Apple: యాపిల్‌కు  డొనాల్డ్‌ ట్రంప్‌ అల్టిమేటం… అమెరికాలోనే 

ఐఫోన్లను అమెరికాలోనే తయారు చేయాలంటూ యాపిల్‌ (Apple) కంపెనీపై అధ్యక్షుడు డొనాల్డ్‌ ట్రంప్‌ (Donald Trump)  మరింతగా ఒత్తిడి పెంచారు. భారత్‌తో సహా మరెక్కడ ఉత్పత్తి చేసినా 25 శాతం దిగుమతి సుంకం  తప్పదంటూ తాజాగా అల్టిమేటం జారీ చేశారు. అమెరికా (America) లో విక్రయించే ఐఫోన్లను ఇక్కడే తయారు చేయాలని యాపిల్‌ చీఫ్‌ టిమ్‌ కుక్‌ (Tim Cook) కు ఎప్పుడో చెప్పా. భారత్‌లోనే, మరో దేశంలోనే తయారు చేస్తామంటే కుదరదని స్పష్టం చేశా. కానీ ఆయన వినడం లేదు. అందుకే యాపిల్‌  ఉత్పత్తులపై 25 శాతం టారిఫ్‌ విధించాలని నిర్ణయించా అని ట్రంప్‌ వెల్లడిరచారు. టారిఫ్‌ల భారాన్ని తగ్గించుకునేందుకు ఐఫోన్ల తయారీని చైనా (China)  నుంచి భారత్‌కు మార్చాలని కుక్‌      నిర్ణయించడం తెలిసిందే. ఈ నేపథ్యంలో ట్రంప్‌ ఇలా టారిఫ్‌ బాంబు పేల్చారు. గత వారం పశ్చిమాసియాలో పర్యటనలో సమయంలో ఆయన ఈ విషయాన్ని ప్రస్తావించడం తెలిసిందే. అమెరికా నిర్ణయంతో ఐఫోన్ల ధరలకు రెక్కలొచ్చే  అవకాశం కన్పిస్తోంది. అదే జరిగితే ఫోన్ల అమ్మకాలు పడిపోయి సంస్థ లాభాలపై ప్రభావం పడనుంది. ట్రంప్‌  టారిఫ్‌లతో తలెత్తిన అనిశ్చితి, ద్రవ్యోల్బణ ఒత్తిళ్లకు ఎలా స్పందించాలో తెలియక అమెజాన్‌ (Amazon) , వాల్‌మార్ట్‌ (Walmart)  వంటి దిగ్గజ కంపెనీలన్నీ ఇప్పటికే అయోమయంలో పడ్డాయి.