికి.. పాక్ మిలటరీ నియంత, ఆర్మీ చీఫ్ అసిమ్ మునీర్ ఉగ్రవాదులను రంగంలోకి దింపుతున్నారు. అందులో భాగంగా లష్కరే తోయిబా, ISKPని ఒకటి చేసి.. బలూచ్ రెబల్స్‌పై ఉసిగొల్పేందుకు ప్రణాళికలు రచించారు. అంతేకాకుండా అఫ్గనిస్తాన్‌లోని పాక్‌ వ్యతిరేక శక్తులను అంతమొందించడానికి కూడా ఈ ఉగ్ర కూటమిని ఉపయోగించుకునేందుకు పాకిస్తాన్ సమాయత్త మవుతున్నట్లు తెలుస్తోంది.

కాశ్మీర్‌లో అలజడి సృష్టించడానికి..!

కాశ్మీర్‌లోనూ ఈ ఉగ్రకూటమి అలజడులు సృష్టించేందుకు ప్రణాళికలు రచిస్తోందని తెలుస్తోంది. ఈ మేరకు ISKP ప్రచార పత్రిక ‘యల్గార్’.. ఇటీవలి విడుదల చేసిన సంచికల్లో.. కాశ్మీర్‌లో ఉగ్రవాద విస్తరణ గురించి ప్రణాళికలు ప్రస్తావించినట్లు సమాచారం. ఇది దక్షిణాసియాను అస్థిరపరిచేందుకు రూపొందించబడిన భయంకరమైన కొత్త దశ ఉగ్రవాదమని నిపుణులు ఆందోళన వ్యక్తం చేస్తున్నారు.

ఉగ్ర కూటమి ఏర్పడినట్లు వస్తున్న వార్తలకు.. ఓ ఫొటో మరింత బలం చేకూర్చింది. ISKP బలూచిస్తాన్ సమన్వయకర్త మీర్ షఫీక్ మెంగల్.. లష్కరే తోయిబా శక్తివంతమైన నజీమ్-ఎ-అలా రాణా మొహమ్మద్ అష్ఫాక్‌కు పిస్టల్‌ను అందజేసినట్లు ఆ ఫొటోలో కనిపిస్తోంది. దీంతో ఈ రెండు ఉగ్ర సంస్థల మధ్య అధికారికంగా సహాయ సహకారాలు ప్రారంభమైనట్లు నిఘా వర్గాలు భావిస్తున్నాయి.