Amaravati: అమరావతి రీలాంచ్‌.. ఇంత హంగామా అవసరమా..?

ఆంధ్రప్రదేశ్ రాజధాని అమరావతి పునఃప్రారంభోత్సవం (Amaravati Relaunch) కోసం రాష్ట్ర ప్రభుత్వం భారీ ఏర్పాట్లు చేస్తోంది. మే 2న ప్రధానమంత్రి నరేంద్ర మోదీ (PM Narendra Modi) ఈ కార్యక్రమానికి హాజరు కానున్నారు. రూ.లక్ష కోట్ల విలువైన అభివృద్ధి పనులకు శంకుస్థాపన చేయనున్నారు. అయితే ఈ హంగామాతో కూడిన రీలాంచ్‌పై విమర్శలు, సెటైర్లు వెల్లువెత్తుతున్నాయి. ఇప్పటికే అప్పుల ఊబిలో కూరుకుపోయిన ఆంధ్రప్రదేశ్‌కు (Andhra Pradesh) ఈ ఖర్చు అవసరమా అనే ప్రశ్నలు తలెత్తుతున్నాయి. పదేళ్ల క్రితం అమరావతికి మోదీ శంకుస్థాపన చేసిన నేపథ్యంలో మళ్లీ ఆయనతోనే రీలాంచ్ చేయాల్సిన అవసరం ఏముందని కొందరు ప్రశ్నిస్తున్నారు.

2015లో దసరా సందర్భంగా అమరావతి నిర్మాణానికి ప్రధాని నరేంద్ర మోదీ శంకుస్థాపన చేశారు. అప్పటి తెలుగుదేశం పార్టీ (TDP) ప్రభుత్వం రాజధానిని ప్రపంచ స్థాయిలో నిర్మిస్తామని హామీ ఇచ్చింది. దీనికి ప్రధాని నరేంద్ర మోదీ మట్టి, నీళ్లు తెచ్చి శంకుస్థాపన చేయడంపై విమర్శలు వచ్చాయి. ఇది ఆంధ్రప్రదేశ్‌ను అవమానించినట్లు కొందరు భావించారు. 2019లో వైఎస్సార్ కాంగ్రెస్ పార్టీ (YCP) అధికారంలోకి రాగానే, అమరావతిని పక్కనపెట్టి మూడు రాజధానుల ప్రతిపాదనను తెరపైకి తెచ్చింది. ఈ ఐదేళ్లలో అమరావతి నిర్మాణం పూర్తిగా స్తంభించింది. అయితే ఈ అంశంపై ప్రధాని మోదీ ఎన్నడూ వైసీపీని ప్రశ్నించలేదు.

2024 ఎన్నికల్లో టీడీపీ నేతృత్వంలోని కూటమి అధికారంలోకి రాగానే అమరావతిని మళ్లీ ప్రాధాన్యతగా తీసుకుంది. మే 2న ప్రధాని మోదీ రాకతో ఈ ప్రాజెక్టును గ్రాండ్‌గా రీలాంచ్ చేయడానికి సన్నాహాలు జోరందుకున్నాయి. 5 లక్షల మంది పాల్గొనేలా బహిరంగ సభ, అమరావతి 3డీ నమూనా ప్రదర్శన, రూ.77,000 కోట్ల పనుల ప్రారంభం వంటి ఏర్పాట్లు చేస్తున్నారు. ఈ కార్యక్రమం కోసం కోట్ల రూపాయలు ఖర్చు చేస్తున్నారు. రాష్ట్రం ఇప్పటికే దాదాపు రూ.10 లక్షల కోట్లకు పైగా అప్పుల్లో ఉంది. ఇలాంటప్పుడు ఈ అదనపు ఖర్చులు అనవసరమా అనే విమర్శలు వస్తున్నాయి.

2015లో శంకుస్థాపన సమయంలో మోదీ వరాలు కురిపిస్తారని అందరూ ఆశించారు. అయితే ఆయన మట్టి, నీళ్లతో సరిపెట్టారు. దీంతో చాలా మంది నిట్టూర్చారు. ఇప్పుడు కూడా మోదీ వరాల వర్షం కురిపించే అవకాశం లేదని విమర్శకులు అంటున్నారు. “మరోసారి మట్టి, నీళ్లు ఇచ్చి వెళ్తారేమో” అనే సెటైర్లు సోషల్ మీడియాలో కనిపిస్తున్నాయి. రాష్ట్రానికి ప్రత్యేక హోదా, ఆర్థిక సాయం వంటి కీలక అంశాలపై మోదీ ఎలాంటి హామీలు ఇవ్వబోరని, అలాంటి వాటిపై ఆశలు పెట్టుకోవద్దని కొందరు సూచిస్తున్నారు. రాజకీయంగా మోదీ, చంద్రబాబుల సానుకూల ఇమేజ్‌ను పెంచేందుకునేందుకు ఈ హంగామా చేస్తున్నారనే ఆరోపణలు వస్తున్నాయి.

అమరావతి రీలాంచ్ ఆంధ్రప్రదేశ్ రాజకీయ, ఆర్థిక భవిష్యత్తుకు కీలకమైన అడుగు కావచ్చు. కానీ రాష్ట్రం అప్పుల భారంలో ఉన్న సమయంలో ఈ హంగామా అనవసర ఖర్చుగా మారుతుందా అనే ఆందోళనలు ఉన్నాయి. ప్రధాని మోదీ రాక రాష్ట్రానికి ఆర్థిక సాయం, ప్రత్యేక హోదా వంటి హామీలను తెస్తే ఈ రీలాంచ్ సఫలమవుతుంది. లేకపోతే, ఇది కేవలం రాజకీయ ఆడంబరంగా మిగిలిపోయే ప్రమాదం ఉంది.