Washington: అమెరికాది దురాక్రమణే.. ఖండించిన రష్యా, చైనా, క్యూబా, ఇరాన్

వెనెజువెలాపై అమెరికా దాడులపై అంతర్జాతీయంగా తీవ్ర వ్యతిరేకత వ్యక్తమైంది. ఈ దాడిని రష్యా, చైనా, క్యూబా, ఇరాన్ తీవ్రంగా ఖండించాయి. యూరోపియన్ దేశాలు మధ్యవర్తిత్వం వహించేందుకు ముందుకొచ్చాయి.

‘వెనెజువెలాపై అమెరికా వైమానిక దాడులు సైనిక దురాక్రమణ కిందకే వస్తాయి. విధ్వంస చర్యలకు తావులేకుండా.. విదేశీ సైనిక జోక్యం లేని విధంగా వెనెజువెలా తన సొంత భవితను నిర్ణయించుకునే హక్కుండాలి. పరిస్థితి మరింత దిగజారకుండా సంప్రదింపుల ద్వారా సమస్యను పరిష్కరించుకోవాలి. వెనెజువెలా ప్రజలకు, ప్రభుత్వానికి మా మద్దతు ఉంటుంది. ఈ విషయమై ఐక్యరాజ్య సమితి భద్రతా మండలి అత్యవసర సమావేశం ఏర్పాటు చేయాలని డిమాండు చేస్తున్నాం’ అని రష్యా విదేశాంగశాఖ స్పష్టం చేసింది.

అంతర్జాతీయ చట్టాలను అమెరికా ఉల్లంఘించిందని చైనా స్పష్టం చేసింది. ఆ దేశం జరిపిన వైమానిక దాడులను ఖండించింది. ఈ ఘటనతో దిగ్భ్రాంతి చెందామని చైనా విదేశాంగశాఖ వ్యాఖ్యానించింది. వెనెజువెలాతో తమకు వ్యూహాత్మక భాగస్వామ్యం ఉందని స్పష్టం చేసింది. గత రెండు దశాబ్దాలుగా వెనెజువెలాకు అతి పెద్ద చమురు కొనుగోలుదారుగా చైనా ఉంది.

వెనెజువెలాపై దాడులమీద అంతర్జాతీయ సమాజం స్పందించాలని క్యూబా డిమాండు చేసింది. ఇది నేరపూరిత దాడి అని ఆ దేశాధ్యక్షుడు మిగెల్‌ డియాజ్‌-కానెల్‌ బెర్ముడెజ్‌ స్పష్టం చేశారు. తమ ప్రాంతంలో శాంతిని అమెరికా దారుణంగా భగ్నం చేసిందని ఆరోపించారు.

వెనెజుెవెలాకు శాంతియుత, ప్రజాస్వామ్యయుత, సమ్మిళిత పరిష్కారాన్ని కోరుకుంటున్నామని ప్రజాస్వామిక మార్పు కోసం వెనెజువెలా ప్రజల వెంట నిలుస్తామని యూరోపియన్ యూనియన్ అధ్యక్షురాలు ఉర్సులా వాండర్‌ లెయెన్‌ పేర్కొన్నారు.

‘వెనెజువెలాపై అమెరికా జరిపిన ఆపరేషన్‌తో బ్రిటన్‌కు సంబంధం లేదు. ఈ విషయంపై అమెరికా అధ్యక్షుడు ట్రంప్‌ నుంచి మరిన్ని వివరాలు తెలుసుకుంటాం. అంతర్జాతీయ చట్టాలను సమర్థించాలని నేను విశ్వసిస్తాను. శరవేగంగా మారుతున్న పరిస్థితుల్లో ముందు వాస్తవాలను తెలుసుకుందాం’ అని బ్రిటన్‌ ప్రధాని కీర్‌ స్టార్మర్‌ వ్యాఖ్యానించారు.

‘ఉద్రిక్తతలను తగ్గించాలని, బాధ్యతగా వ్యవహరించాలని పిలుపునిస్తున్నాం. అంతర్జాతీయ చట్టాలను, ఐక్యరాజ్యసమితి చార్టర్‌ను గౌరవించాలి’ అని స్పెయిన్‌ ప్రధాని పెడ్రో సాంచెజ్‌ స్పష్టం చేశారు.

‘వెనెజువెలా సరిహద్దుల్లో సైన్యాన్ని మోహరిస్తున్నాం. ఓఏఎస్‌ (ఆర్గనైజేషన్‌ ఆఫ్‌ అమెరికన్‌ స్టేట్స్‌), ఐక్యరాజ్య సమితిని వెంటనే సమావేశం కావాలని కోరుతున్నాం’ అని కొలంబియా అధ్యక్షుడు గుస్తావో పెట్రో పేర్కొన్నారు. ‘వెనెజువెలాపై జరిగిన దాడి కలవరపెడుతోంది. దీన్ని మేం ఖండిస్తున్నాం’ అని చిలీ అధ్యక్షుడు గాబ్రియల్‌ బోరిక్‌ తెలిపారు.