Chandrababu: చంద్రబాబుకు సవాల్ గా మారుతున్న సొంత పార్టీ ఎమ్మెల్యేలు..

ఎంత ఎదిగినా వినయంగా ఉండటం చాలా ముఖ్యం. ఇది సామాన్యులకే కాదు, రాజకీయ నాయకులకు కూడా వర్తించే అంశం. రాజకీయాల్లో డబ్బు కంటే విధేయత, వినయం, సేవా మనసే ఎక్కువ విలువైనవి. ఈ లక్షణాలతోనే అనేక నాయకులు పదవులు సంపాదించి, ఆ పదవులకు గౌరవం తెచ్చుకున్నారు. కానీ ఇప్పటి రాజకీయాల్లో ఆ విలువలు క్రమంగా కనుమరుగవుతున్నాయి. విధేయత అనే పదం వినిపించడమే కాదు, కనపడటమే కష్టమైపోయింది. రాజకీయ నాయకులు చిన్న ఇబ్బంది ఎదురైనా వెంటనే అసంతృప్తి వ్యక్తం చేస్తున్నారు. పార్టీకి, పార్టీ అధినేతకు వ్యతిరేకంగా వెళ్లడమూ సాధారణమైపోయింది. ఇది ఇది కేవలం ఒక్క పార్టీకి సంబంధించిన సమస్య కాదు, దేశవ్యాప్తంగా అన్ని పార్టీల్లోనూ ఇదే పరిస్థితి కనిపిస్తోంది.

ఆంధ్రప్రదేశ్ (Andhra Pradesh) లో ఇటీవల తెలుగు దేశం పార్టీ (TDP) నేతలు కూడా ఇలాంటి వివాదాల్లో చిక్కుకుంటున్నారు. కొంతమంది ఎమ్మెల్యేలు (MLAs) పార్టీ లైన్ దాటి వ్యవహరిస్తున్నారు. ముఖ్యంగా ఇసుక, మద్యం వంటి అంశాలపై చర్చలు రావడం పార్టీ ప్రతిష్ఠకు మైనస్‌గా మారుతోంది. ఆశ్చర్యకరమైన విషయం ఏమిటంటే — ఈ వార్తలు ప్రత్యర్థి మీడియా ద్వారా కాకుండా, పార్టీకి అనుకూలమైన కొన్ని మీడియా సంస్థల నుంచే బయటకు వస్తున్నాయి. ఇలాంటి పరిణామాల నేపథ్యంలో పార్టీ అధినేత నారా చంద్రబాబు నాయుడు (Chandrababu Naidu) పదేపదే హెచ్చరికలు జారీ చేస్తున్నారు. పార్టీ క్రమశిక్షణ కమిటీ ముందు కొంతమందిని నిలబెట్టి వార్నింగ్ ఇస్తున్నారు. “ఇంకోసారి చేస్తే కఠిన చర్యలు తప్పవు” అంటూ స్పష్టంగా చెబుతున్నారు. కానీ కొద్ది రోజులకే పరిస్థితి మామూలు స్థితికి చేరుతోంది.

ఇటీవల జరిగిన మంత్రివర్గ సమావేశంలో ముఖ్యమంత్రి చంద్రబాబు నాయుడు ఈ వ్యవహారాన్ని ప్రస్తావించి, దూకుడుగా వ్యవహరిస్తున్న ఎమ్మెల్యేలపై మంత్రులు నియంత్రణ చూపాలని ఆదేశించారు. అయితే జిల్లాల్లో మంత్రులు, ఎమ్మెల్యేల మధ్య ఆధిపత్య పోటీలు కొనసాగుతూనే ఉన్నాయి. దీంతో పార్టీ అంతర్గతంగా ఉద్రిక్తతలు పెరుగుతున్నాయి. ఈ అంతర్గత విభేదాలను పరిష్కరించాల్సిన పార్టీ అధినాయకత్వం, పరిస్థితులను మరీ సున్నితంగా ఎదుర్కొంటోందని కొంతమంది సీనియర్ నాయకులు అభిప్రాయపడుతున్నారు. పార్టీ పట్ల క్రమశిక్షణ కాస్త బలహీనమవుతోందని కూడా విమర్శలు వినిపిస్తున్నాయి.

ఇలాంటి సమయంలో పార్టీ లోపలే కొన్ని కఠిన నిర్ణయాలు తీసుకోవడం తప్పనిసరిగా మారిందని సీనియర్లు సూచిస్తున్నారు. కనీసం ఒకరిపైనైనా దృఢమైన చర్య తీసుకుంటే, పార్టీ మొత్తం క్రమశిక్షణ పునరుద్ధరించబడుతుందని వారు అభిప్రాయపడుతున్నారు. ప్రస్తుతం చంద్రబాబు నాయుడు ఎదుర్కొంటున్న ప్రధాన సవాలు — పార్టీని బలంగా ఉంచుతూ, నేతల్లో శ్రద్ధ, విధేయత, క్రమశిక్షణను తిరిగి నెలకొల్పడమే. రాజకీయాల్లో వినయం మరియు విధేయత అనే రెండు విలువలు పునరుద్ధరించబడకపోతే, ఎంత శక్తివంతమైన పార్టీ అయినా పునాదులు కదలడం కన్ఫామ్. మరి చంద్రబాబు తన పార్టీలో చెలరేగుతున్న ఈ విపత్తును ఎలా ఎదుర్కొంటారు, ఎమ్మెల్యేలను ఎలా నియంత్రిస్తారు అన్న విషయం ఆసక్తికరంగా మారింది..