YCP MLC: బీజేపీ గూటికి జకియా ఖానం.. వైసీపీకి మరో షాక్

ఆంధ్రప్రదేశ్ రాజకీయాల్లో వైఎస్ఆర్ కాంగ్రెస్ పార్టీ (YSRCP)కి మరో ఎదురుదెబ్బ తగిలింది. శాసన మండలి డిప్యూటీ ఛైర్‌పర్సన్, ఎమ్మెల్సీ జకియా ఖానం (Zakiya Khanam) తన ఎమ్మెల్సీ పదవికి, అలాగే పార్టీ ప్రాథమిక సభ్యత్వానికి రాజీనామా చేశారు. ఈ మేరకు ఆమె శాసన మండలి ఛైర్మన్ కె. మోషెన్ రాజుకు (Moshen Raju) రాజీనామా లేఖను అందజేశారు. వ్యక్తిగత సిబ్బంది ద్వారా ఈ లేఖను పంపినట్లు సమాచారం. జకియా ఖానం రాజీనామాతో వైసీపీ నుంచి ఇప్పటివరకు ఆరుగురు ఎమ్మెల్సీలు (MLC) రాజీనామా చేసినట్లయింది. అయితే జకియా ఖానం బీజేపీలో చేరబోతున్నట్టు తెలుస్తోంది.

జకియా ఖానం అన్నమయ్య జిల్లా రాయచోటికి (Rayachoti) చెందిన నాయకురాలు. 2020 జులైలో గవర్నర్ కోటాలో ఆమెను ఎమ్మెల్సీగా నామినేట్ చేశారు. అప్పటి నుంచి ఆమె పార్టీలో కీలక పాత్ర పోషిస్తూ వచ్చారు. అయితే గత రెండేళ్లుగా ఆమె పార్టీలో అసంతృప్తితో ఉన్నట్లు సమాచారం. ఈ నేపథ్యంలో ఆమె రాజీనామా నిర్ణయం పార్టీలో చర్చనీయాంశంగా మారింది. ఆమె రాజీనామా కారణాలపై ఆమె స్పష్టమైన వివరణ ఇవ్వలేదు.

2024 ఎన్నికల్లో వైసీపీ ఘోర పరాజయం తర్వాత ఆ పార్టీకి రాజీనామాలు కొనసాగుతున్నాయి. జకియా ఖానంతో సహా ఇప్పటివరకు ఆరుగురు ఎమ్మెల్సీలు పార్టీని వీడారు. కర్రి పద్మశ్రీ, పోతుల సునీత, జయమంగళ వెంకటరమణ, బల్లి కల్యాణ్ చక్రవర్తి, మర్రి రాజశేఖర్‌లు ఇప్పటికే తమ ఎమ్మెల్సీ పదవులకు, పార్టీ సభ్యత్వానికి రాజీనామా చేశారు. అయితే, ఈ రాజీనామాలను శాసన మండలి ఛైర్మన్ ఇంతవరకూ ఆమోదించలేదు. దీంతో ఈ రాజీనామాల చట్టబద్ధతపై సందిగ్ధత నెలకొంది.

వైఎస్ఆర్‌సీపీ 2024 ఎన్నికల్లో కేవలం 11 ఎమ్మెల్యే సీట్లతో పరిమితమైంది. దీంతో ప్రతిపక్ష హోదా కూడా కోల్పోయింది. ఈ నేపథ్యంలో పార్టీలో అసంతృప్తి తీవ్రమైంది. శాసన మండలిలో వైసీపీకి 32 మంది సభ్యులున్నారు. అయితే వరుస రాజీనామాలతో ఈ సంఖ్య తగ్గిపోతోంది. జకియా ఖానం రాజీనామా వెనుక రాజకీయ ఒత్తిళ్లు, పార్టీలో అంతర్గత సమస్యలు ప్రధాన కారణాలని సమాచారం. ఆమె గత కొంతకాలంగా పార్టీ కార్యకలాపాలకు దూరంగా ఉంటున్నారు. ఈ రాజీనామాలతో వైఎస్ఆర్‌సీపీ మరింత బలహీనపడే అవకాశం ఉంది. శాసన మండలిలో ఎన్డీఏ కూటమి బలం పెరుగుతున్న నేపథ్యంలో, వైఎస్ఆర్‌సీపీ నుంచి మరిన్ని రాజీనామాలు ఉంటాయనే ఊహాగానాలు వినిపిస్తున్నాయి. ఇటీవల ఐదుగురు ఎన్డీఏ అభ్యర్థులు ఎమ్మెల్యే కోటాలో ఎమ్మెల్సీలుగా ఎన్నికైన సంగతి తెలిసిందే.

వైసీపీ అధ్యక్షుడు జగన్‌మోహన్ రెడ్డి ఈ రాజీనామాలపై ఇంతవరకూ స్పందించలేదు. పార్టీలో అంతర్గత సమస్యలను పరిష్కరించడంలో ఆయన విఫలమవుతున్నారనే విమర్శలు వినిపిస్తున్నాయి. రాజీనామా చేసిన నాయకులు భవిష్యత్తులో ఎన్డీఏ కూటమిలో చేరే అవకాశం ఉందని కూడా ఊహాగానాలు సాగుతున్నాయి. తాజాగా రాజీనామా చేసిన జకియా ఖానం బీజేపీలో చేరేందుకు ఆసక్తి చూపిస్తున్నట్టు తెలుస్తోంది. నేడో రేపో ఆమె కమలం కండువా కప్పుకునే అవకాశం ఉంది.