Kethireddy: జూనియర్ ఎన్టీఆర్ రాజకీయ ప్రవేశంపై కేతిరెడ్డి జ్యోస్యం..

ఆంధ్రప్రదేశ్ రాజకీయ వేదికపై మరోసారి జూనియర్ ఎన్టీఆర్ (Jr NTR) పేరు గట్టిగా వినిపిస్తోంది. ధర్మవరం మాజీ ఎమ్మెల్యే కేతిరెడ్డి వెంకటరామిరెడ్డి (Kethireddy Venkatarami Reddy) చేసిన వ్యాఖ్యలు తెలుగు రాష్ట్రాల్లో రాజకీయ చర్చలకు కొత్త మలుపు తీసుకొచ్చాయి. చాలా కాలంగా వినిపిస్తున్న జూనియర్ ఎన్టీఆర్ రాజకీయ ప్రవేశంపై ఊహాగానాలకు ఆయన మాటలు మరోసారి బలం చేకూర్చినట్లుగా భావిస్తున్నారు.

ఒక ఇంటర్వ్యూలో మాట్లాడుతూ జూనియర్ ఎన్టీఆర్ రాజకీయాల్లోకి రావాలన్న ఆలోచనపై వైసీపీ అధినేత వైఎస్ జగన్‌మోహన్‌రెడ్డి (Y. S. Jagan Mohan Reddy) ఏమనుకుంటున్నారన్న ప్రశ్నకు కేతిరెడ్డి ఆసక్తికరంగా స్పందించారు. ప్రస్తుత రాజకీయ వ్యవస్థలో జూనియర్ ఎన్టీఆర్ ఒక కొత్త తరహా నాయకుడని, ఆయన లాంటి వ్యక్తి రాజకీయాల్లోకి వస్తే రాజకీయ స్థాయి పెరుగుతుందని..జగన్ కూడా భావించి ఉండవచ్చని వ్యాఖ్యానించారు. ఈ వ్యాఖ్యలు రాజకీయ వర్గాల్లోనే కాకుండా సోషల్ మీడియాలోనూ పెద్ద చర్చకు దారి తీశాయి.

ఇదే సమయంలో తెలుగుదేశం పార్టీలో (Telugu Desam Party) పెద్ద సంఖ్యలో నేతలు, కార్యకర్తలు జూనియర్ ఎన్టీఆర్ రాజకీయాల్లోకి రావాలని కోరుకుంటున్నారని కేతిరెడ్డి తెలిపారు. దాదాపు 70 నుంచి 80 శాతం మంది ఆయనను ఎన్టీఆర్ కుటుంబానికి నిజమైన రాజకీయ వారసుడిగా చూస్తున్నారన్న అభిప్రాయం అక్కడ బలంగా ఉందన్నారు. ఈ వ్యాఖ్యలు టీడీపీ వర్గాల్లో కూడా చర్చనీయాంశంగా మారాయి.

తెలుగు రాష్ట్రాల రాజకీయాలపై కూడా కేతిరెడ్డి కీలక వ్యాఖ్యలు చేశారు. వైసీపీకి చెందిన 80 నుంచి 90 శాతం మంది నేతలు తెలంగాణలో భారత రాష్ట్ర సమితి (Bharat Rashtra Samithi) విజయం సాధించాలని కోరుకుంటున్నారని అన్నారు. అదే విధంగా బీఆర్ఎస్‌లోని మెజారిటీ నేతలు ఆంధ్రప్రదేశ్‌లో వైసీపీ గెలవాలని ఆకాంక్షిస్తారని పేర్కొన్నారు. దీనికి కారణంగా కేసీఆర్ (K. Chandrashekar Rao), కేటీఆర్ (K. T. Rama Rao)లకు జగన్‌తో ఉన్న సన్నిహిత సంబంధాలు, అలాగే రేవంత్ రెడ్డి (Revanth Reddy), చంద్రబాబు నాయుడు (N. Chandrababu Naidu)లను రాజకీయంగా ఎదుర్కోవాలన్న ఉద్దేశమేనని ఆయన అభిప్రాయపడ్డారు.

గతాన్ని పరిశీలిస్తే జూనియర్ ఎన్టీఆర్ ఒక దశలో తెలుగుదేశం పార్టీ తరఫున చురుగ్గా ప్రచారం చేశారు. ముఖ్యంగా 2009 ఎన్నికల సమయంలో రాష్ట్రవ్యాప్తంగా పర్యటించి పార్టీకి ప్రచారం నిర్వహించారు. ఆ తర్వాత రాజకీయ పరిణామాల కారణంగా ఆయనకు, పార్టీకి మధ్య దూరం పెరిగింది. అప్పటి నుంచి ఆయన పూర్తిగా రాజకీయాలకు దూరంగా ఉంటూ సినిమా రంగంపైనే దృష్టి పెట్టారు. అయినా సరే, కాలక్రమేణా జూనియర్ ఎన్టీఆర్ రాజకీయాల్లోకి రావాలన్న డిమాండ్ మాత్రం తగ్గలేదు. అభిమానులు, కొంతమంది రాజకీయ నేతలు తరచూ ఈ అంశాన్ని తెరపైకి తీసుకొస్తూనే ఉన్నారు. అయితే ఈ విషయంలో ఆయన ఇప్పటివరకు స్పష్టమైన ప్రకటన చేయలేదు. తాజా కేతిరెడ్డి వ్యాఖ్యలతో ఈ చర్చ మళ్లీ ఊపందుకోవడం, ఆంధ్రప్రదేశ్ రాజకీయాల్లో కొత్త కలకలాన్ని రేపుతోంది.