బంగ్లాదేశ్ యువత రోల్ మోడల్ నహీద్ ఇస్లామ్…!

బంగ్లాదేశ్ సర్కార్ కుప్పకూలడంలో కీలకపాత్ర పోషించిన కుర్రాడి పేరు నహీద్ ఇస్లామ్. రిజర్వేషన్లకు వ్యతిరేకంగా చిన్నగా మొదలైన నిరసనలు కాస్తా.. దేశాన్ని రగల్చడంతో నహీద్ మీడియా దృష్టిని ఆకర్షించాడు.ఉద్యమంలో భాగంగా బంగ్లాదేశ్‌ పతాకాన్ని నుదుటకు చుట్టుకొని తరచూ ఆందోళనల్లో మీడియాకు కనిపించాడు. మొత్తం ఉద్యమాన్ని సమన్వయం చేశాడు. ఢాకా విశ్వవిద్యాలయంలో సోషియాలజీ విద్యార్థి నహీద్ ఇస్లామ్.

ఈ ఏడాది జులైలో రిజర్వేషన్లకు వ్యతిరేకంగా నహిద్‌, మరికొందరు విద్యార్థులు ఆందోళన చేస్తుండటంతో పోలీసులు అరెస్టు చేశారు. తొలిసారిగా బంగ్లాదేశ్‌ ప్రజల దృష్టిని ఆకర్షించాడు. ఆ తర్వాత అదే ఉద్యమం తుపానుగా మారి ప్రభుత్వాన్ని చుట్టుముట్టింది. ఈ ఘర్షణల్లో 300 మంది విద్యార్థులు మరణించారు. వీరిలో చాలా మంది వివిధ విశ్వవిద్యాలయాలకు చెందినవారు. దీంతో హసీనా పదవికి రాజీనామా చేసి భారత్‌కు వెళ్లిపోయారు.

హసీనా ప్రభుత్వం కుప్పకూలినా.. కొత్త ప్రభుత్వం విషయంలో మాత్రం నహీద్ , ఇతర విద్యార్థులు రాజీపడడం లేదు. ఈ విద్యార్థుల బృందం సైన్యం లేదా ప్రత్యామ్నాయ ప్రభుత్వాన్ని అంగీకరించడంలేదు. నోబెల్‌ గ్రహీత మహమ్మద్‌ యూనిస్‌ చీఫ్‌ అడ్వైజర్‌గా ప్రభుత్వం ఏర్పాటు చేయాలని కోరుతున్నారు. విద్యార్థి ఉద్యమం ఆమోదం లేని ఏ ప్రభుత్వాన్ని అంగీకరించబోమని నహిద్‌ ఫేస్‌బుక్‌ పోస్టులో పేర్కొన్నాడు.

1998 సంవత్సరంలో ఢాకాలో నహిద్‌ జన్మించాడు. అతడి తండ్రి ఓ టీచర్‌. అతడి సోదరుడు నఖిబ్‌. అతడు కూడా ఈ ఉద్యమంలో పాల్గొన్నాడు. దేశంలో మార్పు రావాలని తన సోదరుడు ఎప్పుడు తపించేవాడన్నారు నఖిబ్. అతడిని పోలీసులు అరెస్టు చేసి.. స్పృహతప్పేలా హింసించారు. ఆ తర్వాత రోడ్డుపై పారేశారు. అయినా భయపడకుండా పోరాటాన్ని కొనసాగించాడు’’ అని పేర్కొన్నాడు. ఇప్పుడీ నహీద్.. దేశయువతకు రోల్ మోడల్ గా మారాడు.