Nara Lokesh: జాతీయం నుంచి అంతర్జాతీయం వరకు విస్తరిస్తున్న లోకేష్ ప్రతిభ..

ఆంధ్రప్రదేశ్ (Andhra Pradesh) ఐటీ శాఖ మంత్రి నారా లోకేష్ (Nara Lokesh) అడుగులు ఇప్పుడు రాష్ట్ర, జాతీయ స్థాయిని దాటుకుని అంతర్జాతీయ వేదికలకు విస్తరించాయి అనే అభిప్రాయం పార్టీ వర్గాల్లో వినిపిస్తోంది. ఇటీవల వరకు ఢిల్లీ (Delhi) రాజకీయాల్లో చురుకుగా కనిపించిన ఆయన, ఇప్పుడు విదేశాల్లో పెట్టుబడిదారులను ఆకర్షించే దిశగా కొత్త వ్యూహం మొదలుపెట్టినట్టు తెలుస్తోంది.

కొద్దినెలల క్రితం నారా లోకేష్ ఒంటరిగా సింగపూర్ (Singapore) పర్యటనకు వెళ్లారు. అక్కడి వ్యాపారవేత్తలను కలుసుకుని రాష్ట్రానికి పెట్టుబడులు పెట్టాలని కోరారు. అంతేకాకుండా అక్కడ రోడ్ షో నిర్వహించి, ఆంధ్రప్రదేశ్‌లో లభించే అవకాశాలు, వనరులు గురించి వివరించారు. సాధారణంగా ఇలాంటి పర్యటనల్లో ముఖ్యమంత్రి నారా చంద్రబాబు నాయుడు (N. Chandrababu Naidu) లేదా ఇతర మంత్రులు ఉండడం సహజం. కానీ లోకేష్ ఒంటరిగా ముందుకు రావడం ఆయనకే ప్రత్యేక గుర్తింపు తెచ్చింది.

ఇటీవల లండన్ (London) లో కూడా ఆయన అదే తరహా పర్యటన నిర్వహించారు. అక్కడ కూడా పారిశ్రామిక వేత్తలను కలుసుకుని రోడ్ షో చేయడం ద్వారా రాష్ట్ర పెట్టుబడి వాతావరణాన్ని ప్రదర్శించారు. ఈ కార్యక్రమాల్లో ఇతర మంత్రులు లేకుండా కేవలం లోకేష్ పాల్గొనడం పార్టీ లోపలే చర్చకు దారితీసింది. ఆయన అంతర్జాతీయ వేదికలపై కనిపించడం వెనుక వ్యూహాత్మక ఆలోచన ఉందని, భవిష్యత్తులో మరింత ప్రాధాన్యం పొందేలా కృషి చేస్తున్నారని కొందరు విశ్లేషకులు అభిప్రాయపడుతున్నారు.

జాతీయ స్థాయిలో ఆయన చురుకుదనం కూడా గమనించదగినది. ప్రధానమంత్రి నరేంద్ర మోడీ (Narendra Modi)తో పలు మార్లు భేటీ కావడం, కేంద్ర మంత్రులతో క్రమం తప్పకుండా సమావేశాలు జరపడం ద్వారా సంబంధాలు బలోపేతం చేశారు. అంతేకాకుండా ఇటీవల నేపాల్ (Nepal)లో అల్లర్లు జరిగినప్పుడు అక్కడ చిక్కుకున్న తెలుగు ప్రజలను సురక్షితంగా తీసుకురావడానికి కృషి చేశారు. అమరావతి (Amaravati)లో రెండు రోజులపాటు ఉన్న ఆయన, కేంద్ర మంత్రులతో నిరంతరంగా సంప్రదింపులు జరిపిన సంఘటన ఆయనకున్న జాతీయ స్థాయి గుర్తింపును మరింత బలపరిచింది.

ఇప్పుడు ఆయన అంతర్జాతీయ వేదికలపై కూడా చురుకుదనం చూపించడం, నారా లోకేష్‌ను కొత్త తరహా నాయకుడిగా నిలబెడుతోందని అంటున్నారు. గతంలో చంద్రబాబు నాయుడు ప్రపంచ దేశాలను సందర్శించి పారిశ్రామికవేత్తలను రాష్ట్రానికి రప్పించిన సందర్భాలు గుర్తుకు వస్తున్నాయి. అదే మార్గాన్ని లోకేష్ అనుసరిస్తూ, తనకంటూ ప్రత్యేకమైన శైలి అలవర్చుకుంటున్నట్టు తెలుస్తోంది. ఆలోచించి వేసే అడుగులతో లోకేష్ ఇప్పుడు రాజకీయాల్లో సుస్థిర స్థానం ఏర్పరచుకునే దిశగా కృషి చేస్తున్నారని పార్టీ నాయకులు చెబుతున్నారు. రాష్ట్రం, దేశం దాటుకుని ఇప్పుడు అంతర్జాతీయ వేదికలపై కూడా నారా లోకేష్ తన ముద్ర వేసేందుకు సన్నద్ధమవుతున్నారని విశ్లేషకుల అంచనా. ఈ దిశలో ఆయన దూకుడు మరింత పెరుగుతుందని భావిస్తున్నారు.