Jagan: వైసీపీలో ముందే మొదలైన సీట్ల హడావుడి.. 2029పై ఇప్పటి నుంచే లెక్కలు..

వైసీపీ (YSR Congress Party) లో ఇప్పుడు నుంచే సీట్ల చర్చలు మొదలయ్యాయా అనే ప్రశ్న రాజకీయ వర్గాల్లో చక్కర్లు కొడుతోంది. 2024 ఎన్నికలు ముగిసి ఏడాది కూడా పూర్తికాకముందే, రాబోయే 2029 ఎన్నికలపై దృష్టి పెట్టిన నేతలు తమకు అనుకూలమైన నియోజకవర్గాల కోసం ప్రయత్నాలు మొదలుపెట్టినట్టు ప్రచారం జరుగుతోంది. అధికార పార్టీకి గానీ, విపక్షానికి గానీ గట్టిగా పని చేసే సమయం రెండు నుంచి మూడేళ్లే ఉంటుందని రాజకీయ లెక్కలు చెబుతాయి. అందుకే ముందే వ్యూహాలు సిద్ధం చేసుకోవాలని భావిస్తున్నట్టు కనిపిస్తోంది.

ఈ నేపధ్యంలో వైసీపీ నేతలు తమకు గెలిచే అవకాశం ఉన్న సీట్ల కోసం అధినేత వైఎస్ జగన్‌మోహన్ రెడ్డి (YS Jagan Mohan Reddy) వద్దకు వెళ్లి వినతులు పెట్టుకుంటున్నారన్న మాట వినిపిస్తోంది. ఇందులో సీనియర్ నాయకులూ ఉన్నారని చెబుతున్నారు. గుంటూరు జిల్లా (Guntur District) రాజకీయాల్లో కీలకంగా ఉన్న గురజాల మాజీ ఎమ్మెల్యే కాసు మహేష్ రెడ్డి (Kasu Mahesh Reddy) పేరు ఈ చర్చల్లో ప్రముఖంగా వినిపిస్తోంది. ఆయన 2019 ఎన్నికల్లో గురజాల నుంచి గెలిచినా, 2024లో ఓటమి ఎదుర్కొన్నారు.

ఇప్పుడు ఆయన వచ్చే ఎన్నికల కోసం ముందే ప్లానింగ్ చేస్తున్నారని అంటున్నారు. అయితే మళ్లీ గురజాల నుంచే పోటీ చేయాలన్న ఆసక్తి ఆయనలో పెద్దగా లేదని ప్రచారం సాగుతోంది. బదులుగా నరసరావుపేట (Narasaraopet) అసెంబ్లీ సీటుపై ఆయన దృష్టి పెట్టినట్టు రాజకీయ వర్గాలు చెబుతున్నాయి. కాసు కుటుంబానికి రాజకీయంగా బలమైన నేపథ్యం నరసరావుపేటలోనే ఏర్పడిందని, అక్కడ కుటుంబానికి పెద్ద సామాజిక బలం ఉందని ఆయన అంచనా వేస్తున్నారట. అందుకే అక్కడి నుంచి పోటీ చేస్తే విజయం సాధించవచ్చన్న నమ్మకంతో జగన్‌కు విన్నపాలు చేస్తున్నారని వార్తలు వస్తున్నాయి.

కానీ నరసరావుపేటలో ఇప్పటికే సీనియర్ వైసీపీ నేత డాక్టర్ గోపిరెడ్డి శ్రీనివాసరెడ్డి (Dr. Gopireddy Srinivasa Reddy) ఉన్నారు. ఆయన రెండు సార్లు అక్కడి నుంచి గెలిచిన అనుభవం ఉన్న నేత. 2024లో ఓటమి వచ్చినా, పార్టీపై పట్టున్న నాయకుడిగా గుర్తింపు ఉంది. వైద్యుడిగా కూడా మంచి పేరు సంపాదించారు. అంతేకాదు, ఆయన కూడా జగన్‌కు అత్యంత సన్నిహితుడే కావడం ఈ సీటు విషయంలో సంక్లిష్టతను పెంచుతోంది.

ఇద్దరూ కీలక నేతలే కావడంతో ఈ విషయంలో జగన్‌కు కూడా తేల్చడం కష్టమేనని విశ్లేషకులు అంటున్నారు. కాసు గురజాలను వదిలేస్తే అక్కడ కొత్త అభ్యర్థిని వెతకాల్సి వస్తుంది. మరోవైపు గురజాల నియోజకవర్గం టీడీపీకి (TDP) బలమైన కోటగా మారిందన్న అభిప్రాయం ఉంది. గత ఎన్నికల చరిత్ర చూస్తే టీడీపీ ఎక్కువసార్లు గెలిచిన సీటే కావడం విశేషం. అలాంటి చోట 2029లో పోటీ చేయడం వైసీపీకి సవాలుగా మారుతుందన్న అంచనాతోనే సీటు మార్పు ఆలోచనలు జరుగుతున్నాయా అన్న చర్చ సాగుతోంది.

ఈ వ్యవహారంపై ఇప్పట్లో జగన్ స్పష్టమైన నిర్ణయం తీసుకునే అవకాశం లేదని పార్టీ వర్గాలు భావిస్తున్నాయి. సరైన సమయం వచ్చినప్పుడు అన్ని అంశాలు తూకం వేసి నిర్ణయం తీసుకుంటారని అంటున్నారు. అప్పటివరకు వైసీపీలో సీట్ల పంచాయతీపై చర్చలు మరింత వేడెక్కే అవకాశముందని రాజకీయ పరిశీలకులు అభిప్రాయపడుతున్నారు.