AP Liquor Scam: ఏపీ రాజకీయాలలో అలజడి రేపుతున్న లిక్కర్ స్కాం మూడో చార్జ్‌షీట్‌..

ఆంధ్రప్రదేశ్ (Andhra Pradesh) రాజకీయాల్లో మళ్లీ మద్యం కుంభకోణం (Liquor Scam) చర్చనీయాంశంగా మారింది. దాదాపు 3,500 కోట్ల రూపాయల అవినీతి జరిగినట్లు ఆరోపణలు వస్తున్న ఈ కేసులో దర్యాప్తు బృందం ఇప్పటికే రెండు చార్జిషీట్లు సమర్పించగా, తాజాగా మూడవ చార్జిషీట్ కూడా వెలుగులోకి వచ్చింది. ఇందులో కొన్ని అంశాలు బయటకు రావడంతో కేవలం ఈ కేసు పరంగా మాత్రమే కాకుండా రాజకీయంగా, ఎన్నికల వ్యవస్థ పరంగా కూడా కొత్త చర్చలు మొదలయ్యాయి.

ఈ చార్జిషీట్‌లో గత ఎన్నికల్లో వైసీపీ (YCP) నాయకులు భారీ ఎత్తున డబ్బులు ఖర్చు చేసి ఓట్లు కొనుగోలు చేశారన్న ఆరోపణలు స్పష్టంగా ప్రస్తావించబడ్డాయి. అధికారుల నివేదిక ప్రకారం, మద్యం ముడుపుల రూపంలో తీసుకున్న కోట్లాది రూపాయలు తరువాత ఓటర్లను ఆకర్షించేందుకు వినియోగించబడ్డాయట. ఇది నిజమని నిరూపితమైతే, ప్రజాస్వామ్యం పట్ల చాలా పెద్ద అనుమానాలు తలెత్తుతాయని పరిశీలకులు అంటున్నారు.

ప్రజాస్వామ్యంలో ఎన్నికలు నిష్పాక్షికంగా, న్యాయంగా జరగాలి అన్నది ప్రాథమిక నియమం. కానీ డబ్బు శక్తిని వినియోగించి ఓటర్లను ప్రభావితం చేస్తే ప్రజాస్వామ్య వ్యవస్థ బలహీనమవుతుంది అన్నది ఇప్పుడు చర్చలో ప్రధానాంశం. ఎన్నికల సమయంలో ఓట్లు కొనుగోలు చేసిన విషయంపై అప్పట్లో ఎన్నికల సంఘం (Election Commission) ఎలా స్పందించిందో, అధికారులు ఏమి చర్యలు తీసుకున్నారో అనే ప్రశ్నలు పెద్ద ఎత్తున వినిపిస్తున్నాయి.

ప్రత్యర్థి పార్టీల పాత్రపై కూడా ఇప్పుడు ప్రశ్నలు లేవుతున్నాయి. వైసీపీ మాత్రమే కాకుండా ఇతర రాజకీయ పార్టీలు కూడా ఇటువంటి ప్రయత్నాలు చేశాయా లేదా అన్నది కూడా తేలాల్సి ఉంది అని మేధావులు భావిస్తున్నారు. ఎందుకంటే, ఒకవైపు ఈ కేసులో చార్జిషీట్లు సమర్పించబడుతుంటే మరోవైపు అన్ని పార్టీలూ ఎన్నికల్లో డబ్బు వినియోగించకుండా ఉన్నాయా అనే సందేహం ప్రజల్లో నెలకొంది.

తాజాగా కోర్టుకు సమర్పించిన మూడవ చార్జిషీట్ ప్రకారం, ఈ స్కాం లోని సింహభాగం మొత్తాన్ని ఓటర్లను ప్రభావితం చేయడానికి ఉపయోగించారన్న ఆరోపణ చాలా తీవ్రమైనది. ఇది నిజమని తేలితే, గత ఎన్నికలు పూర్తిగా అనైతిక పద్ధతుల్లో జరిగాయన్న వాదన బలపడుతుంది. దీనిపై కొందరు నిపుణులు ఆ ఎన్నికలను రద్దు చేయాల్సిన పరిస్థితి రావచ్చని అభిప్రాయం వ్యక్తం చేస్తున్నారు.

ఇక ఈ వ్యవహారంపై సామాజిక సంస్థలు, ప్రజాస్వామ్య హక్కుల కోసం పోరాడే సంఘాలు కోర్టు ద్వారానే పరిష్కారం కోసం వెళ్ళాలని సూచనలు వినిపిస్తున్నాయి. సోషల్ మీడియా నుంచి ప్రధాన మీడియా వరకు ఈ అంశం చర్చనీయాంశం అవుతుంది. ముఖ్యంగా “ఎన్నికల సమయంలో డబ్బు ప్రభావాన్ని అడ్డుకోవడంలో అధికారులు విఫలమయ్యారా?” అనే ప్రశ్న బలంగా వినిపిస్తోంది.

మొత్తం మీద మద్యం కుంభకోణం కేసులో బయటకు వస్తున్న వివరాలు కేవలం అవినీతి పరంగా కాకుండా దేశ ప్రజాస్వామ్య వ్యవస్థ బలహీనతలను బయటపెడుతున్నాయి. ఈ అంశంపై కోర్టు ఏ విధంగా స్పందిస్తుందో, భవిష్యత్తులో ఎన్నికలపై దీని ప్రభావం ఎలా ఉంటుందో అన్నది ఇప్పుడు అందరి దృష్టిని ఆకర్షిస్తోంది.