Pawan Kalyan: అడవి ఏనుగుల సమస్యకు స్మార్ట్ సొల్యూషన్

ఆంధ్రప్రదేశ్‌ (Andhra Pradesh) ఉప ముఖ్యమంత్రి పవన్ కళ్యాణ్ (Pawan Kalyan) తాజాగా తన వినూత్న ఆలోచనలతో పాలనలో ప్రత్యేక గుర్తింపు తెచ్చుకుంటున్నారు. ముఖ్యమంత్రి చంద్రబాబు నాయుడు (Chandrababu Naidu) విధానాన్ని అనుసరిస్తూనే, దానిని మించి ఆధునిక టెక్నాలజీ ఆధారంగా రాష్ట్ర సమస్యలకు పరిష్కార మార్గాలు కనుగొనడంలో ముందంజ వేస్తున్నారు. పాలనలో నూతన ఆవిష్కరణలకు ప్రాధాన్యం ఇస్తూ పవన్ తీసుకుంటున్న నిర్ణయాలు ప్రజల్లో చర్చనీయాంశంగా మారాయి.

ప్రస్తుతం పంచాయతీరాజ్, గ్రామీణాభివృద్ధి, అటవీశాఖల బాధ్యతలు నిర్వర్తిస్తున్న పవన్, పర్యావరణ పరిరక్షణకు విశేష శ్రద్ధ చూపిస్తున్నారు. అడవుల్లో నివసించే ప్రజల భద్రతకు, అలాగే వన్యప్రాణుల సంరక్షణకు సమతౌల్యం సాధించాలనే దిశగా ఆయన పలు చర్యలు చేపడుతున్నారు. గత కొన్నేళ్లుగా చిత్తూరు (Chittoor), శ్రీకాకుళం (Srikakulam), పార్వతీపురం మన్యం (Parvathipuram Manyam) జిల్లాల్లో ప్రజలను తీవ్రంగా ఇబ్బందులకు గురి చేస్తున్న అడవి ఏనుగుల సమస్యను పరిష్కరించేందుకు పవన్ తీసుకున్న నిర్ణయం ప్రశంసలు పొందుతోంది.

గజరాజులు గ్రామాల్లోకి ప్రవేశించి పంటలను నాశనం చేయడం, కొన్నిసార్లు ప్రాణనష్టం కలగడం వంటి సంఘటనలు తరచుగా జరుగుతుండటంతో ప్రభుత్వం తీవ్రంగా ఆందోళన చెందింది. ఈ నేపథ్యంలో పవన్ కల్యాణ్‌ కర్ణాటక (Karnataka) ప్రభుత్వంతో చర్చించి అక్కడి నుండి నాలుగు శిక్షణ పొందిన కుంకీ ఏనుగులను ఆంధ్రప్రదేశ్‌కు తెప్పించారు. ఇవి గజరాజుల గుంపులను తిరిగి అడవుల్లోకి నడిపించేందుకు ఉపయోగపడుతున్నాయి. అయితే విస్తారమైన అటవీప్రాంతాల్లో ఈ పద్ధతి పూర్తిస్థాయిలో సఫలీకృతం కావడం కష్టమని గుర్తించిన పవన్ మరో ప్రత్యామ్నాయ మార్గాన్ని అన్వేషించారు.

చంద్రబాబు తరహాలో టెక్నాలజీని సమర్థంగా ఉపయోగించాలనే ఆలోచనతో పవన్ ఏఐ (AI) ఆధారిత పరిష్కారాన్ని ప్రవేశపెట్టారు. ఈ సాంకేతికత ద్వారా ఏనుగులు గ్రామాల దగ్గరకు వస్తే స్వయంచాలకంగా గన్‌షాట్‌లా వినిపించే శబ్దాలు ఉత్పత్తి అవుతాయి. ఈ శబ్దం విన్న వెంటనే ఏనుగులు భయంతో అడవుల వైపు తిరిగి వెళ్తాయి. సోలార్ ప్యానెళ్లతో పనిచేసే ఈ వ్యవస్థను అటవీశాఖ అధికారులు విజయవంతంగా ప్రయోగించారు. ఇటీవల సోషల్ మీడియాలో వైరల్ అయిన వీడియోలో ఒక ఏనుగు పొలాల్లోకి దిగగానే సెన్సార్ పనిచేసి గన్ శబ్దం వినిపించడంతో అది వెంటనే వెనక్కి పరిగెత్తిన దృశ్యం కనిపించింది.

ఈ వినూత్న ఆలోచనకు గ్రామస్థులు, నెటిజన్లు అభినందనలు తెలుపుతున్నారు. రాష్ట్రవ్యాప్తంగా ఈ పద్ధతిని విస్తరించాలనే ఆలోచనలో పవన్ ఉన్నట్లు సమాచారం. ఇతర రాష్ట్రాలు కూడా ఈ టెక్నాలజీపై ఆసక్తి చూపిస్తున్నాయి. ఏనుగుల సమస్యతో బాధపడుతున్న ఒడిశా (Odisha), తమిళనాడు (Tamil Nadu), కేరళ (Kerala), మహారాష్ట్ర (Maharashtra) వంటి రాష్ట్రాలు ఆంధ్రప్రదేశ్ విధానాన్ని తెలుసుకోవడానికి ముందుకొస్తున్నాయి. పవన్ పాలనలో టెక్నాలజీ వినియోగం ద్వారా ప్రజల సమస్యలను పరిష్కరించే ఈ ప్రయత్నం ఆయనకు పాలనా పరంగా కొత్త గుర్తింపును తెచ్చిందని విశ్లేషకులు పేర్కొంటున్నారు.