Revanth Vs BJP: రేవంత్ కేసులో తెలంగాణ బీజేపీకి షాక్..!

తెలంగాణ ముఖ్యమంత్రి రేవంత్ రెడ్డిపై (Revanth Reddy) తెలంగాణ బీజేపీ (Telangana BJP) దాఖలు చేసిన పరువు నష్టం దావాపై (defamation case) సుప్రీంకోర్టు (Supreme court) కీలక తీర్పు వెలువరించింది. 2024 లోక్‌సభ ఎన్నికల సందర్భంగా రేవంత్ రెడ్డి చేసిన ఒక ప్రసంగంలో తమ పార్టీపై విద్వేషపూరిత, అసత్య వ్యాఖ్యలు చేశారని ఆరోపిస్తూ బీజేపీ ఈ పిటిషన్‌ను దాఖలు చేసింది. అయితే ఈ కేసును సుప్రీంకోర్టు కొట్టివేసింది. రాజకీయ పోరాటాలకు కోర్టును వేదికగా ఉపయోగించుకోవద్దని బీజేపీకి (TBJP) స్పష్టమైన సందేశం ఇచ్చింది. ఈ కేసు విచారణ సందర్భంగా చీఫ్ జస్టిస్ బీఆర్ గవాయ్ నేతృత్వంలోని బెంచ్ బీజేపీ తరఫు న్యాయవాదిపై అసహనం వ్యక్తం చేశారు. రూ.10 లక్షల జరిమానా విధిస్తామని హెచ్చరించారు.

2024 లోక్‌సభ ఎన్నికల ప్రచార సమయంలో రేవంత్ రెడ్డి ఒక బహిరంగ సభలో బీజేపీపై విమర్శలు చేశారు. బీజేపీ అధికారంలోకి వస్తే రిజర్వేషన్లను రద్దు చేస్తుందని రేవంత్ ఆరోపించారు. ఇది అసత్యమని, పార్టీ ప్రతిష్ఠకు భంగం కలిగించే విధంగా ఉందని బీజేపీ తెలంగాణ శాఖ ఆగ్రహం వ్యక్తం చేసింది. ఈ వ్యాఖ్యలపై 2024 మే 4న బీజేపీ రాష్ట్ర ప్రధాన కార్యదర్శి తరఫున హైకోర్టులో పరువు నష్టం దావా దాఖలైంది. అయితే తెలంగాణ హైకోర్టు ఈ పిటిషన్‌ను 2025 ఆగస్టు 1న కొట్టివేసింది. రాజకీయ ప్రసంగాలు, ముఖ్యంగా ఎన్నికల సమయంలో చేసే వ్యాఖ్యలు తరచూ అతిశయోక్తులతో ఉంటాయని, వీటిని పరువు నష్టం దావాగా పరిగణించడం సమంజసం కాదని హైకోర్టు తీర్పు ఇచ్చింది. ఈ తీర్పును సవాలు చేస్తూ బీజేపీ సుప్రీంకోర్టును ఆశ్రయించింది.

సుప్రీంకోర్టులో ఇవాళ చీఫ్ జస్టిస్ బీఆర్ గవాయ్, న్యాయమూర్తులు కె. వినోద్ చంద్రన్, అతుల్ ఎస్. చంద్రూకర్‌లతో కూడిన బెంచ్ ముందు ఈ కేసు విచారణకు వచ్చింది. రేవంత్ రెడ్డి వ్యాఖ్యలు పార్టీ ఇమేజ్‌ను దెబ్బతీశాయని, ఇది రాజకీయ ప్రచారంలో బూటకపు ఆరోపణలకు దారితీసిందని బీజేపీ తరఫు న్యాయవాది వాదించారు. అయితే, సుప్రీంకోర్టు ఈ వాదనలను అంగీకరించలేదు. రాజకీయ నాయకులు తమ ప్రసంగాల్లో విమర్శలు చేయడం సహజమని, ఇటువంటి విషయాలను కోర్టు వేదికగా తీసుకురావడం సముచితం కాదని న్యాయస్థానం స్పష్టం చేసింది. రాజకీయ విమర్శలను రాజకీయంగానే ఎదుర్కోవాలని, కోర్టులను ఈ వివాదాల్లోకి లాగడం సరికాదని న్యాయమూర్తులు తెలిపారు.

విచారణ సందర్భంగా బీజేపీ న్యాయవాది తమ వాదనలను పొడిగించే ప్రయత్నం చేయడంతో చీఫ్ జస్టిస్ బీఆర్ గవాయ్ అసహనం వ్యక్తం చేశారు. “మీరు ఈ వాదనలను కొనసాగిస్తే, 10 లక్షల రూపాయల జరిమానా విధిస్తాం” అని హెచ్చరించారు. ఈ హెచ్చరిక కేసు తీవ్రతను, అలాగే కోర్టు సమయాన్ని వృథా చేయడంపై న్యాయస్థానం అసంతృప్తిని స్పష్టం చేసింది. చివరకు, సుప్రీంకోర్టు ఈ పిటిషన్‌ను కొట్టివేస్తూ, రేవంత్ రెడ్డిపై ఎటువంటి చర్యలు అవసరం లేదని తీర్పు ఇచ్చింది.

కాంగ్రెస్ నాయకులు ఈ తీర్పును స్వాగతించారు. బీజేపీ కేవలం రాజకీయ కక్షసాధింపు కోసమే ఈ కేసును దాఖలు చేసిందని విమర్శించారు. మరోవైపు, బీజేపీ నాయకులు ఈ తీర్పుపై అసంతృప్తి వ్యక్తం చేశారు. తమ పార్టీ ఇమేజ్‌ను దెబ్బతీసే వ్యాఖ్యలను ఎదుర్కోవడానికి తాము రాజకీయంగా పోరాడుతామని పేర్కొన్నారు. అయితే రాజకీయ వ్యాఖ్యలపై కోర్టులకు వచ్చి సమయాన్ని వృథా చేయడం, జరిమానా విధిస్తామని హెచ్చరించడం రాజకీయ నాయకుల లిమిట్స్ ను సుప్రీంకోర్టు గుర్తు చేసింది. రాజకీయ విమర్శలను రాజకీయంగానే ఎదుర్కోవాలనే సూత్రాన్ని బలపరిచింది.