POK: మళ్లీ పీఓకెలో ఉగ్ర శిక్షణ.. ఎల్ఓసీ వెంబడి ఉగ్రవాద శిబిరాలు ఏర్పాటు చేస్తున్న పాక్

పహల్గామ్ ఉగ్రదాడి తర్వాత భారత్ .. పాక్ ఉగ్రవాదంపై కఠిన వైఖరి అవలంభించింది. ఆపరేషన్ సిందూర్ పేరుతో ఉగ్రశిబిరాలపై విరుచుకుపడింది. ఎల్ఓసీ వెంబడి ఉగ్రవాద శిబిరాలను నేలమట్టం చేసింది. వందమందికి పైగా ఉగ్రవాదులను ఏరివేసింది.తోకముడిచి ఉగ్రవాదులంతా పరారయ్యారు. తాజాగా ఉగ్రవాదులంతా తిరిగి వస్తున్నట్లుగా నిఘా వర్గాలు గుర్తించాయి. ధ్వంసమైన ప్రాంతాల్లోనే తిరిగి ఉగ్రవాద లాంచ్ ప్యాడ్‌లు, శిక్షణా శిబిరాలను పాకిస్థాన్ పునర్నిర్మిస్తున్నట్లు భారత నిఘా వర్గాలు గుర్తించాయి. పాకిస్తాన్ సైన్యం, గూఢచారి సంస్థ ఇంటర్-సర్వీసెస్ ఇంటెలిజెన్స్ (ISI), ప్రభుత్వం యొక్క పూర్తి మద్దతుతో ఈ ప్రయత్నాలు జరుగుతున్నట్లుగా గుర్తించింది.

నిఘా, దాడుల నుంచి తప్పించుకోవడానికి ఎల్‌వోసీలోని దట్టమైన అటవీ ప్రాంతంలో హైటెక్ ఉగ్రవాద సౌకర్యాలను అభివృద్ధి చేస్తున్నట్లు నిఘా వర్గాలు గుర్తించాయి. ఆపరేషన్ సిందూర్ తర్వాత.. లష్కరే తోయిబా (LeT), జైషే మొహమ్మద్ (JeM), హిజ్బుల్ ముజాహిదీన్, ది రెసిస్టెన్స్ ఫ్రంట్ (TRF) వంటి గ్రూపులు పరారయ్యాయి. తిరిగి అవే గ్రూప్‌లను ప్రభుత్వమే ప్రోత్సహిస్తున్నట్లుగా తెలుస్తోంది. లూని, పుట్వాల్, టిప్పు పోస్ట్, జమిల్ పోస్ట్, ఉమ్రాన్వాలి, చాప్రార్ ఫార్వర్డ్, చోటా చక్, జంగ్లోరా వంటి ప్రాంతాల్లో శిబిరాలు వెలసినట్లుగా గుర్తించాయి. ఆధునిక సాంకేతిక పరిజ్ఞానాలతో తిరిగి నిర్మిస్తున్నట్లు నిఘా వర్గాలు చెబుతున్నాయి. ఈ ప్రాంతాలన్నీ దట్టమైన అడవులు కలిగి ఉంటాయి. డ్రోన్, క్షిపణి దాడుల నుంచి తప్పించుకునే అవకాశాలు ఉంటాయి. ఈ నేపథ్యంలోనే ఉగ్రవాదులంతా ఈ ప్రాంతాలను ఎంచుకున్నట్లు సమాచారం.

దీనికి తోడు సాక్షాత్తూ పాక్ ఆర్మీచీఫ్ మునీర్ సైతం.. కశ్మీర్ ఉగ్రవాదులను స్వాతంత్ర సమరయోధులుగా సంభోదించారు. సో.. ఇప్పుడు కశ్మీర్ ఉగ్రవాదులకు .. పాకిస్తాన్ ప్రభుత్వం నేరుగా సాయం అందించే పరిస్థితులు కనిపిస్తున్నాయి. దీంతో ఆపరేషన్ సిందూర్ పేరుతో భారత్ చేసిన యుద్ధ ఫలితం నీరుగారే పరిస్థితి కనిపిస్తోంది. ఇప్పుడు వీరిని ఎదుర్కొనేందుకు భారత్.. ఎలాంటి చర్యలు చేపట్టనుందన్నది ఆసక్తికరంగా మారింది.

ఏప్రిల్ 22న పహల్గామ్ ఉగ్ర దాడిలో 26 మంది చనిపోయారు. అనంతరం భారత్.. పాకిస్థాన్‌పై కఠిన నిర్ణయాలు తీసుకుంది. ఇక మే 7న పాకిస్థాన్‌పై ఆపరేషన్ సిందూర్ చేపట్టింది. ఈ దాడుల్లో 100 మంది ఉగ్రవాదులు హతమయ్యారు. అంతేకాకుండా పాకిస్థాన్ వైమానిక స్థావరాలు దెబ్బతిన్నాయి. అయితే ఉగ్ర కార్యకలాపాలను నిలువరిస్తామని పాకిస్థాన్ కాళ్ల బేరానికి రావడంతో భారత్ కాల్పుల విరమణకు అంగీకరించింది. తీరా ఇన్ని రోజులకు దాయాది దేశం తన బుద్ధిని పోనిచ్చుకోలేదు. తిరిగి ఉగ్రవాదులను ప్రోత్సహిస్తూ.. భారత్‌కు వ్యతిరేకంగా ఉగ్ర శిబిరాలను ఏర్పాటు చేయిపిస్తోంది.