France: అంతర్గత సంక్షోభంలో ఫ్రాన్స్… మాక్రాన్ కు వ్యతిరేకంగా వీధుల్లోకి ప్రజలు..

ఫ్రాన్స్ (France) లో హింసాగ్ని చెలరేగుతోంది. ఆదేశ అధ్యక్షుడు మాక్రాన్ (Macron) కు వ్యతిరేకంగా ఓ ఉద్యమం దావానలంలా మారింది. ఎవ్రీథింగ్ బ్లాక్ అంటూ యువత రోడ్డెక్కారు. దేశవ్యాప్తంగా రహదారులను దిగ్భందించారు.దహనం, నినాదాలు, గందరగోళం ప్రతిచోటా కనిపించాయి. అనేక బస్సులకు నిరసనకారులు నిప్పు పెట్టారు.

భద్రతా దళాలను భారీగా మోహరించినప్పటికీ, రాజధాని పారిస్‌తో సహా అనేక ప్రధాన నగరాల్లో పరిస్థితి మరింత దిగజారింది. ఫ్రెంచ్ రాజకీయాలు ఇప్పటికే సంక్షోభంలో ఉన్న సమయంలో ఈ తిరుగుబాటు జరుగుతోంది. ఇటీవల పార్లమెంటు విశ్వాస పరీక్షలో ప్రధాన మంత్రి ఫ్రాంకోయిస్ బేరో ఓటమిపాలయ్యారు. మాక్రాన్ తన పదవీకాలంలో ఐదవ ప్రధానమంత్రి సెబాస్టియన్ లెకోర్నును నియమించాల్సి వచ్చింది.

బ్లాక్ ఎవ్రీథింగ్ అంటే ఏమిటి?

బ్లాక్ అంటే సాధారణ ప్రదర్శన కాదు. దేశంలోని ప్రస్తుత రాజకీయ వ్యవస్థ ఇకపై ప్రజలకు ఉపయోగపడదు అనే ఆలోచనపై ఉద్యమం ఆధారపడింది. దీనిని రైట్ వింగ్ పక్షాలు ప్రారంభించాయి. కానీ ఇప్పుడు దానిని లెఫ్ట్ వింగ్, వామపక్ష శక్తుల చేతుల్లోకి చేరుకుంది. వ్యవస్థ పనిచేయకపోతే, దేశంలోని యంత్రాలను ఆపండి. ఈ ఆలోచనతో నిరసనకారులు ఆందోళన బాటపడ్డారు. రహదారులు, నగరాలు, రవాణా వ్యవస్థను నిలిపివేయాలని డిమాండ్ చేస్తున్నారు. అందుకే దీనిని “బ్లాక్ ఎవ్రీథింగ్” అని పిలుస్తున్నారు. పరిస్థితిని నియంత్రించడానికి, ప్రభుత్వం 80,000 మంది భద్రతా దళాలను మోహరించింది. వారిలో 6,000 మంది పారిస్‌లో మాత్రమే ఉన్నారు. ఈ ప్రదర్శనలలో సుమారు ఒక లక్ష మంది చేరవచ్చని ఫ్రెంచ్ మీడియా అంచనా వేసింది.

ఈ ఉద్యమం ఫ్రాన్స్‌కు ఖచ్చితంగా కొత్తదే, కానీ దాని ప్రతిధ్వని 2018 నాటి ఎల్లో వెస్ట్ తిరుగుబాటును గుర్తు చేస్తుంది. ఆ సమయంలో కూడా, పెరుగుతున్న ఇంధన ధరలపై కోపంగా ఉన్న ప్రజలు వీధుల్లోకి వచ్చారు. నిరసన క్రమంగా అధ్యక్షుడు మాక్రాన్ విధానాలకు వ్యతిరేకంగా పెద్ద ప్రజా ఉద్యమంగా మారింది. ఈసారి కూడా పరిస్థితి అలాగే ఉంది.