Jagan: అసెంబ్లీ సమావేశాల నేపథ్యంలో మళ్లీ యలహంకకి చేరిన జగన్..

వైసీపీ (వైసీపీ) అధినేత జగన్ మోహన్ రెడ్డి (Jagan Mohan Reddy) ఇటీవల తన రాజకీయ ప్రవర్తనలో మార్పులు తెచ్చుకున్నారని ప్రత్యర్థులు ఆరోపిస్తున్నారు. ముఖ్యంగా 2024 ఎన్నికల్లో ఓటమి తర్వాత ఆయన ఎక్కువ సమయం బెంగళూరు (Bengaluru) లోని యలహంక (Yelahanka) ప్యాలెస్ లోనే గడుపుతున్నారని రాజకీయ వర్గాలు చెబుతున్నాయి. ప్రస్తుతం అసెంబ్లీ సమావేశాలు జరుగుతున్నప్పటికీ, మాజీ ముఖ్యమంత్రి సభకు దూరంగా ఉండటం పై తెలుగు దేశం పార్టీ (TDP) విమర్శలు గుప్పిస్తోంది. ప్రతిపక్ష హోదా ఇవ్వలేదనే కారణంతోనే సభకు రాకుండా ఉన్నారని ఆయన స్పష్టం చేసినా, ఇది సరైన పద్ధతి కాదని ప్రత్యర్థులు విమర్శిస్తున్నారు.

జగన్ తన రాజకీయ జీవితం ప్రారంభం కావడానికి ముందు నుంచే బెంగళూరుతో అనుబంధం ఉన్నది. ఆయన తండ్రి వైఎస్ రాజశేఖర్ రెడ్డి (Y. S. Rajasekhara Reddy) ముఖ్యమంత్రిగా ఉన్న రోజుల్లోనే యలహంకలో అద్భుతమైన భవనం నిర్మించారు. తరువాత హైదరాబాద్ (Hyderabad) లోని లోటస్ పాండ్ (Lotus Pond) లో కూడా ఓ విలాసవంతమైన నివాసాన్ని కట్టుకున్నారు. 2014 లో రాష్ట్ర విభజన వరకు ఆయన ఎక్కువగా హైదరాబాద్ నుంచే రాజకీయ కార్యకలాపాలు నడిపారు. ఆ తర్వాత 2019 ఎన్నికలకు ముందు తాడేపల్లి (Tadepalli) లో ఇల్లు నిర్మించి, అక్కడే తన రాజకీయ కేంద్రాన్ని ఏర్పాటు చేసుకున్నారు.

అయితే ఈసారి ఎన్నికల్లో ఎదురైన పెద్ద దెబ్బ తర్వాత జగన్ తరచూ తాడేపల్లిలో కాకుండా బెంగళూరులోనే ఉంటున్నారని సమాచారం. నెలలో కొన్నిసార్లు మాత్రమే తాడేపల్లికి వచ్చి, రెండు రోజులు ఉండి మళ్లీ బెంగళూరుకి వెళ్లిపోతున్నారని పార్టీ వర్గాలు చెబుతున్నాయి. ఇలాంటి పరిస్థితుల్లో అసెంబ్లీ సమావేశాల సందర్భంగా ఆయన రాష్ట్రానికి వచ్చి మీడియాతో మాట్లాడతానని ముందే ప్రకటించారు. సభలో ప్రతిపక్ష హోదా లేకపోవడం వల్ల తనకు తగిన అవకాశాలు ఇవ్వరని, అందుకే మీడియా ద్వారానే ప్రజాసమస్యలను ప్రస్తావిస్తానని తెలిపారు.

ఈ నెల 18న ప్రారంభమైన అసెంబ్లీ సమావేశాల సమయంలో జగన్ తాడేపల్లికి వచ్చి పార్టీ ఎల్పీ మీటింగ్ నిర్వహించారు. ఈ సందర్భంగా కూడా తాను ప్రతిపక్ష నేతగా గుర్తింపు వస్తేనే సభకు హాజరవుతానని మరోసారి పునరుద్ఘాటించారు. ప్రభుత్వం ఈ విషయంలో వెనకడుగు వేయకపోవడంతో, రెండు రోజులుగా జరుగుతున్న సమావేశాలకు ఆయన హాజరుకాలేదు. శనివారం, ఆదివారం సభకు విరామం ఉండడంతో, జగన్ మళ్లీ బెంగళూరుకి వెళ్లిపోయారు.

టీడీపీ వర్గాలు ఈ విషయం పై మరింత విమర్శలు చేస్తూ, సీఎం పదవి నుంచి దిగిపోయిన తర్వాత జగన్ 51వ సారి బెంగళూరు వెళ్లారని లెక్కలు కూడా చెబుతున్నాయి. ఆయన ఎప్పుడు తాడేపల్లిలో ఉంటారు, ఎప్పుడు విమానంలో బెంగళూరు చేరతారు అన్నది కూడా రాజకీయ చర్చలకు కారణమవుతోంది. భవిష్యత్తులో జగన్ ఎక్కువ సమయం బెంగళూరులోనే గడిపే అవకాశం ఉందని, ఆయన రాజకీయ శైలి కూడా అలా మారుతుందని..కానీ ఇది పార్టీ భవిష్యత్తుకు మంచిది కాదని అందరూ అభిప్రాయపడుతున్నారు.