ప్రవాసులకు అత్యంత ఖరీదైన నగరం

ప్రవాసులు నివసించడానికి ప్రపంచంలోనే అత్యంత ఖరీదైన నగరంగా న్యూయార్క్‌ నిలిచింది. గతంలో ఈ స్థానంలో ఉన్న హాంకాంగ్‌ ఇప్పుడు ద్వితీయ స్థానానికి చేరింది. మరోవైపు అద్దెలు భారీగా పెరుగుతున్న నేపథ్యంగా సింగపూర్‌ ఈ జాబితాలో తొలి ఐదు స్థానాల్లోకి ఎగబాకింది. అధిక ద్రవ్యోల్బణం, అద్దెలు పెరగడమే న్యూయార్క్‌ లో ప్రవాసులు నివసించడం అత్యంత ఖరీదైన వ్యవహారంగా మారిందని ఈసీఏ ఇంటర్నేషనల్స్‌ కాస్ట్‌ ఆఫ్‌ లివింగ్‌ ర్యాంకింగ్స్‌ 2023 నివేదిక తెలిపింది. జెనీవా, లండన్‌ ఈ జాబితాలో వరుసగా మూడు, నాలుగు స్థానాల్లో ఉన్నాయి.

గత ఏడాది 13వ స్థానంలో ఉన్న సింగపూర్‌ ఈసారి ఏకంగా తొలి ఐదు నగరాల జాబితాలోకి ఎగబాకడం గమనార్హం. సాధారణంగా ఆసియా నగరాలు ఈ జాబితా కిందకు వెళుతూ ఉంటాయి. ఇతర ప్రాంతాల్లో పోలిస్తే ద్రవ్యోల్బణం తక్కువగా ఉండడమే దీనికి కారణం. కానీ ఈసారి ట్రెండ్‌కు భిన్నంగా సింగపూర్‌ పైకి ఎగబాకింది. ఈ జాబితాలో ఇస్తాంబుల్‌ ఏకంగా 95 స్థానాలు పైకి ఎగబాకి 108వ స్థానంలో నిలిచింది.  వినియోగ వస్తువులు, సేవల ధరలు, అద్దెలను ఆధారంగా చేసుకొని ఈసీఏ ఇంటర్నేషనల్‌ ఈ జాబితాను సిద్ధంగా చేస్తుంది. 120 దేశాల్లోని మొత్తం 207 నగరాలకు ర్యాంకులను కేటాయిస్తోంది.  ఈ జాబితాలో రష్యా 12వ స్థానంలో నిలిచింది. అమెరికాలోని దాదాపు అన్ని నగరాలు పైకి ఎగబాకాయి. శాన్‌ఫ్రాన్సిస్కో ఈసారి తొలి 10 నగరాల జాబితాలో చేరింది.