Pawan Kalyan: మానవీయ రాజకీయానికి నిదర్శనం.. ఇచ్చిన మాట నిలబెట్టుకున్న ఉపముఖ్యమంత్రి

మంగ‌ళ‌గిరి నియోజ‌క‌వ‌ర్గం (Mangalagiri Constituency) ప‌రిధిలో మాన‌వీయ కోణంతో సాగిన ఏపీ డిప్యూటీ సీఎం ప‌వ‌న్ కళ్యాణ్ (Pawan Kalyan) తాజా పర్యటన రాజకీయాలతో పాటు ప్రజల్లో భావోద్వేగాన్ని కలిగించింది. గ‌త నెల‌లో ఇచ్చిన మాటను నిలబెట్టుకుంటూ ఇప్ప‌టం గ్రామం (Ippatam Village)లోని ఒక పెద్దావిడ స‌ర‌స్వ‌తమ్మ కుటుంబాన్ని ఆయ‌న స్వయంగా ప‌రామ‌ర్శించారు. గతంలో వైసీపీ పాలన సమయంలో జ‌న‌సేన ప్లీన‌రీ (Jana Sena Plenary) కోసం భూములు ఇచ్చారన్న కారణంతో ఆ ప్రాంతంలో కొన్ని ఇళ్లను కూల్చివేయడం తీవ్ర వివాదానికి దారితీసింది. ఆ సమయంలోనే అక్కడికి చేరుకున్న పవన్ కళ్యాణ్ నిరసన వ్యక్తం చేస్తూ బాధితులకు అండగా నిలిచారు. అప్పుడే స‌ర‌స్వ‌తమ్మ ఇంటికి వస్తానని మాట ఇచ్చిన ఆయన, ఇప్పుడు ఉపముఖ్యమంత్రిగా బాధ్యతలు చేపట్టిన తర్వాత కూడా ఆ హామీని మర్చిపోకుండా నెరవేర్చడం విశేషంగా నిలిచింది.

ఈ పర్యటనలో మరో హృదయ విదారక ఘటన కూడా చోటుచేసుకుంది. ఉమ్మడి కృష్ణాజిల్లా (Krishna District) కృత్తివెన్ను (Kruthivennu)కు చెందిన జ‌న‌సేన క్రియాశీల సభ్యుడు చందు వీరవెంకట వసంతరాయలు (Chandu Veeravenkata Vasantharayalu) అలియాస్ రాయల్ కుటుంబాన్ని పవన్ పరామర్శించారు. పార్టీ కోసం నిబద్ధతతో పనిచేసిన రాయులు, పవన్ కళ్యాణ్ ఎన్నికల విజయం కోసం ప్రత్యేక పూజలు చేయించిన వ్యక్తిగా అప్పట్లో గుర్తింపు పొందారు. అయితే ఇటీవల జరిగిన రోడ్డు ప్రమాదంలో ఆయన మృతి చెందడం కార్యకర్తల్లో తీవ్ర విషాదాన్ని నింపింది.

జ‌న‌సేన పార్టీ సభ్యత్వంతో పాటు బీమా పథకం ఉండటంతో, రాయులు కుటుంబానికి బీమా పరిహారం చెక్కును పవన్ కళ్యాణ్ అందించారు. అంతేకాదు పార్టీ తరఫున అదనపు ఆర్థిక సహాయాన్ని కూడా ఇచ్చి కుటుంబానికి ధైర్యం చెప్పారు. రాయులు కేవలం పార్టీ కార్యకర్త మాత్రమే కాకుండా సామాజిక స్పృహ ఉన్న వ్యక్తిగా కూడా గుర్తింపు పొందారు. జీవించి ఉండగానే అవయవదానానికి అంగీకరించిన ఆయన, మరణానంతరం ఆరుగురు అవసరమైన వ్యక్తులకు ప్రాణదానం చేశారు. ఈ విషయాన్ని ప్రస్తావించిన పవన్ కళ్యాణ్, రాయులు ఇక భౌతికంగా లేనప్పటికీ ఆరుగురిలో జీవిస్తున్నారని పేర్కొన్నారు.

కుటుంబ సభ్యుల పరిస్థితిని తెలుసుకున్న పవన్ , ప్రభుత్వం తరఫున కూడా సహాయం అందేలా చూస్తానని, కుటుంబంలో ఒకరికి ఉద్యోగ అవకాశాన్ని కల్పించేందుకు కృషి చేస్తానని హామీ ఇచ్చారు. దీంతో రాయులు కుటుంబం భావోద్వేగానికి లోనైంది. ఈ పర్యటనను గోప్యంగా నిర్వహించాలని భావించినప్పటికీ, పవన్ కళ్యాణ్ ను చూసేందుకు వేలాదిగా అభిమానులు, పార్టీ కార్యకర్తలు తరలివచ్చారు. రాజకీయ నాయకుడిగా మాత్రమే కాకుండా, మాటకు కట్టుబడే వ్యక్తిగా, మానవత్వంతో స్పందించే నేతగా పవన్ మరోసారి ప్రజల మనసుల్లో స్థానం సంపాదించారు.