AP Politics: పార్టీలు రెడీ.. కానీ షెడ్యూల్ డిలే! ఏపీ స్థానిక ఎన్నికలపై కొత్త చర్చ..

ఆంధ్రప్రదేశ్‌ (Andhra Pradesh) లో స్థానిక సంస్థల ఎన్నికలపై రాజకీయ వాతావరణం ఒక్కసారిగా వేడెక్కుతోంది. ఎన్నికలకు ఇంకా అధికారిక షెడ్యూల్ రాకపోయినా, పార్టీలు మాత్రం ముందుగానే కసరత్తు మొదలుపెట్టాయి. జనసేన (Jana Sena ), తెలుగుదేశం పార్టీ (TDP) వంటి కూటమి భాగస్వాములు క్షేత్రస్థాయిలో బలపడేందుకు చర్యలు చేపడుతున్నారు. మండలాలు, గ్రామాల వారీగా కమిటీల ఏర్పాటు వేగంగా సాగుతోంది. త్వరలోనే ఎన్నికల ముహూర్తం ఖరారవుతుందన్న ప్రచారం కూడా రాజకీయ వర్గాల్లో ఊపందుకుంది. ముఖ్యంగా టీడీపీ ఈ ఎన్నికలను ప్రతిష్టాత్మకంగా తీసుకుని పార్లమెంటరీ స్థాయి వరకు కమిటీలు సిద్ధం చేసుకోవడం విశేషం.

ఇక ప్రభుత్వ యంత్రాంగం కూడా ఎన్నికల సన్నాహాల్లో ముందడుగు వేసింది. రాష్ట్ర ఎన్నికల సంఘం (State Election Commission) ఈ ప్రక్రియపై దృష్టి సారించింది. రాష్ట్ర ఎన్నికల ప్రధాన అధికారి నీలం సాహ్ని (Neelam Sahni) ఇప్పటికే అధికారులతో సమావేశాలు నిర్వహించారు. ఈసారి స్థానిక ఎన్నికలను ఈవీఎంలు (EVMs) ద్వారా నిర్వహించాలన్న ఆలోచనలో ఉన్నారు. అయితే దీనికి కేంద్ర ఎన్నికల సంఘం (Election Commission of India) అనుమతి అవసరం. అదే సమయంలో ఓటర్ల జాబితాల నవీకరణ పనులు కూడా క్షేత్రస్థాయిలో కొనసాగుతున్నాయి.

ఇలాంటి పరిస్థితుల్లో అనూహ్యంగా ఒక కొత్త అంశం తెరపైకి వచ్చింది. ఈ ఏడాది స్థానిక సంస్థల ఎన్నికలు జరిగే అవకాశాలు తగ్గుతున్నాయన్న వాదన బలపడుతోంది. కారణం కుల గణన (Caste Census), జనగణన (Population Census). ఈ రెండు ప్రక్రియలు పూర్తయిన తర్వాతే ఎన్నికలు నిర్వహించే అవకాశం ఉందని అధికారులు సంకేతాలు ఇస్తున్నట్లు సమాచారం. దీంతో ఈ ఏడాది ఎన్నికలు వాయిదా పడతాయని, ముందుగా కుల గణన, ఆ తర్వాత వచ్చే ఏడాది జనగణన జరగవచ్చన్న చర్చ నడుస్తోంది.

జనగణన అనేది కేంద్ర గణాంక శాఖ (Office of the Registrar General & Census Commissioner) ప్రతి పది సంవత్సరాలకు ఒకసారి నిర్వహించే కీలక ప్రక్రియ. దీని ఆధారంగానే కేంద్ర, రాష్ట్ర ప్రభుత్వాలు అనేక విధాన నిర్ణయాలు తీసుకుంటాయి. 2011లో జరిగిన జనగణన తర్వాత 2021లో మళ్లీ జరగాల్సి ఉండగా, కరోనా (COVID-19) కారణంగా అది వాయిదా పడింది. అనంతరం 2024 ఎన్నికలకు ముందు కొన్ని రాష్ట్రాలు అభ్యంతరం వ్యక్తం చేయడంతో కేంద్ర ప్రభుత్వం ఈ ప్రక్రియను మరింత ఆలస్యం చేసింది.

ఇప్పుడు తాజా సమాచారం ప్రకారం, ముందుగా కుల గణన చేపట్టి, దాని తర్వాత పూర్తిస్థాయి జనగణన నిర్వహించే ఆలోచనలో ప్రభుత్వం ఉన్నట్లు తెలుస్తోంది. ఈ రెండు ప్రక్రియలు పూర్తయ్యేలోపు 2028 వచ్చేస్తుందని, ఆ తర్వాతే స్థానిక సంస్థల ఎన్నికలకు మార్గం సుగమమవుతుందన్న అభిప్రాయం రాజకీయ వర్గాల్లో వినిపిస్తోంది. కొద్ది రోజుల క్రితం ఎన్నికల సన్నాహాలు మొదలైనట్టే కనిపించినా, జనగణన అంశం ముందుకు రావడంతో షెడ్యూల్ మారే సూచనలు స్పష్టమవుతున్నాయి.మొత్తానికి, పార్టీలు ఎంతగా సిద్ధమవుతున్నా, అధికారిక నిర్ణయాలు మాత్రం జనగణన పూర్తి అయిన తర్వాతే వచ్చే అవకాశముందని పరిశీలకులు భావిస్తున్నారు. దీంతో స్థానిక ఎన్నికలపై ఉన్న ఉత్కంఠ మరింత పెరుగుతోంది.