Turkey: కృతజ్ఞత లేని టర్కీ .. సాయం మరిచి భారత్‌పై విద్వేషం

2023లో టర్కీలో సంభవించిన భారీ భూకంపం (Turkey Earth Quake) వేలాది మంది ప్రాణాలను కోల్పోయారు. ఈ సమయంలో భారత్ తొలి సాయం ప్రకటించింది. ‘ఆపరేషన్ దోస్త్’ (Operation Dosth) పేరిట ఎన్డీఆర్ఎఫ్ బృందాలు, వైద్య సామగ్రి, ఆహారం, కిసాన్ డ్రోన్లను టర్కీకి పంపించింది. ఈ సాయం బాధితులకు ఎంతగానో ఉపయోగపడింది. అయితే, ఇప్పుడు టర్కీ ఆ సాయాన్ని పూర్తిగా మరిచిపోయింది. భారత్‌పై విద్వేషం చూపిస్తూ పాకిస్తాన్‌కు అడుగడుగునా అండగా నిలుస్తోంది.

పహల్గాంలో జరిగిన ఉగ్రదాడిలో (Pahalgam Terror Attack) 26 మంది పర్యాటకులు ప్రాణాలు కోల్పోయారు. ఈ దాడిని అంతర్జాతీయ సమాజం ఖండించినప్పటికీ, టర్కీ అధ్యక్షుడు ఎర్డోగాన్ (Recep Tayyip Erdoğan) మాత్రం పట్టించుకోలేదు. బాధితుల కుటుంబాలకు సానుభూతి వ్యక్తం చేయకుండా, పాకిస్తాన్ ప్రధాని షెహబాజ్ షరీఫ్‌తో (Muhammad Shehbaz Sharif) సమావేశమై మద్దతు ప్రకటించారు. ఈ ఉద్రిక్తతల నడుమ, పాకిస్తాన్ భారత్‌పై (India) ఇటీవల 300-400 డ్రోన్లతో దాడికి ప్రయత్నించింది. భారత్ ఈ డ్రోన్లను (Turkey Drones) కూల్చివేసింది. ఫోరెన్సిక్ పరీక్షల్లో ఈ డ్రోన్లు టర్కీ తయారు చేసిన అసిస్‌గార్డ్ సోంగర్ డ్రోన్లుగా గుర్తించారు. ఈ సంఘటన భారత్‌పై టర్కీ ద్వేషాన్ని, పాకిస్తాన్‌తో సైనిక సహకారాన్ని బహిర్గతం చేసింది.

పహల్గాం దాడి తర్వాత భారత్ ప్రతీకార చర్యలకు సిద్ధమవుతుందని టర్కీ ఊహించింది. ఈ నేపథ్యంలో, టర్కీ ఆరు సి-130 హెర్క్యులస్ విమానాల ద్వారా పాకిస్తాన్‌కు ఆయుధాలు పంపింది. ఈ విమానాలు ఏప్రిల్ 27న పాకిస్తాన్‌లో దిగినట్లు నిఘా సంస్థలు గుర్తించాయి. టర్కీ యుద్ధనౌక టీజీసీ బుయుకడా కూడా కరాచీ తీరానికి చేరుకుంది. ఈ ఆయుధాలను పాకిస్తాన్ ఇప్పుడు భారత్‌పై ప్రయోగిస్తోంది.

భారత్‌పై టర్కీ ద్వేషానికి పలు కారణాలున్నాయి. ముఖ్యంగా కశ్మీర్ అంశంలో టర్కీ ఎప్పుడూ పాకిస్తాన్‌కు మద్దతు ఇస్తోంది. ఎర్డోగాన్ ఐరాసలో కశ్మీర్‌ను వివాదాస్పద ప్రాంతంగా పేర్కొంటూ భారత్‌ను విమర్శించారు. టర్కీ, పాకిస్తాన్ మధ్య బలమైన రక్షణ సంబంధాలు, డ్రోన్ల ఎగుమతులు ఈ ద్వేషాన్ని బలపరుస్తున్నాయి. ఎర్డోగాన్ ఇస్లామిక్ ప్రపంచంలో నాయకత్వం కోరుకుంటున్నారు. భారత్‌లో ముస్లిం సమాజంపై జరిగిన కొన్ని సంఘటనలను విమర్శించడం ద్వారా ఎర్డోగాన్ వైఖరి ఏంటో అర్థం చేసుకోవచ్చు. అంతేకాక పాకిస్తాన్, అజర్‌బైజాన్‌లతో కూటమిగా ఏర్పడి భారత్‌ను అడ్డుకోవాలని టర్కీ చూస్తోంది.

భారత్ చేసిన సాయానికి టర్కీ కనీస కృతజ్ఞత కూడా చూపలేదు. ఎర్డోగాన్ రాజకీయ ప్రాధాన్యతలు, పాకిస్తాన్‌తో సంబంధాలు, వ్యక్తిగత ద్వేషం దీనికి కారణాలు. అంతర్జాతీయ ఒత్తిళ్ల మధ్య టర్కీ పాకిస్తాన్‌తో సంబంధాలను బలోపేతం చేసుకోవడానికి ఇష్టపడుతోంది. టర్కీ చర్యలు భారత్‌లో ఆగ్రహాన్ని రేకెత్తించాయి. భారత్ ఈ దాడులను అంతర్జాతీయ వేదికలపై లేవనెత్తే అవకాశం ఉంది. దౌత్యపరంగా టర్కీపై ఒత్తిడి తెచ్చే అవకాశం ఉంది. భారత రక్షణ వ్యవస్థలు డ్రోన్ దాడులను తిప్పికొట్టడం దేశ సామర్థ్యాన్ని చాటింది.